The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ​កំពូល​បដិសេធ​ការ​ធានា យ៉ោម បុប្ផា នៅ​ក្រៅ​ឃុំ

តុលាការ​កំពូល​បដិសេធ​ការ​ធានា យ៉ោម បុប្ផា នៅ​ក្រៅ​ឃុំ

តុលាការ​កំពូល​បដិសេធ​ការ​ធានា យ៉ោម បុប្ផា នៅ​ក្រៅ​ឃុំ

130328_03a
អ្នកស្រីយ៉ោម បុប្ផា យំឱបកូនប្រុសនៅឯតុលាការកំពូលកាលពីថ្ងៃម្សិលមិញ ហេង ជីវ័ន

ភ្នំពេញៈ ចំនួន​អ្នក​គាំទ្រ​លោក​ស្រី យ៉ោម បុប្ផា សកម្មជន​ដីធ្លី​នៅ​បឹងកក់ ដែល​កំពុង​ជាប់​ឃុំ បាន​កើន​ឡើង​នៅ​ទីធ្លា​តុលាការ​កំពូល ​ក្នុង​រាជធានី​ភ្នំពេញ ​កាល​ពី​ព្រឹក​ម្សិលមិញ ដោយ​ស្រែក​យំ បន្ទាប់​ពី​បណ្តឹង​សារទុក្ខ​សុំ​ធានា​នៅ​ក្រៅ​ឃុំ​ត្រូវ​បដិសេធ ហើយ​លោក​ស្រី​ត្រូវ​អម​ដំណើរ​ទៅ​ក្នុង​រថយន្ត​ដឹក​ឆ្ពោះ​ទៅ​ពន្ធនាគារ ព្រៃស។

អ្នក​គាំទ្រ​អ្នក​ស្រី​ជាង​១០០ នាក់ បាន​ប្រមូល​ផ្តុំ​គ្នា​នៅ​ខាង​ក្រៅ​ស្រែក​ដាក់​មន្រ្តី ហើយ​គោះ​រថយន្ត មុន​ពេល​ត្រូវ​បន្ថែម​ល្បឿន ខណៈ​អ្នក​ស្រី បុប្ផា ស្រែក​ពី​ក្នុង​រថយន្ត ជា​ហេតុ​ធ្វើ​ឲ្យ​អ្នក​តវ៉ា​ហែក​និង​ដុត​រូប​ជញ្ជីង​យុតិ្តធម៌។

អ្នក​ស្រី បុប្ផា អាយុ​២៩​ឆ្នាំ ដែល​ត្រូវ​ផ្តន្ទាទោស​ឲ្យ​ជាប់​ពន្ធនាគារ ៣ ឆ្នាំ បាន​ចូល​ទៅ​ក្នុង​បន្ទប់​សវនាការ​ស្ងាត់ៗ ប៉ុន្មាន​ម៉ោង​មុន ដោយ​សង្ឃឹម​ថា ចៅក្រម​ជំនុំ​ជម្រះ​មាន​៥នាក់ នឹង​ដោះ​លែង​អ្នក​ស្រី​តាម​ពាក្យ​ធានា​ឲ្យ​នៅ​ក្រៅ​ឃុំ មុន​សាលា​ឧទ្ធរណ៍​បើក​សវនាការ​ខណៈ​ពុំ​ទាន់​បាន​កំណត់​កាល​បរិច្ឆេទ​នៅ​ឡើយ​។

សកម្មជន​រូប​នេះ​ថ្លែង​ថា ៖ «​ខ្ញុំ​គិត​ថា ប្រសិន​បើ​តុលាការ​ឯករាជ្យ​រូប​ខ្ញុំ​នឹង​ត្រូវ​ដោះលែង​ដោយ​ការ​ធានា ឲ្យ​នៅ​ក្រៅ​ឃុំ​។ ខ្ញុំ​សង្ឃឹម​ទទួល​បាន​យុតិ្តធម៌ ​ហើយ​ខ្ញុំ​នឹង​មិន​ចុះ​ញ៉ម​ឡើយ។ ខ្ញុំ​នឹង​តស៊ូ ទាល់​តែ​ខ្ញុំ​ទទួល​បាន​យុតិ្តធម៌»។

អ្នក​ស្រី យ៉ោម បុប្ផា ត្រូវ​បាន​ចាប់​ខ្លួន​កាល​ពី​ខែ​កញ្ញាពី​បទ​ប្រើ​ហិង្សា​ដោយ​ចេតនា បន្ទាប់​ពី​ត្រូវ​បាន​ចោទ​ប្រកាន់​ថា ជា​អ្នក​បញ្ជា​ឲ្យ​គេ​យក​ពូថៅ​ទៅ​វាយ​ប្រហារ​អ្នក​រត់​ម៉ូតូ​ឌុប​ពីរ​នាក់​ នៅ​ភូមិ ២២ តំបន់​បឹងកក់ នៅ​ថ្ងៃ​ទី៧ ខែ​សីហា​ឆ្នាំ​មុន។ អ្នក​គាំទ្រ​របស់​អ្នក​ស្រី និង​ក្រុម​សិទិ្ធ​មនុស្ស​បាន​ថ្លែង​ថា បទ​ចោទ​ប្រកាន់​នេះ​ពុំ​មាន​មូលដ្ឋាន ហើយ​ត្រូវ​បាន​ជំរុញ​ដោយ​សារ​គេ​ចង់​បំបិទ​មាត់​សហគមន៍​របស់​លោក​ស្រី។

ក្នុង​សវនាការ​ដែល​មាន​រយៈ​ពេល ២៥​ នាទី​ កាល​ពី​ម្សិលមិញ បាន​ថ្លែង​ថា មូលហេតុ​ស្នើ​សុំ​ធានា​នៅ​ក្រៅ​ឃុំ​គឺ​ដោយ​សារ​បញ្ហា​បេះដូង ដែល​ត្រូវ​ការ​ការ​ព្យាបាល​ជា​ប្រចាំ ហើយ​សេចក្តី​​ត្រូវ​ការ​ចង់​ថែទាំ​គ្រួសារ​របស់​លោក​ស្រី រាប់​ទាំង​កូន​ប្រុស​អាយុ ៩ ឆ្នាំ ឈ្មោះ លី ហូរ ផង​ដែរ។

លោក​ស្រី​បាន​ប្រាប់​ចៅក្រម​ថា ៖ «​ប្តី​ខ្ញុំ​នឹង​ដាក់​ប្រាក់ ៤ លាន​រៀល​ដើម្បី​ធានា​នៅ​ក្រៅឃុំ ហើយ​ខ្ញុំ​នឹង​មក​ឆ្លើយ​សំណួរ​ជូន​តុលាការ ពេល​ណា​តុលាការ​កោះ​ហៅ​ឲ្យ​មក​ឆ្លើយ»។

ចំពោះ​មូលហេតុ​ដែល​ តុលាការ​គួរ​ច្រាន​ចោល​ពាក្យ​សុំ លោក សេង ប៊ុនឃៀង ព្រះ​រាជ​អាជ្ញា បាន​ថ្លែង​ថា អ្នក​ស្រី យ៉ោម បុប្ផា ត្រូវ​រក​ឃើញ​ថា មាន​ពិរុទ្ធ​ពី​បទ​វាយ​ប្រហារ​ ហើយ​អ្នក​ស្រី​អាច​រត់​គេច​ខ្លួន​ បើ​ទោះ​សហគមន៍​អ្នក​ស្រី​នៅ​បន្ត​ទាមទារ​ក្នុង​ជម្លោះ​ដី​ តំបន់​បឹងកក់​ក៏​ដោយ។

ក្នុង​ពេល​ដ៏​ខ្លី​មួយ លោក ប៊ុន​ឃៀង បន្ថែម​ថា ករណី​អ្នក​ស្រី​យ៉ោម បុប្ផា ជា​ករណី​ពិសេស​។

នៅ​ពេល​មេធាវី​ម្នាក់​របស់​អ្នក​ស្រី យ៉ោម បុប្ផា គឺ​លោក ហម ស៊ុនរិទ្ធ សួរ​ថា ​តើ​ពាក្យ​ពិសេស ព្រះ​រាជ​អាជ្ញា​មាន​ន័យ​អ្វី ពេល​នោះ​ចៅក្រម​បាន​បង្អាក់​ដោយ​និយាយ​ថា លោក ប៊ុនឃៀង ពុំ​មាន​ពេល​នឹង​ពន្យល់​ចំណុច​នេះ​ឲ្យ​លម្អិត​បាន​ទេ។

បន្ទាប់​ពី អ្នក​ស្រី បុប្ផា ជាមួយ​នឹង​កូន​ប្រុស​នៅ​លើ​ជង្គង់ បាន​ធ្វើ​សន្និសីទ​សារ​ព័ត៌មាន​នៅ​ខាង​ក្រៅ​បន្ទប់​សវនាការ លោក ឃឹម ប៉ុណ្ណ ប្រធាន​ចៅក្រម​ក្រុម​ប្រឹក្សា​ជំនុំ​ជម្រះ បាន​ថ្លែង​ថា អ្នក​ស្រី បុប្ផា នឹង​ត្រូវ​បន្ត​ជាប់​ឃុំ​ពន្ធនាគារ​ព្រៃស។

លោក​បន្ត​ថា៖ « តុលាការ​កំពូល​មិន​ឯកភាព​លើ​ពាក្យ​សុំ​របស់​លោក​ស្រី​ទេ ព្រោះ​បញ្ហា​បេះដូង ដែល​អ្នក​ស្រី យ៉ោម​ បុប្ផា លើក​ឡើង ពុំ​ត្រូវ​បាន​បញ្ជាក់​ក្នុង​ឯក​សារ​ផ្លូវ​ការ​របស់​អាជ្ញាធរ​សុខាភិបាល ឡើយ​។ ម្យ៉ាង​ទៀត​ជន​សង្ស័យ​ត្រូវ​បាន​ផ្តន្ទាទោស​ឲ្យ​ជាប់​ពន្ធនាគារ​រួច​ហើយ ដោយ​សាលា​ដំបូង​រាជធានី​ភ្នំពេញ​នៅ​ថ្ងៃ​ទី២៧​ខែ​ធ្នូ​ឆ្នាំ​មុន»។

អ្នក​ស្រី យ៉ោម បុប្ផា ឡោម​ព័ទ្ធ​ដោយ​សន្តិសុខ និង​អ្នក​ស្រី ហេង មុំ សកម្ម​ជន​បឹងកក់​ដូច​គ្នា បាន​ថ្លែង​ថា ការ​ប្រយុទ្ធ​ដើម្បី​យុត្តិធម៌​របស់​គាត់​នឹង​ធ្វើ​បន្ត​ទៀត។

អ្នក ស្រី​បន្ត​ថា៖ «​នេះ​ជា​សារ​របស់​ខ្ញុំ​ចំពោះ​សហគមន៍​យើង​។ កុំ​ចុះ​ចាញ់​ឬ​កុំ​គិត​ថា ខ្ញុំ​មិន​អាច​​ត្រូវ​ដោះ​លែង​។ យើង​ត្រូវ​តែ​បន្ត​តស៊ូ​ដើម្បី​សិទិ្ធ​ដី​ធ្លី​របស់​យើង​»។ អ្នក​ស្រី​លើក​ដៃ​​មុន​ពេល​បង្ខំ​ចូល​រថយន្ត និង​ស្រែក​ថា៖ «​តស៊ូ តស៊ូ ​យុតិ្តធម៌ នឹង​កើត​មាន»។​

អ្នក​ស្រី ហេង មុំ បាន​និយាយ​ទាំង​ទឹក​ភ្នែក​ថា៖​«​ខ្ញុំ​សង្ឃឹម​ថា ​ថ្ងៃ​នេះ​នឹង​ជា​ថ្ងៃ​អ្នក​ស្រី យ៉ោម បុប្ផា មាន​សេរីភាព តែ​វា​អយុតិ្តធម៌ ...អយុត្តិធម៌​ណាស់​!ហេតុ​អ្វី?» ។

អំឡុង​អ្នក​ស្រី យ៉ោម បុប្ផា ត្រូវ​ជំនុំ​ជម្រះ​ពី​ខែ​ធ្នូ ​ប្តី​គាត់​ឈ្មោះ ​លូស សាខន បាន​ទទួល​ទោស​ដូច​គ្នា តែ​ត្រូវ​ព្យួរ​ភ្លាម​ៗ​ផង​ដែរ​ ចំណែក​ឯប្អូន​ប្រុស​គាត់​ឈ្មោះ​ យ៉ោម កាន់ឡុង និង យ៉ោម សិទ្ធ ត្រូវ​កាត់​ទោស​កំបាំង​មុខ​ឲ្យ​ជាប់​ពន្ធនាគារ​៣ឆ្នាំ និង​ចេញ​ដីកា​តាម​ចាប់​ខ្លួន​ពួក​គេ។​

ក្នុង​សេចក្តី​ថ្លែង​មួយ​ដែល​មាន ឈ្មោះ​អង្គការ STT សមភាព​កម្ពុជា និង​មជ្ឈមណ្ឌល​អប់រំ​ច្បាប់​សម្រាប់​សហគមន៍ លោក​ស្រី ណាលី ពីឡូក ប្រធាន​អង្គការ​លីកាដូ ថ្លែង​ថា​៖«កំហុស​នីតិវិធី​និង​អង្គ​សេចក្តី​ក្នុង​ការ​ជំនុំ​ជម្រះ​អ្នក​ស្រី យ៉ោម បុប្ផា ពី​ដំបូង​គឺ​មាន​កម្រិត​ធ្ងន់​ខ្លាំង​ណាស់​ដែល​វា​មិន​អាច​សន្និដ្ឋាន​ថា ​ការ​កាត់​ទោស​មិន​មែន​ដោយ​សារ​បញ្ហា​នយោបាយ​នោះ​ឡើយ»៕ TK

អត្ថបទគួរចាប់អារម្មណ៍