The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ​កំពូល​បើក​សវនាការ​កម្មករ​រោងចក្រ Sabrina

តុលាការ​កំពូល​បើក​សវនាការ​កម្មករ​រោងចក្រ Sabrina

តុលាការ​កំពូល​បើក​សវនាការ​កម្មករ​រោងចក្រ Sabrina

ភ្នំពេញៈ តុលាការ​កំពូល​កាល​ពី​ថ្ងៃ​សុក្រ បាន​បើក​សវនាការ​បិទ​ទ្វារ លើ​សំណុំ​រឿង​សុំ​ធានា​នៅ​ក្រៅ​ឃុំ នៃ​សមាជិក​សហជីព​ចំនួន ៨ រូប ដែល​ត្រូវ​បាន​ចាប់​ខ្លួន ក្នុង​បាតុកម្ម កាល​ពី​ថ្ងៃ​ទី ៣ ខែ មិថុនា នៅ​រោងចក្រ​កាត់​ដេរ Sabrina ខេត្ត កំពង់ស្ពឺ។

លោក កៅ ទី មេធាវី​តំណាង​កម្មករ​បាន​ឲ្យ​ដឹង​ថា តុលាការ នឹង​ចេញ​សេចក្តី​សម្រេច​ចំពោះ​ពាក្យ​ស្នើ​សុំ​នៅ​ក្រៅ​ឃុំ របស់​កម្មករ​នៅ​ថ្ងៃ ទី៩ ខែ តុលា។ លោក កៅ ទី បាន​បញ្ជាក់​ថា៖ «ខ្ញុំ​សង្ឃឹម​ថា តុលាការ​កំពូល នឹង​ពិចារណា​ករណី​នេះ​និង​អនុញ្ញាត​ឲ្យ​កម្មករ និង​សមាជិក [សហជីព​សេរី​កម្មករ] ទាំង ៨ នាក់ បាន​នៅ​ក្រៅ​ឃុំ»។

កង​រាជ​អាវុធហត្ថ បាន​ចាប់​ខ្លួន​កម្មករ​នៅ​រោងចក្រ Sabrina និង​សមាជិក​សហជីព​សេរី​កម្មករ ៨នាក់ ក្នុង​អំឡុង​កូដកម្ម ដែល​មាន​កម្មករ​ចូល​រួម​ជាង ១០០០ នាក់ បន្ទាប់​ពី​កូដកម្ម បាន​ក្លាយ​ទៅ​ជា​អំពើ​ហិង្សា។

កូដករ និង​កម្មករ ដែល​កំពុង​ធ្វើ​ការ​នៅ​រោងចក្រ Sabrina បាន​គប់​ដុំ​ថ្ម និង​ដំបង​ដាក់​គ្នា បង្ក​ឲ្យ​ខូច​ខាត​ទ្រព្យ​សម្បតិ្ត​របស់​រោងចក្រ​ជាច្រើន និង​បង្ក​របួស​ដល់​មនុស្ស​យ៉ាង​ហោច​ណាស់ ២៣ នាក់ ក្នុង​នោះ​មាន​មន្រ្តី​នគរបាល ៩នាក់ ផង​ដែរ។

កាល​ពី​ខែ កក្កដា តុលាការ​ខេត្ត កំពង់ស្ពឺ បាន​បដិសេធ​ពាក្យ​សុំ​ធានា​នៅ​ក្រៅ​ឃុំ​របស់​ក្រុម​កម្មករ​ទាំង​នោះ។ ចាប់​តាំង​ពី​កូដកម្ម​ខែ កក្កដា មក​មនុស្ស​យ៉ាង​ហោច​ណាស់ ៨នាក់​ទៀត ត្រូវ​បាន​ចោទ​ប្រកាន់​ដោយ​តុលាការ​។ ប៉ុន្តែ គ្មាន​អ្នក​ណា​ម្នាក់​ត្រូវ​បាន​ចាប់​ឃុំ​ទៀត​ឡើយ៕

អត្ថបទគួរចាប់អារម្មណ៍