The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ​ចោទ​ជន​សង្ស័យ​៧នាក់​ពី​បទ​សម្លាប់​បង​ប្អូន​២នាក់​នៅ​ជី​ក្រែង




តុលាការ​ចោទ​ជន​សង្ស័យ​៧នាក់​ពី​បទ​សម្លាប់​បង​ប្អូន​២នាក់​នៅ​ជី​ក្រែង

តុលាការ​ចោទ​ជន​សង្ស័យ​៧នាក់​ពី​បទ​សម្លាប់​បង​ប្អូន​២នាក់​នៅ​ជី​ក្រែង

សៀមរាបៈ ជន​៧​នាក់​ដែល​សង្ស័យ​ថា​ពាក់ព័ន្ធ​នឹង​ការ​ស្លាប់​របស់​បង​ប្អូន​២នាក់​នៅ​ស្រុក​ជីក្រែង​ក្នុង​ខ្ទម​ចាំចម្ការ​កាលពី​ខែ​កុម្ភៈ​ហើយ​ត្រូវ​ចាប់​ខ្លួន​បាន​កាលពី​ថ្ងៃទី​៨​មីនា​នោះ​ត្រូវ​បាន​ចៅក្រម​ខេត្ត​សៀមរាប​ចោទ​ប្រកាន់​ដោយ​បញ្ជូន​ទៅ​ឃុំ​ខ្លួន​បណ្តោះ​អាសន្ន​នៅ​ពន្ធនាគារ​ខេត្ត​ដើម្បី​ធ្វើការ​ស៊ើប​អង្កេត​លើ​សំណុំ​រឿង​ពួក​គេ​បន្ត​ទៅ​ទៀត។

លោក​ចៅក្រម សំ ប៊ុនពៅ អ្នក​កាន់​សំណុំ​រឿង​ជនសង្ស័យ​ទាំង​៧នាក់​បាន​ប្រាប់​ម្សិលមិញ​ថា​ចំពោះ​ករណី​នេះ​លោក​បាន​ចាត់​ការ​ទៅ​តាម​នីតិវិធី​ហើយ។

លោក សំរិទ្ធ សុខុន ព្រះរាជអាជ្ញារង​ខេត្ត​បាន​ឲ្យ​ដឹង​ដែរ​ថា តុលាការ​បាន​សម្រេច​ចេញ​ដីកា​ឃុំខ្លួន​បណ្តោះ​អាសន្ន​ដល់​ជន​ទាំង​៧នាក់​កាលពី​ថ្ងៃទី​១០ មីនា​នៅ​ពន្ធនាគារ​ខេត្ត​ដើម្បី​ស៊ើប​អង្កេត​បន្ត។

លោក​ថ្លែង​ថា៖ «មុន​ដំបូង​ប៉ូលិស​បាន​បញ្ជូន​តែ​៦នាក់​មក​ទេ តែ​ខ្ញុំ​បាន​ឲ្យ​ប៉ូលិស​នាំ​ខ្លួន​ម្នាក់​ទៀត​មក ព្រោះ​គាត់​ស្ថិត​ក្នុង​ហេតុការណ៍​នោះ​ដែរ។យើង​បាន​ចោទ​ប្រកាន់​ជន​សង្ស័យ​៦នាក់​នោះ​ពី​បទ​ឃាតកម្ម​គិត​ទុក​ជាមុន ឯ​ម្នាក់​ទៀត​ចោទ​ពី​បទ​មនុស្ស​ឃាត​ដោយ​អចេតនា»។

លោក ណុល រ៉ុង នាយរង​ការិយាល័យ​ព្រហ្មទណ្ឌ​ខេត្ត​បាន​រំឭក​ឲ្យ​ដឹង​ថា​ជន​សង្ស័យ​ពាក់ព័ន្ធ​នឹង​ការ​សម្លាប់​បង​ប្អូន​ប្រុស​ស្រី ២នាក់​នៅ​ចម្ការ​ឈូក​ព្រៃ​រនាម​មាត់​បឹង​ទន្លេសាប ក្នុង​ឃុំ​អន្លង់​សំណ ស្រុក​ជីក្រែង ខេត្ដ​សៀមរាប ត្រូវ​ចាប់​បាន​ជា​បន្ដ​បន្ទាប់​កាលពី​សប្តាហ៍​មុន​នៅ​ក្នុង​ស្រុក​ភូមិ​របស់​ពួក​គេ ហើយ​ត្រូវ​តុលាការ​បាន​បញ្ជូន​ទៅ​ពន្ធនាគារ​ហើយ។ ជនសង្ស័យ​ទាំង​៧នាក់ មាន​ឈ្មោះ មាស សំបូរ អាយុ​៣៣​ឆ្នាំ រស់នៅ​ភូមិ​ស្វាយ​តាដោក ឃុំ​អន្លង់​សំណ ទី២- ឈ្មោះ នឹម បូរី អាយុ​៤១​ឆ្នាំ រស់នៅ​ភូមិ​អូរ​កណ្ដាល ឃុំ​សង្វើយ ទី៣- ឈ្មោះ នឹម បូរ៉ាន អាយុ៣១ឆ្នាំ រស់នៅ​ភូមិ​គោក​រមាស ឃុំ​គោកធ្លក​ក្រោម ទី៤-ឈ្មោះ យ៉ា រិន អាយុ៥៩ឆ្នាំ រស់នៅ​ភូមិ​គោក​រមាស ឃុំ​អន្លង់​សំណ ទី៥-ឈ្មោះ ម៉ាត់  ម៉ុន  អាយុ​៤០​ឆ្នាំ រស់នៅ​ភូមិ​គោក​រមាស ឃុំ​អន្លង់​សំណ ទី៦-ឈ្មោះ ខន ខេង អាយុ​២៧​ឆ្នាំ រស់នៅ​ភូមិ​គោក​រមាស ឃុំ​អន្លង់​សំណ និង​ទី៧- ឈ្មោះ សឿ សុភ័ក្រ អាយុ​២៦​ឆ្នាំ មាន​លំនៅ​ភូមិ​ចែក​ខ្សាច់​ក្រោម ឃុំ​អន្លង់​សំណ ស្រុក​ជីក្រែង។

នៅ​ថ្ងៃទី​១២​កុម្ភៈ ជន​រងគ្រោះ​ទាំង​២នាក់​បង​ប្អូន​ត្រូវ​គេ​សម្លាប់ នៅ​ក្នុង​ខ្ទម​ចាំ​ចម្ការ​ឈូក​នា​ត្រពាំង​ដង​រែក ឃុំ​អន្លង់​សំណ ស្រុក​ជីក្រែង ដោយ​កាប់​នឹង​អាវុធ​មុខ​ស្រួច​លុះ​ព្រឹក​ឡើង​ជន​រងគ្រោះ​ទាំង​ពីរ​នាក់​ត្រូវ​បាន​គេ​ប្រទះ​ឃើញ​ដេក​ស្លាប់​នៅ​ខាង​ក្រៅ​ខ្ទម​របស់​ពួក​គេ​ដែល​ត្រូវ​បាន​គេ​ដុត​បំផ្លាញ ចោល។ ជន​រងគ្រោះ ឈ្មោះ ឈាង សុខ ភេទ​ប្រុស អាយុ​៣១​ឆ្នាំ និង ឈាង សុខ​ជា ត្រូវ​ជា​ប្អូន​ស្រី អាយុ​២១​ឆ្នាំ​នៅ​ភូមិ​ចែក​ខ្សាច់​ក្រោម​ឃុំ​អន្លង់​សំណ៕

អត្ថបទគួរចាប់អារម្មណ៍