The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​រុស្ស៊ី​ចេញ​ដីកា​ចាប់​ខ្លួន​សេដ្ឋី​ដែល​សម្បូរ​រឿង​អាស្រូវ Polonsky




តុលាការ​រុស្ស៊ី​ចេញ​ដីកា​ចាប់​ខ្លួន​សេដ្ឋី​ដែល​សម្បូរ​រឿង​អាស្រូវ Polonsky

តុលាការ​រុស្ស៊ី​ចេញ​ដីកា​ចាប់​ខ្លួន​សេដ្ឋី​ដែល​សម្បូរ​រឿង​អាស្រូវ Polonsky

ភ្នំពេញៈ ប្រព័ន្ធ​ឃោសនា រុស្ស៊ី រាយការណ៍​ថា តុលាការ​រុស្ស៊ី បាន​ចេញ​ដីកា​ចាប់​ខ្លួន​មហា​សេដ្ឋី​អចលន​ទ្រព្យ​លោក Sergei Polonsky ដែល​គេ​ជឿ​ថា ស្ថិត​នៅ​ប្រទេស អ៊ីស្រាអែល បន្ទាប់​ពី​មិន​មក​បង្ហាញ​ខ្លួន​នៅ​ក្នុង​តុលាការ​ក្រោយ​ពី​បង់​ប្រាក់​ធានា​នៅ​ក្រៅ​ឃុំ​នៅ​កម្ពុជា ដោយ​សារ​តែ​ការ​ចោទ​ប្រកាន់​ជាច្រើន និង​បាន​កេង​បន្លំ​ក្រុម​អ្នក​វិនិយោគ​នៅ​ក្នុង​គម្រោង​សំណង់​មួយ​នៅ​ក្រុង ម៉ូស្គូ ក្នុង​ទឹក​ប្រាក់ ១៧៦ លាន​ដុល្លារ។

ទាក់ទិន​នឹង​លោក Polonsky ទី​ភ្នាក់ងារ​ព័ត៌មាន​ជាច្រើន​នៅ​ក្នុង​ប្រទេស រុស្ស៊ី កាល​ពី​ល្ងាច​ថ្ងៃ​អង្គារ បាន​ដក​ស្រង់​សម្តី​មន្រ្តី​តុលាការ​និង​រដ្ឋាភិបាល​ថា តុលាការ​បាន​ចេញ​ដីកា​ចាប់​ខ្លួន​គាត់​នេះ បន្ទាប់​ពី​គេ​បាន​ធ្វើ​ការ​ចោទ​ប្រកាន់​កាល​ពី​ខែ​មិថុនា ហើយ​មាន​កិច្ច​ពិភាក្សា​រវាង​អាជ្ញាធរ រុស្ស៊ី និង​ប៉ូលិស​អន្តរជាតិ។

ទីភ្នាក់ងារ​ព័ត៌មាន Interfax បាន​ស្រង់​សម្តី​លោក Alexei Krivoruchko ចៅក្រម​នៅ​ក្រុង ម៉ូស្គូ​មក​ថា៖ «លោក Sergei Polonsky ត្រូវ​បាន​គេ​ដាក់​ក្នុង​បញ្ជី​តាម​ចាប់​ខ្លួន​ជា​អន្តរជាតិ។

របាយ​ការណ៍ ផ្សេង​ទៀត​ជាច្រើន បាន​ឲ្យ​ដឹង​ថា រុស្ស៊ី អាច​ស្នើ​ឲ្យ អ៊ីស្រាអែល ធ្វើ​បត្យាប័ន​លោក Polonsky ភ្លាមៗ​នៅ​ពេល​ដែល​ទិដ្ឋកា​ទេសចរណ៍​របស់​គាត់ ផុត​កំណត់​នៅ​ថ្ងៃ​ទី២៧ ខែ កញ្ញា​។ លោក Polonsky បាន​ដាក់​ពាក្យ​សុំ​សញ្ជាតិ អ៊ីស្រាអែល ម្តង​ហើយ​ម្តង​ទៀត។

អ្នក​ជំនួញ​អាថ៌កំបាំង​វ័យ ៤០ ឆ្នាំ​រូប​នេះ ត្រូវ​ចាប់​ខ្លួន​ក្បែរ​កោះ​មួយ​ដែល​លោក​គ្រប់​គ្រង​នៅ​ម្តុំ​ខេត្ត ព្រះសីហនុ កាល​ពី​ចុង​ខែ ធ្នូ​ក្រោម​ការ​ចោទ​ប្រកាន់​ពី​បទ​បង្ខំ​អ្នក​រត់​ទូក​ឈ្នួល​ឲ្យ​លោត​ចុះ​សមុទ្រ​ដោយ​ភ្ជង់​នឹង​ចុង​កាំបិត។

ក្រោយ​មក​អ្នក​រត់​ទូក​ទាំង​នោះ បាន​ដក​បណ្តឹង​វិញ ជា​ថ្នូរ​នឹង​ប្រាក់ ២ ម៉ឺន​ដុល្លារ ប៉ុន្តែ ការ​ចោទ​ប្រកាន់​នេះ​នៅ​តែ​មាន ហើយ​លោក Polonsky ជួប​ការ​លំបាក​នៅ​ពន្ធនាគារ​ខេត្ត ព្រះ​សីហនុ​រហូត​ដល់​ដោះលែង​ឲ្យ​នៅ​ក្រៅ​ឃុំ​កាល​ពី​ខែ មេសា​កន្លង​ទៅ។

ទោះ​បី​មាន​របាយ​ការណ៍​ពី​អន្តរជាតិ​ថា​អាជ្ញាធរ​កម្ពុជា «ខឹង​ខ្លាំង​» ដែល​លោក Polonsky លែង​នៅ​កម្ពុជា​ក៏​ដោយ ក៏​ក្រុម​មន្រ្តី​ដែល​កាសែត​ភ្នំពេញ ប៉ុស្តិ៍ សម្ភាស​កាល​ពី​ថ្ងៃ​ម្សិលមិញ​ថា ពួក​គេ​មិន​បាន​ដឹង​ថា គាត់​ស្ថិត​នៅ​បរទេស​ណា​ទេ ហើយ​ក៏​មិន​ពិចារណា​ថា ការ​គេច​ខ្លួន​របស់​គាត់​ជា​បញ្ហា​មួយ​ដែល​គួរ​ស៊ើប​អង្កេត​ដែរ។

ព្រះ​រាជអាជ្ញា​តុលាការ​ខេត្ត ព្រះសីហនុ លោក ហួត វិចិត្រ បាន​ថ្លែង​ថា៖ «គាត់​ត្រូវ​តែ​រាយការណ៍​ទៅ​អាជ្ញាធរ​មូលដ្ឋាន​ម្តង​ក្នុង មួយ​ខែ ហើយ​បើ​អ្វី​មួយ​កើត​ឡើង​ខុស​ពី​ធម្មតា ពួក​គេ​ត្រូវ​រាយការណ៍​រឿង​នេះ​ទៅ​ចៅក្រម​ស៊ើប​សួរ»។

ទោះ​ជា​យ៉ាង​ណា លោក​មិន​បញ្ជាក់​ថា តើ​លោក Polonsky បាន​បំពេញ​តាម​ការ​ទាមទារ​ទាំង​នេះ​ឬ​យ៉ាង​ណា​ទេ?

ចៅក្រម​ស៊ើប​សួរ លោក ស លីណា មិន​អាច​ទាក់​ទង​បាន​ទេ រីឯ​ប្រធាន​តុលាការ​លោក ម៉ុង មុនី ចរិយា បាន​និយាយ​ថា គាត់ មិន​បាន​ដឹង​ថា លោក Polonsky បាន​ចាក​ចេញ​ពី​ប្រទេស​ទេ​។

ទោះ​ជា​យ៉ាង​ណា​ក៏​ដោយ ក៏​លោក កែវ វណ្ណថន ប្រធាន​នាយកដ្ឋាន​ប៉ូលិស​អន្តរជាតិ​នៅ​ក្រសួង​មហាផ្ទៃ​មិន​បាន បញ្ជាក់​ឲ្យ​ដឹង​ថា​សេដ្ឋី រុស្ស៊ី លោក Polonsky កំពុង​នៅ​ទីណា​ទេ ប៉ុន្តែ​ថា លោក មិន​ទាន់​ទទួល​បាន​ការ​ជូន​ដំណឹង​ពី​ប៉ូលិស​អន្តរជាតិ​ពាក់​ព័ន្ធ​នឹង​ការ​ចោទ​ប្រកាន់​រូប​គាត់​នៅ​ក្នុង​រុស្ស៊ី​នៅ​ឡើយ។

អ្នក​នាំ​ពាក្យ​របស់​អ្នក​ជំនួញ​នេះ កាល​ពី​ម្សិលមិញ​បាន​បដិសេធ​មិន​ធ្វើ​អត្ថាធិប្បាយ​ទាក់​ទិន​នឹង​ព័ត៌មាន​នេះ​ទេ៕ NR

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។