កោះកុងៈ សាលាដំបូងខេត្តកោះកុង កាលពីថ្ងៃទី ២៥ ខែ មេសា បានចេញដីកាកោះហៅលោក អាឡិច ហ្គន់សាឡេស ដេវិតសុន ជនជាតិអេស្ប៉ាញ ដែលជាស្ថាបនិកចលនាមាតាធម្មជាតិ ឱ្យចូលមកបំភ្លឺនៅក្នុងសវនាការនៅថ្ងៃទី ៣០ ខែ កក្កដា វេលាម៉ោង ៨ និង ៣០ នាទីព្រឹកជាកំហិត។
យោងតាមដីកាកោះហៅដែលចុះហត្ថលេខាដោយតំណាងអយ្យការ លោក អុីវ ត្រាយ ដែលភ្នំពេញប៉ុស្តិ៍ទើបទទួលបានកាលពីម្សិលមិញ បានឱ្យដឹងថា លោក អាឡិច ហ្គន់សាឡេស ដេវិតសុន ត្រូវបានកោះហៅឱ្យចូលបំភ្លឺនាពេលសវនាការ រឿងរបស់លោកដែលជាប់ចោទពីបទ «សមគំនិត ក្នុងអំពើគំរាមកំហែងថា នឹងធ្វើឱ្យខូចខាតដែលភ្ជាប់នូវបញ្ហាអ្វីមួយ» ដែលបានប្រព្រឹត្តនៅចំណុចព្រែកអណ្តូងទឹក ឃុំអណ្តូងទឹក ស្រុកបទុមសាគរ ខេត្តកោះកុង កាលពីថ្ងៃទី ២៦ ដល់ថ្ងៃទី ២៨ ខែ កក្កដា ឆ្នាំ ២០១៥ និងថ្ងៃទី ១២ ខែ សីហា ឆ្នាំ ២០១៥ ជាបទល្មើសដែលមានបញ្ញត្តិឱ្យផ្តន្ទាទោសតាមមាត្រា ២៩ និងមាត្រា ៤២៤ នៃក្រមព្រហ្មទណ្ឌ។
លោក អាឡិច ហ្គន់សាឡេស ត្រូវបានបញ្ជូនចេញពីប្រទេស កម្ពុជា កាលពីអំឡុងឆ្នាំ ២០១៥ បន្ទាប់ពីទិដ្ឋាការរបស់លោកបានហួសពេលកំណត់។
លោក អាឡិច ហ្គន់សាឡេស ដេវិតសុន បានប្រាប់ភ្នំពេញប៉ុស្តិ៍តាម WhatsApp ពីសហរដ្ឋអាមេរិកកាលពីម្សិលមិញថា មូលហេតុដែលតុលាការចេញដីកាកោះហៅរូបលោក គឺដោយសារលោកបានស្នើសុំតាមរយៈមេធាវីឱ្យតុលាការគោរពនីតិវិធី គោរពច្បាប់ និងគោរពសិទ្ធិរបស់លោកក្នុងនាមជាជនជាប់ចោទ។
លោក អាឡិច ដែលចេះនិយាយភាសាខ្មែរយ៉ាងច្បាស់នោះ បានបញ្ជាក់ថា៖ «ខ្ញុំមានសិទ្ធិការពារខ្លួននៅក្នុងសវនាការ យោងតាមច្បាប់ យោងតាមកតិកាសញ្ញាអន្តរជាតិ យោងតាមរដ្ឋធម្មនុញ្ញផង និងយោងតាមច្បាប់នៃប្រទេស កម្ពុជា ហើយមេធាវីខ្ញុំបានព្យាយាមរយៈពេលជាង ២ ឆ្នាំកន្លះកន្លងមក ពីព្រោះអីតាំងពីខែ ២ ខែ ៣ ឆ្នាំ ២០១៦ រហូតបច្ចុប្បន្នហ្នឹង។ អ៊ីចឹងនេះគឺជាលទ្ធផលនៃការខិតខំប្រឹងប្រែងរបស់មេធារីរបស់ខ្ញុំ ដែលខ្ញុំបានប្រាប់គាត់ថា ជំរុញឱ្យតុលាការហ្នឹងគោរពនីតិវិធី គោរពសិទ្ធិរបស់ខ្ញុំផង»។
លោក អ៊ុន សុវណ្ណធានី អ្នកនាំពាក្យនៃអយ្យការសាលាដំបូងខេត្តកោះកុង បានប្រាប់ភ្នំពេញប៉ុស្តិ៍កាលពី ម្សិលមិញថា ការកោះហៅនេះដោយសារតែរឿងគាត់ត្រូវបានដាក់ឱ្យជំនុំជម្រះ។ ជនជាប់ចោទមានសិទ្ធិទទួលបានដំណឹងអំពីសវនាការ។
លោកបញ្ជាក់ថា៖ «ដូច្នេះ ទើបតុលាការចេញដីកាកោះហៅជនជាប់ចោទ ដើម្បីជូនដំណឹងអំពីកាលបរិច្ឆេទនៃការជំនុំជម្រះ»។
លោក អាឡិច ហ្គន់សាឡេស ដេវិតសុន បញ្ជាក់ថា ប្រសិនបើរដ្ឋាភិបាលកម្ពុជាផ្តល់វីសាឲ្យលោកអាចចូលមកប្រទេស កម្ពុជា វិញបាននោះ លោកនឹងវិលមកចូលរួមសវនាការទៅទៅតាមការកោះហៅរបស់សាលាដំបូងខេត្តកោះកុង ក្នុងនាមជាសកម្មជនបរិស្ថាន និងក្នុងនាមជាមនុស្សម្នាក់ដែលស្រឡាញ់ប្រទេស កម្ពុជា៕