The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ កំពង់ស្ពឺ មិន​ឃុំ​សមាជិក​សហជីព​ដែល​កោះ​ទៅ​សាកសួរ​ទេ

តុលាការ កំពង់ស្ពឺ មិន​ឃុំ​សមាជិក​សហជីព​ដែល​កោះ​ទៅ​សាកសួរ​ទេ

តុលាការ កំពង់ស្ពឺ មិន​ឃុំ​សមាជិក​សហជីព​ដែល​កោះ​ទៅ​សាកសួរ​ទេ

កំពង់ស្ពឺៈ សាលា​ដំបូង​ខេត្ត កំពង់ស្ពឺ បាន​សម្រេច​មិន​ឃុំ​ខ្លួន​សមាជិក​ពីរ​រូប​នៃ សហជីព​សេរី​កម្មករ (FTU) ដែល​ត្រូវ​ចោទ​ប្រកាន់​ពី​បទ​ញុះ​ញង់​និង​បំផ្លាញ​ទ្រព្យ​សម្បត្តិ ក្រុមហ៊ុន សាប្រ៊ីណា ពី​ខែ មិថុនា ក្នុង​ស្រុក សំរោងទង ទេ ក្នុង​ការ​សាកសួរ កាល​ពី​ថ្ងៃ​ម្សិលមិញ។

លោក ជី សាក់ឡា អាយុ ៣៣ ឆ្នាំ អនុ​ប្រធាន​សហជីព FTU ប្រចាំ​រោងចក្រ សាប្រ៊ីណា ដែល​ក្រុមហ៊ុន​ព្យួរ​ការងារ​និង​ត្រូវ​ចោទ​ពី​បទ​ញុះញង់ និង​បំផ្លាញ​ទ្រព្យ​សម្បត្តិ​ក្រុមហ៊ុន​បាន​ឲ្យ​ដឹង​ថា គាត់​ជា​អ្នក ទី១ ដែល​បាន​បង្ហាញ​មុខ​នៅ​តុលាការ​ក្នុង​ចំណោម​សមាជិក ៨ រូប ដែល​តុលាការ​ចេញ​ដីកា​កោះ​ហៅ​សាក​សួរ។ គាត់​បន្ត​ថា៖ «ខ្ញុំ​បាន​ទៅ​ជួប​និង​ឆ្លើយ​សំណួរ​ចៅក្រម​ស៊ើប​សួរ​រួច​ហើយ កាល​ពី​ព្រឹក​មិញ​នេះ ហើយ​តុលាការ​មិន​ឃុំ​ខ្លួន​ខ្ញុំ​ទេ ប៉ុន្តែ​បាន​ដាក់​ឲ្យ​ស្ថិត​ក្រោម​ការ​ត្រួត​ពិនិត្យ​របស់​តុលាការ»។

លោក ជី សាក់ឡា បន្ថែម​ថា តុលាការ​មិន​ឃុំ​គាត់​មែន ប៉ុន្តែ​គាត់​គ្មាន​សិទ្ធិ​ប្ដូរ​លំនៅ​តាម​ចិត្ត​ចង់​នោះ​ឡើយ។

លោក​បញ្ជាក់​ថា៖ «បើ​សិន​ខ្ញុំ​មិន​គោរព​ការ​សម្រេច​របស់​តុលាការ​ទេ ខ្ញុំ​នឹង​ត្រូវ​ចាប់​ខ្លួន។ ខ្ញុំ​ខក​ចិត្ត​នៅ​ពេល​តុលាការ​សម្រេច​បែប​នេះ ព្រោះ​ហាក់​ដូចជា​គេ​ឃុំ​ខ្លួន​ដូច្នោះ​ដែរ​។ ខ្ញុំ​ចង់​ឲ្យ​តុលាការ​បញ្ចប់​ករណី​នេះ​ឲ្យ​បាន​ឆាប់​តាម​ដែល​អាច​ធ្វើ​បាន​ដើម្បី​រក​យុត្តិធម៌​ដល់​ខ្ញុំ និង​ជន​ត្រូវ​ចោទ​ផ្សេង​ទៀត»។

កាល​ពី​ខែ​មុន តុលាការ​ខេត្ត កំពង់ស្ពឺ បាន​ចេញ​ដីកា​កោះ​ហៅ​មនុស្ស ៨ នាក់​ដែល​ត្រូវ​ចោទ ថា បាន​ពាក់​ព័ន្ធ​នឹង​ការ​ប៉ះ​ទង្គិច​ហិង្សា​ជាមួយ​អាជ្ញាធរ​ក្នុង​កូដកម្ម​នៅ​មុខ​ក្រុមហ៊ុន​ដែល​ផ្គត់​ផ្គង់​ឲ្យ​ក្រុមហ៊ុន Nike នៅ​ខេត្ត កំពង់ស្ពឺ ដើម្បី​សាក​សួរ ខណៈ​កម្មករ ៨ នាក់​ទៀត​ត្រូវ​ចាប់​ខ្លួន​នៅ​កន្លែង​កើត​ហេតុ និង​កំពុង​ឃុំ​ខ្លួន​រង់ចាំ​សវនាការ​នៅ​ឡើយ។

កម្មករ ៨ នាក់​នេះ គឺជា​អ្នក​ចុង​ក្រោយ​ដែល​ត្រូវ​ប្រឈម​នឹង​ការ​ចោទ​ប្រកាន់​មួយ​ចំនួន បន្ទាប់​ពី​បាតុករ​បាន​ប្រើ​ដំបង និង​ដុំ​ថ្ម​គប់​គ្នា​ជាមួយ​នគរបាល និង​កម្មករ​ខ្លះ​ទៀត ដែល​នៅ​ធ្វើ​ការ​ក្នុង​រោងចក្រ សាប្រ៊ីណា នេះ។

ការ​ប៉ះ​ទង្គិច​គ្នា​បាន​បណ្ដាល​ឲ្យ​ខូច​ខាត​ទ្រព្យ​សម្បត្តិ​រោងចក្រ​ជាច្រើន និង​ធ្វើ​ឲ្យ​មនុស្ស​យ៉ាង​តិច ២៣ នាក់ រង​របួស​ក្នុង​នោះ​មាន​មន្ត្រី​នគរបាល​ម្នាក់​ផង។

លោក សាយ សំបូរ អាយុ ២៧ ឆ្នាំ ដែល​បង្ហាញ​ខ្លួន​នៅ​តុលាការ​ពី​ម្សិលមិញ​ជាមួយ​លោក ជី សាក់ឡា ក៏​ត្រូវ​តុលាការ​សម្រេច​ដូចគ្នា​នេះ​ដែរ។

យោង​ដីកា​សម្រេច​ចេញ​ដោយ​លោក ឆឹម ឫទ្ធី ចៅក្រម​ស៊ើប​សួរ​សាលា​ដំបូង​ខេត្ត កំពង់ស្ពឺ ដែល​កាន់​សំណុំ​រឿង​នេះ បាន​ឲ្យ​ដឹង​ថា តុលាការ​បាន​អនុញ្ញាត​ឲ្យ​ជន​សង្ស័យ​រួច​ពី​ការ​ឃុំ​ខ្លួន​បណ្តោះ​អាសន្ន ប៉ុន្តែ ពួក​គេ​ត្រូវ​ស្ថិត​នៅ​ក្រោម​ការ​ត្រួត​ពិនិត្យ​របស់​តុលាការ។

លោក​ថា ជន​ត្រូវ​ចោទ​ជាប់​កាតព្វកិច្ច​នៃ​ការ​ត្រួត​ពិនិត្យ​តាម​ផ្លូវ​តុលាការ តាម​មាត្រា ២២៣ នៃ​ក្រម​នីតិវិធី​ព្រហ្មទណ្ឌ ដោយ​មិន​ត្រូវ​ផ្លាស់​ប្តូរ​លំនៅឋាន ដោយ​គ្មាន​ការ​អនុញ្ញាត​ពី​ចៅក្រម​ស៊ើប​សួរ និង​ត្រូវ​បង្ហាញ​ខ្លួន​តាម​ការ​កោះ​ហៅ​របស់​ចៅក្រម​ស៊ើប​សួរ។

ដីកា បន្ត​ថា ប្រធាន​ប៉ុស្តិ៍​នៅ​ក្នុង​មូលដ្ឋាន ជា​អ្នក​ត្រូវ​អនុវត្ត​តាម​ដីកា​សម្រេច​នេះ និង​រាយការណ៍​ឲ្យ​ចៅក្រម​ស៊ើប​សួរ ទៀង​ទាត់ ក្នុង​ករណី​ដែល​ជន​ត្រូវ​ចោទ​គេច​វេះ​ដោយ​ចេតនា មិន​អនុវត្ត​តាម​ដីកា​សម្រេច​នេះ។

ក្នុង​ករណី​ដែល​ជន​ត្រូវ​ចោទ​គេច​វេះ​ដោយ​ចេតនា​និង​មិន​អនុវត្ត​តាម​ចៅក្រម​ស៊ើប​សួរ​នឹង​ចាប់​ឃុំ​ខ្លួន​ជន​ត្រូវ​ចោទ​ឡើង​វិញ ដោយ​អនុវត្ត​តាម​មាត្រា ២៣០ នៃ​ក្រម​នីតិវិធី​ព្រហ្មទណ្ឌ។

សមាជិក FTU ម្នាក់​ទៀត​ឈ្មោះ ស៊ុន វណ្ណនី អាយុ ៣៣ ឆ្នាំ​នឹង​បង្ហាញ​មុខ​នៅ​តុលាការ​នេះ​ដើម្បី​សាក​សួរ​ដូច​គ្នា​ដែរ នៅ​ព្រឹក​ថ្ងៃ​ព្រហស្បតិ៍​នេះ៕ PN

អត្ថបទគួរចាប់អារម្មណ៍