.jpg)
បុរសម្នាក់ត្រូវបានសមត្ថកិច្ចចាប់ខ្លួន ក្រោយបង្ហោះរូបអាក្រាតនារីដែលជាសង្សារ។ រូបថត នគរបាល
កណ្ដាលៈ បុរសម្នាក់ត្រូវបានតុលាការខេត្តកណ្ដាលឃុំខ្លួនក្នុងពន្ធនាគារខេត្ត ១ ថ្ងៃ ក្រោយពីសមត្ថកិច្ចសហការចាប់ខ្លួនកាលពីថ្ងៃទី ២០ កុម្ភៈ នៅភូមិព្រែកជ្រៃ សង្កាត់-ខណ្ឌដង្កោ រាជធានីភ្នំពេញពាក់ព័ន្ធករណីបង្ហោះរូបអាក្រាតកាយ និងគំរាមហែកកេរ្តិ៍នារីជាសង្សារ ។
លោក សូ សារិន អ្នកនាំពាក្យសាលាដំបូងខេត្តកណ្តាលបានប្រាប់កាលពីថ្ងៃអាទិត្យថា ជនសង្ស័យឈ្មោះ អ៊ឹម អូន អាយុ ៤០ ឆ្នាំ ត្រូវបានលោក ទិន សុចិត្រា ព្រះរាជអាជ្ញារងនៃសាលាដំបូងខេត្តកណ្តាលចោទពាក់ព័ន្ធនឹងបទល្មើសបង្ហោះរូបអាក្រាត ហើយចៅក្រមស៊ើបក៏សម្រេចឃុំខ្លួនក្នុងពន្ធនាគារខេត្តកាលពីថ្ងៃទី ២១ ខែកុម្ភៈ ឆ្នាំ ២០២០។
លោកថា៖ «បុរសនោះត្រូវចោទពីបទគំរាមកំហែងហែកកេរ្តិ៍ និងបទចែកចាយរូបភាពអាសអាភាស ប៉ុន្តែខ្ញុំមិនចាំមាត្រាទេ»។
ក៏ប៉ុន្តែតាមបទចោទទាំងនេះគឺ ១ ផ្អែកតាមក្រមព្រហ្មទណ្ឌត្រង់មាត្រា ៣៧២ និង ១ ទៀតផ្នែកតាមច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទមាត្រា ៣៩។ តាមមាត្រា ៣៧២ នៃក្រមព្រហ្មទណ្ឌ ប្រសិនបើតុលាការរកឃើញថា មានកំហុសមែននោះនឹងត្រូវប្រឈមការជាប់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ៤ លានទៅ ១០ លានរៀលផង។ រីមាត្រា ៣៩ នៃច្បាប់ខាងលើត្រូវផ្តន្ទាទោសពី ១ ខែដល់ ១ ឆ្នាំ និងពិន័យពី ២ សែនរៀលទៅ ២ លានរៀល។
លោក ម៉ែន ច័ន្ទរិទ្ធ អធិការនគរបាលស្រុកកណ្តាលស្ទឹងបានថ្លែងថា ការចាប់ខ្លួននេះ បន្ទាប់ពីនារីរងគ្រោះបានប្តឹងលោកហើយលោកបានរាយការណ៍បន្តទៅថ្នាក់ខេត្ត។
លោកប្រាប់ថា៖ «ពេលនារីរងគ្រោះប្រាប់ខ្ញុំភ្លាម ខ្ញុំបានរាយការណ៍ទៅថ្នាក់ខេត្តហើយខាងស្នងការនគរបាលខេត្តបានឲ្យខ្ញុំបញ្ជូននាងទៅដើម្បីសាកសួរ។ ខ្ញុំមិនបានសួរនាងផ្ទាល់ទេ»។
លោកប្រាប់ថា នារីរងគ្រោះមានអាយុ ២២ ឆ្នាំមានលំនៅស្រុកកណ្តាលស្ទឹងខេត្តកណ្តាល។ រីឯជនសង្ស័យស្នាក់នៅបន្ទប់ជួល ម្តុំរោងចក្រព្រែកជ្រៃក្នុងភូមិព្រែកជ្រៃ សង្កាត់ដង្កោ ខណ្ឌដង្កោរាជធានីភ្នំពេញ។ ការចាប់ខ្លួននេះមានការសហការជាមួយសមត្ថកិច្ចរាជធានីភ្នំពេញ។
មន្ត្រីនគរបាលខេត្តកណ្ដាលមួយរូបសុំមិនបញ្ចេញឈ្មោះថ្លែងថា នារីរងគ្រោះ និងជនសង្ស័យមានទំនាក់ទំនងស្នេហាគ្នាតាំងពីឆ្នាំ ២០១៧ ខណៈធ្វើការជាមួយគ្នាក្នុងរោងចក្រកាត់ដេរនៅភូមិព្រែកជ្រៃ សង្កាត់-ខណ្ឌដង្កោ។ ការបណ្ដោយខ្លួនឲ្យថតរូបអាក្រាតពេលរួមភេទម្ដងៗ ដោយសារនារីរងគ្រោះទុកចិត្ត និងគិតថា គង់តែជាប្ដីប្រពន្ធនឹងគ្នា។
ប៉ុន្តែដល់ឆ្នាំ ២០១៩ នារីរងគ្រោះបានស៊ើបដឹងថា ជនសង្ស័យមានប្រពន្ធ និងកូន ២ នាក់ ទើបនាងភ្ជាប់ពាក្យជាមួយបុរសផ្សេង។
លោកថាលុះ ២ ថ្ងៃ ក្រោយមកក៏ដឹងដល់ជនសង្ស័យ ហើយគេបានប្រាប់នារីរងគ្រោះមិនឲ្យរៀបការជាមួយអ្នកផ្សេងទេ បើមិនដូច្នោះគេនឹងធ្វើឲ្យនាងសងបណ្ណាការបុរសថ្មីនោះ។ មិនតែប៉ុណ្ណោះជនសង្ស័យបានគំរាមប៉ងសម្លាប់នារីរងគ្រោះជាច្រើនលើក។ បន្ទាប់ពីគំរាមមិនអស់ចិត្ត ជនសង្ស័យបានផ្ញើរូបអាក្រាតនារីរងគ្រោះទៅគូដណ្តឹង និងចែករំលែករូបភាពនោះបន្តទៅបងប្អូននារីរងគ្រោះជាច្រើននាក់ទៀតរហូតទាល់តែបុរសជាគូដណ្តឹងសុំផ្តាច់ពាក្យនៅថ្ងៃទី ៥ ខែកុម្ភៈមុនថ្ងៃរៀបការចូលមកដល់នៅថ្ងៃទី ២១ ខែកុម្ភ:ឆ្នាំនេះ។
លោកបានបន្ដថា ដោយសារតែបញ្ហានេះនារីរងគ្រោះក៏បានប្ដឹងទៅកាន់សមត្ថកិច្ចរហូតឈានដល់ការឃាត់ខ្លួនជនសង្ស័យបាននៅក្នុងរោងចក្រមួយកន្លែងក្នុងសង្កាត់-ខណ្ឌដង្កោ រាជធានីភ្នំពេញតែម្ដង៕
