ភ្នំពេញៈ សាលាដំបូងរាជធានីភ្នំពេញពីថ្ងៃទី ៩ ឧសភា បានសម្រេចឃុំខ្លួនអតីតអគ្គលេខាធិការរងសហព័ន្ធកីឡាបាល់ទាត់កម្ពុជាម្នាក់ក្នុងពន្ធនាគារព្រៃសពាក់ព័ន្ធអំពើពុករលួយ បន្ទាប់ពីអង្គភាពប្រឆាំងអំពើពុករលួយហៅសួរ ហើយបញ្ជូនខ្លួនទៅសាលាដំបូងរាជធានីភ្នំពេញកាលពីថ្ងៃទី ៨ ឧសភា។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញបានឲ្យដឹងតាមតេឡេក្រាមពីថ្ងៃទី ៩ ខែឧសភា ថា ករណីជនជាប់ចោទឈ្មោះ ម៉ៃ តុលា ត្រូវបានចៅក្រមស៊ើបសួរលោក រស់ ពិសិដ្ឋ សម្រេចចោទប្រកាន់ពីបទរំលោភទំនុកចិត្តដោយអភិបាលតាមបញ្ញត្តិមាត្រា ៣៩៣ នៃក្រមព្រហ្មទណ្ឌ និងចេញដីកាឃុំខ្លួនបណ្តោះអាសន្ននៅពន្ធនាគារពីថ្ងៃទី ៩ ឧសភា។
តាមមាត្រា ៣៩៣ នៃក្រមព្រហ្មទណ្ឌនេះ ប្រសិនបើតុលាការរកឃើញថា ជនជាប់ចោទពិតជាបានប្រព្រឹត្តដូចការចោទមែននោះនឹងត្រូវប្រឈមការផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ចូលថវិការដ្ឋពី ៤ លានទៅ ១០ លានរៀល។
យោងតាមសេចក្តីប្រកាសរបស់សហព័ន្ធកីឡាបាល់ទាត់កម្ពុជា (FFC) ដែលបានបង្ហោះតាមហ្វេសប៊ុកពីថ្ងៃទី ៥ ឧសភាថា សហព័ន្ធកីឡាបាល់ទាត់កម្ពុជា (FFC) បានសម្រេចព្យួរមន្ត្រីសហព័ន្ធចំនួន ៤ រូបរួមមាន លោក ម៉ៃ តុលា, លោក ឆាំង ពិសិដ្ឋ, លោក ទុយ វិច្ឆិកា និងលោក គល់ សុភារម្យ មិនឲ្យប៉ះពាល់ជាមួយសកម្មភាពកីឡា ១ ជីវិត។ ព្រោះថាមន្ត្រីរបស់សហព័ន្ធកីឡាបាល់ទាត់កម្ពុជាទាំង ៤ រូបបានប្រព្រឹត្តកំហុសធ្ងន់ធ្ងរ ផ្ទុយនឹងក្រមសីលធម៌ និងវិន័យរបស់សហព័ន្ធកីឡាបាល់ទាត់កម្ពុជា។ ចំណែកសំណុំរឿងរបស់លោក ម៉ៃ តុលា ត្រូវបានបញ្ជូនទៅតុលាការ។
គួររំឭកថា លោក ម៉ៃ តុលា ត្រូវបានអង្គភាពប្រឆាំងអំពើពុករលួយ (ACU) សហការជាមួយអាវុធហត្ថលើផ្ទៃប្រទេសឃាត់ខ្លួនកាលពីថ្ងៃទី ៧ ខែឧសភា ឆ្នាំ ២០២០ ដោយសង្ស័យថាមានការពាក់ព័ន្ធនឹងអំពើពុករលួយក្នុងសហព័ន្ធកីឡា។ បន្ទាប់ពីឃាត់ខ្លួនបាន ១ ថ្ងៃលោក ម៉ៃ តុលា ត្រូវបានអង្គភាពប្រឆាំងអំពើពុករលួយបញ្ជូនទៅតុលាការរាជធានី។
ទោះយ៉ាងណា ការព្យួរមុខតំណែងមន្ត្រីទាំង ៤ រូបនេះបើតាមសេចក្ដីប្រកាស គឺខាងសហព័ន្ធកីឡាបាល់ទាត់កម្ពុជាមិនបានបញ្ជាក់ថា ជាប់ពាក់ព័ន្ធបទល្មើសអ្វីខ្លះនោះទេ។ ប៉ុន្តែទំហំទឹកប្រាក់ដែលត្រូវបានរកឃើញកិបកេងក្នុងការប្រកួតគឺមានប្រមាណ ៥៩ ៧៣៦ ដុល្លារ គិតចាប់តាំងពីឆ្នាំ ២០១៣ មកទល់នឹងឆ្នាំ ២០១៩៕