The Phnom Penh Post Search

Search form




Logo of Phnom Penh Post newspaper Phnom Penh Post - តូច​ចិត្ត​គ្រួសារ​ក្រីក្រ​ទៅ​លោត​សម្លាប់​ខ្លួន​ពី​លើ​ព្រះវិហារ




តូច​ចិត្ត​គ្រួសារ​ក្រីក្រ​ទៅ​លោត​សម្លាប់​ខ្លួន​ពី​លើ​ព្រះវិហារ

តូច​ចិត្ត​គ្រួសារ​ក្រីក្រ​ទៅ​លោត​សម្លាប់​ខ្លួន​ពី​លើ​ព្រះវិហារ

ភ្នំពេញៈ បុរស​ចំណាស់​ម្នាក់ បាន​ធ្វើ​អត្តឃាត ដោយ​លោត​សម្លាប់​ខ្លួន ពី​លើ​ដំបូល​ព្រះវិហារ​វត្ត ជ្រុង​រមាស ក្នុង​ស្រុក​កោះធំ ដោយ​សារ​តែ​តូច​ចិត្ត​នឹង​គ្រួសារ​ក្រីក្រ​ខ្លាំង​ពេក។

លោក ធន សារឿន អធិការ​ស្រុក​កោះធំ បាន​ឲ្យ​ដឹងថា បុរស​ធ្វើ​អត្តឃាត​ឈ្មោះ បេ ឈឺន អាយុ ៦៥ ឆ្នាំ មាន​លំនៅ​ភូមិ​ពោធិ៍​ទន្លេ ឃុំ​កោះធំ ស្រុក​កោះធំ បាន​ទៅ​លោត​សម្លាប់​ខ្លួន នៅ​ភូមិ​កំពង់កុង​កាលពី​ថ្ងៃ​អង្គារ។

នៅ​មុន​ពេល​ធ្វើ​អត្តឃាត បុរស​រូប​នេះ បាន​ប្រាប់​អ្នក​ជិត​ខាង​ថា គាត់​ជិះ​កង់​ទៅ​ផ្សារ កំពង់កុង ដែល​នៅ​រំលង​ពី​ផ្ទះ​របស់​គាត់​ពីរ​ភូមិ​ដើម្បី​ទិញ​ថ្នាំ​ក្រពះ។

លោក ធន សារឿន បាន​ស្រង់​សម្តី ពី​តាជី យាយជី​ក្នុង​វត្ត​ជ្រុង​រមាស​ថា នៅ​មុន​ពេល​កើត​ហេតុ គេ​ឃើញ​ជន​រងគ្រោះ ដើរ​ចូល​ទៅ​ក្នុង​ព្រះវិហារ ដោយ​មាន​បង់ក​ក្រមា ប៉ុន្ដែ​អ្នក​នៅ​ក្នុង​វត្ត មិន​បាន​ចាប់​អារម្មណ៍​ថា គាត់​ឡើង​ទៅ​លើ​ព្រះវិហារ​ដើម្បី​លោត​សម្លាប់​ខ្លួន​នោះ​ទេ។ តែ​បន្ទាប់​មក ក៏​ឃើញ​គាត់​ឈរ​នៅ​លើ​ពិតាន​ព្រះវិហារ បែរ​មុខ​ទៅ​ទិស​ខាង​លិច និង​បាន​លើក​ដៃ​ប្រណម្យ​ឡើង​លើ​ចំនួន​៣​ដង ដែល​ពេល​នោះ​គេ​នឹក​ស្មាន​ថា គាត់​បន់ស្រន់​អ្វី​ម្យ៉ាង​តាម​បែប​សាសនា ហើយ​ទាំង​អស់​គ្នា​ក៏​នៅ​តែ​មិន​ចាប់​អារម្មណ៍ រួច​ក៏​ស្រាប់​តែ​ឃើញ​គាត់​លោត​តែ​ម្តង។

លោក​អធិការ​ស្រុក​កោះធំ​បាន​ឲ្យ​ដឹង​ថា៖ «ការ​ធ្វើ​អត្តឃាត​របស់​គាត់ គឺ​ផ្តើម​ចេញ​ពី​គ្រួសារ​ក្រីក្រ ព្រោះ​ក្នុង​គ្រួសារ​គាត់ មាន​តែ​កូន​ស្រី​ចិញ្ចឹម​ម្នាក់ និង​កូន​ប្រុស​បង្កើត​ម្នាក់​បួស​ជា​សង្ឃ រីឯ​ប្រពន្ធ​មាន​ជំងឺ​រ៉ាំរ៉ៃ ដេក​តែ​លើ​កន្ទេល និង​រស់​អាស្រ័យ​ដោយ​អ្នក​ភូមិ​ឧបត្ថម្ភ​ខ្លះ»។

លោក​ហុង សុខលី មន្ត្រី​នគរបាល​ព្រហ្មទណ្ឌ​ស្រុក​កោះ​ធំ បាន​ឲ្យ​ដឹង​ថា តាម​សាក្សី ដែល​បាន​ឃើញ និង​ការ​ធ្វើ​កោសល្យ​វិច័យ របស់​សមត្ថកិច្ច ឃើញ​ថា បុរស​រូប​នោះ​បាន​លោត​ធ្វើ​អត្តឃាត​ខ្លួន​ឯង​ពិត​មែន៕

អត្ថបទគួរចាប់អារម្មណ៍