ភ្នំពេញៈ លោក Daniel Craig តារាសម្ដែងភាពយន្តរបស់ចក្រភពអង់គ្លេសដ៏ល្បីល្បាញដែលគេស្គាល់ថា ជា ជេមស៍ ប៊ន ០០៧ បានអំពាវនាវពីចុងសប្ដាហ៍មុន ដោយស្នើឲ្យសហគមន៍អន្តរជាតិចូលរួមជាមួយរដ្ឋាភិបាលកម្ពុជាដើម្បីធ្វើយ៉ាងណាឱ្យសម្រេចបាននូវកម្ពុជាគ្មានគ្រាប់មីននៅក្នុងឆ្នាំ ២០២៥។
លោក Craig គឺជាអ្នកតស៊ូមតិសកលរបស់អង្គការសហប្រជាជាតិសម្រាប់ការលុបបំបាត់គ្រាន់មីន និងកាកសំណល់សង្គ្រាម។ លោកបានចូលរួមការបើកសម្ពោធយុទ្ធនាការទីលានសុវត្ថិភាពដំបូងនៅកម្ពុជានៅភូមិមួយក្នុងខេត្តបាត់ដំបងរបស់អង្គការ UNDP កាលពីថ្ងៃទី ២២ មករា ដែលធ្វើឡើងតាមអនឡាញ។ យុទ្ធនាការនេះធ្វើឡើងក្នុងគោលបំណងប្រែក្លាយទីវាលដែលមានមីនឱ្យទៅជាវាលដែលអាចរត់លេងដោយសេរី និងសុវត្ថិភាព។
លោក Craig បានថ្លែងដូច្នេះថា៖ «ទីលានសុវត្ថិភាព គឺជាមូលដ្ឋាននៃសិទ្ធិមនុស្ស។ ខ្ញុំដឹងថា នៅមានការងារជាច្រើនទៀតដែលត្រូវសម្រេចឲ្យបានដើម្បីឲ្យកម្ពុជាគ្មានគ្រាប់មីននៅឆ្នាំ ២០២៥។ ប៉ុន្តែទាំងអស់នេះ មិនអាចសម្រេចបានទេ បើគ្មានការប្ដេជ្ញាចិត្តជានិរន្តរ៍ និងធនធានបន្ថែមទៀត។ ពេលវេលាកំណត់នៅមិនឆ្ងាយទេ ហើយពេលនេះវាជាពេលដែលសហគមន៍អន្តរជាតិត្រូវតែចូលរួមជាមួយរដ្ឋាភិបាលកម្ពុជា និងការប្ដេជ្ញាចិត្តរបស់ពួកគេ»។
លោកបានបន្តថា៖ «សូមចូលរួមជាមួយខ្ញុំដើម្បីគាំទ្រដល់អាជ្ញាធរមីន និងអង្គការសហប្រជាជាតិ ដើម្បីធ្វើឲ្យសម្រេចថា កិច្ចការងារនេះត្រូវសម្រេចបាន និងគាំទ្រដល់បុរស ស្ត្រី ដែលនៅជួរមុខដើម្បីឲ្យពួកគេធ្វើកិច្ចការដ៏មានសារៈសំខាន់នេះ។ ខ្ញុំសូមថ្លែងអំណរគុណ និងការដឹងគុណដល់ពួកគេ និងបួងសួងឲ្យពួកគេមានសុខភាពល្អ សុវត្ថិភាព និងសុភមង្គលនៅឆ្នាំ ២០២១ នេះ»។
លោក លី ធុជ អនុប្រធានទី ១ អាជ្ញាធរមីនបានថ្លែងនៅក្នុងពិធីសម្ពោធយុទ្ធនាការនោះថា ចាប់ពីឆ្នាំ ១៩៦០ ដល់ឆ្នាំ ១៩៩៨ កម្ពុជាបានជួបនូវជម្លោះក្នុងស្រុក និងក្នុងតំបន់ជាច្រើន ដែលបន្សល់ទុកនូវគ្រាប់មីន និងគ្រាប់កាកសំណល់ពីសង្គ្រាមជាច្រើននៅទូទាំងប្រទេស។
បើតាមលោក លី ធុជ គ្រាប់មីន និងគ្រាប់មិនទាន់ផ្ទុះបានឆក់យកជីវិតមនុស្សជិត ២ ម៉ឺននាក់ និងបង្ករបួសដល់មនុស្សជាង ៤ ម៉ឺន ៥ ពាន់នាក់ផ្សេងទៀត បង្កការឈឺចាប់ដល់មនុស្សដែលមិនធ្លាប់មានដល់ក្រុមគ្រួសារ និងសហគមន៍របស់ពួកគេ។ ជាង ២៧ ឆ្នាំមកនេះ រដ្ឋាភិបាលកម្ពុជាបានចំណាយជាង ១៦០ លានដុល្លារ សម្រាប់ការបោសសម្អាតគ្រាប់មីន ហើយសហគមន៍ម្ចាស់ជំនួយបានចូលរួមចំណាយជាង ២១៦ លានដុល្លារ។
លោកបានបន្តថា កម្ពុជាជួបបញ្ហាប្រឈមផ្នែកប្រតិបត្តិការ និងហិរញ្ញវត្ថុហើយកម្ពុជាអំពាវនាវសុំការគាំទ្រពីអន្តរជាតិ ដើម្បីធ្វើឱ្យព្រះរាជាណាចក្រមួយនេះ អាចសម្រេចបាននូវគោលដៅគ្មានគ្រាប់មីននៅឆ្នាំ ២០២៥។ កម្ពុជាមានដីដែលមានបង្កប់គ្រាប់មីន និងកាកសំណល់សង្គ្រាមសរុប ២១៥២ គីឡូម៉ែត្រការ៉េ គឺធំជាងប្រទេសសិង្ហបុរីរហូតដល់ទៅ ៣ ដង។
បច្ចុប្បន្ននេះ កម្ពុជានៅមានដីគ្រាប់មីន និងកាកសំណល់មិនទាន់ផ្ទុះ ៨៣៥ គីឡូម៉ែត្រការ៉េទៀត ដែលត្រូវសម្អាតឲ្យអស់នៅឆ្នាំ ២០២៥។ ទោះបីជាមានការគាំទ្រពីដៃគូអភិវឌ្ឍន៍ជាច្រើនក៏ដោយ ក៏រដ្ឋាភិបាលកម្ពុជានៅតែមានកង្វះខាតថវិកាចំនួន ២២៥ លានដុល្លារទៀត សម្រាប់ដំណើរការពីឆ្នាំ ២០២១ ដល់ ២០២៥។ នេះបើតាមលោក លី ធុជ។
លោក លី ធុជ បានថ្លែងដូច្នេះថា៖ «លោក Daniel ឆន្ទៈដ៏ល្អរបស់អ្នកក្នុងការឈរជាអ្នកតស៊ូមតិសកលរបស់អង្គការសហប្រជាជាតិក្នុងការលុបបំបាត់គ្រាប់មីន និងគ្រឿងផ្ទុះបង្កគ្រោះថ្នាក់ ពិតជាត្រូវបានវាយតម្លៃយ៉ាងជ្រាលជ្រៅដោយរដ្ឋាភិបាល និងប្រជាជននៅទីក្រុងភ្នំពេញ ពីព្រោះអ្នកបានបង្ហាញពន្លឺទៅសកលលោកអំពីស្ថានភាពលំបាកដែលយើងកំពុងជួប»។ លោកបន្តថា លោកនាយករដ្ឋមន្ត្រី ហ៊ុន សែន ក៏ចង់ជួបជាមួយ លោក Craig ដែរ ប្រសិនបើលោកអាចមកទស្សនាកម្ពុជានៅពេលណាមួយ។
លោកស្រី Pauline Tamesis អ្នកសម្របសម្រួលរបស់អង្គការសហប្រជាជាតិប្រចាំកម្ពុជាបានថ្លែងក្នុងពិធីសម្ពោធយុទ្ធនាការទីលានសុវត្ថិភាពថា កិច្ចការដោះមីនមិនបានឈប់ទេនៅកម្ពុជា ទោះបីជាធុរកិច្ចនានាបានធ្លាក់ចុះ ហើយរដ្ឋាភិបាលបានផ្ដោតការយកចិត្តទុកដាក់លើការទប់ស្កាត់ការរាតត្បាតសកលនៃជំងឺកូវីដ១៩។
លោកស្រីបានថ្លែងថា៖ «ការបង្កើនជំនួយដល់ជនរងគ្រោះ សម្រាប់ការបោសសម្អាតដីកសិកម្ម សម្រាប់សកម្មភាពផលិតនានា និងសូម្បីតែសម្រាប់ជាទីវាលរត់លេងរបស់ក្មេងៗ បានបើកផ្លូវឲ្យប្រជាជនកម្ពុជានឹកគិតដល់សក្ដានុពលផ្សេងៗទៀតនាពេលអនាគត»។
ជាមួយគ្នានេះ លោកស្រីបានកោតសរសើរដល់រដ្ឋាភិបាលកម្ពុជាដែលមានយុទ្ធសាស្ត្រសកម្មភាពមីនដ៏ខ្លាំងដោយសម្លឹងទៅមុខវែងឆ្ងាយ និងប្រកបដោយមហិច្ឆតា ហើយបានកំណត់ពេលវេលា ៤ ឆ្នាំក្នុងការធ្វើឲ្យប្រទេសនេះគ្មានគ្រាប់មីន។ វាជាពេលវេលាដែលត្រូវបន្ថែមការគាំទ្រដល់ពលរដ្ឋកម្ពុជាដើម្បីឲ្យពួកគេអាចរស់នៅក្នុងបរិស្ថានមានសុវត្ថិភាព ហើយជាទីដែលគ្មានអ្នកណាម្នាក់ត្រូវបានទុកចោល»៕