The Phnom Penh Post Search

Search form




Logo of Phnom Penh Post newspaper Phnom Penh Post - តើ​វា​ជា​ថ្ងៃ​ទិវា​សិទ្ធិមនុស្ស ឬ​អត់​បើ​មាន​ការ​រារាំង​ ​ឃាត់​ខ្លួន​សកម្មជន

តើ​វា​ជា​ថ្ងៃ​ទិវា​សិទ្ធិមនុស្ស ឬ​អត់​បើ​មាន​ការ​រារាំង​ ​ឃាត់​ខ្លួន​សកម្មជន

តើ​វា​ជា​ថ្ងៃ​ទិវា​សិទ្ធិមនុស្ស ឬ​អត់​បើ​មាន​ការ​រារាំង​ ​ឃាត់​ខ្លួន​សកម្មជន

121211_01
លោក ណិប លី បុគ្គលិកជាន់ខ្ពស់ទទួលបន្ទុកផ្នែកកម្មវិធីពង្រឺងសិទ្ធិអំណាចសហគមន៍នៃអង្គការសិទ្ធិលំនៅដ្ឋាន ពេលត្រូវបានកម្លាំងសមត្ថកិច្ចនគរបាលធ្វើការឃាត់ខ្លួនកាលពីម្សិលមិញ

ភ្នំពេញៈ ​ក្រុម​អ្នក​តវ៉ា​និង​ប្រជាជន​ជាច្រើន​បាន​សួរ​ថា តើ​ម្សិលមិញ​ជា​ទិវា​សិទ្ធិ​មនុស្ស​ឬ​អត់​?​បន្ទាប់​ពី​មន្រ្តី​ អង្គការ​ក្រៅ​រដ្ឋាភិបាល​ម្នាក់​ត្រូវ​ឃុំ​ខ្លួន​មួយ​រយៈ ហើយ​កង​កម្លាំង​សន្តិសុខ​បាន​ធ្វើ​ការ​រារំាង​ក្រុម​អ្នក​តវ៉ា និង​បាន​បិទ​ការ​ប្រារព្ធ​ពិធី​ប្រចាំ​ឆ្នាំ​មួយ​នេះ​។

មនុស្ស រាប់​ពាន់​នាក់​បាន​ដង្ហែ​ក្បួន​ជុំ​វិញ​រាជធានី ចេញពី​ពហុកីឡដ្ឋាន​ជាតិ​អូឡាំពិក​ទៅ​សួន​សេរីភាព ដែល​ជា​កន្លែង​មនុស្ស​រាប់​ពាន់​នាក់​ បាន​ប្រមូល​ផ្តុំ​គ្នា​រំឭក​ខួប ៦៤​ឆ្នាំ ចាប់​តាំង​ពី​សេចក្តី​ប្រកាស​ស្តីពី​សិទ្ធិ​មនុស្ស​ជា​សកល ត្រូវ​ប្រកាស​ជា​ផ្លូវ​ការ​ឡើង។

ជា​ផ្នែក​នៃ​ព្រឹត្តិការណ៍​នេះ ក្រុម​សង្គម​ស៊ីវិល​កម្ពុជា បាន​សង្កត់​ធ្ងន់​ទៅ​លើ​បញ្ហា​សិទ្ធិ​មនុស្ស និង​បញ្ហា​ដែល​ពាក់ព័ន្ធ​នឹង​ការ​អភិវឌ្ឍ​ពាណិជ្ជកម្ម ដោយ​ស្នើ​សុំ​ឲ្យ​រដ្ឋាភិបាល បង្កើត​គោល​នយោបាយ​មួយ​ដែល​ការពារ​ពលរដ្ឋ ដែល​កំពុង​ប្រឈម​នឹង​ការ​អភិវឌ្ឍ និង​ការ​វិនិយោគ​ពី​សំណាក់ ជន​បរទេស។

លោក ឈិត សំអាត នាយក​ប្រតិបត្តិ​នៃ​វេទិកា​អង្គការ​ក្រៅ​រដ្ឋាភិបាល បាន​ថ្លែង​ថា រដ្ឋាភិបាល​ចាំបាច់​ត្រូវ​ប្រកាន់​ខ្ជាប់​ទៅ​តាម​ស្តង់ដារ សិទ្ធិ​មនុស្ស​អន្តរជាតិ ជា​ពិសេស នៅ​ពេល​ខ្លួន​អនុម័ត​លើ​កិច្ច​សន្យា​ពាណិជ្ជកម្ម​ដែល​នាំ​ឲ្យ​មាន​ការ បណ្តេញ​ចេញ​ពី​ដីធ្លី។

លោក ឈិត សំអាត បាន​ថ្លែង​ថា​ ៖ «ការ​រំលោភ​សិទ្ធិមនុស្ស​ឆ្លុះ​បញ្ចាំង ពី​សញ្ញា​ដ៏​អាក្រក់​សម្រាប់​ពាណិជ្ជកម្ម ហើយ​សកម្មភាព​បែប​នេះ មិន​ត្រឹម​តែ​ប៉ះពាល់​ដល់​សហគមន៍​នោះ​ទេ ​ប៉ុន្តែ ក៏​ធ្វើ​ឲ្យ​អ្នក​វិនិយោគ​បាត់បង់​ទំនុក​ចិត្ត​មក​លើ​កម្ពុជា​ផង​ដែរ​»។

ពាណិជ្ជកម្ម​ជា​ច្រើន​ដែល​កំពុង​វិនិយោគ​ក្នុង ប្រទេស​កម្ពុជា ​ក៏​ត្រូវ​ការ ការ​ទទួល​ខុស​ត្រូវ​លើ​ផល​ប៉ះពាល់ បណ្តាល​មក​ពី​គម្រោង​របស់​ពួក​គេ​មក​លើ​ប្រទេស​កម្ពុជា​ផង​ដែរ។

សិទ្ធិ​ការងារ រួម​ទាំង​បញ្ហា​ពលករ​ចំណាក​ស្រុក បញ្ហា​សមភាព​យេនឌ័រ និង​ពូជ​សាសន៍ ក៏​ស្ថិត​នៅ​ក្នុង​បញ្ជី​អាទិភាព​ខ្ពស់​ដែរ ​សម្រាប់​អ្នក​ដែល​ចូល​រួម​ព្រឹត្តិការណ៍​កាល​ពី​ម្សិលមិញ នៅ​សួន​សេរីភាព ប៉ុន្តែ​មនុស្ស​មួយ​ក្រុម​ទៀត ក៏​បាន​លើក​ឡើង​ផង​ដែរ​ថា បញ្ហា​សេរីភាព​នៃ​ការ​ប្រមូល​ផ្តុំ គឺជា​បញ្ហា​បន្ទាន់​ជាង​គេ។

សមាជិក​សហគមន៍​ចំនួន​៥ បាន​ដង្ហែ​ក្បួន​ពី​បឹងកក់ ទៅ​ទីស្តីការ​គណៈ​រដ្ឋ​មន្រ្តី ដើម្បី​ស្នើ​សុំ​រដ្ឋាភិបាល​បញ្ចប់​ការ​អភិវឌ្ឍ​ណា ដែល​នាំ​ឲ្យ​មាន​ការ​បណ្តេញ​ចេញ​ ប៉ុន្តែ​ ពួក​គេ​ត្រូវ​បាន​រារាំង​ដោយ​នគរបាល និង​កម្លាំង​សន្តិសុខ ហើយ​ធ្វើ​ឲ្យ​មាន​ការ​ប៉ះ​ទង្គិច​គ្នា មាន​ទាំង​កុមារ​នៅ​ក្នុង​នោះ​ផង។

លោក ណិប លី មន្រ្តី​នៅ​ក្រុម​ការងារ​ពិសេស​សិទ្ធិ​លំនៅដ្ឋាន ត្រូវ​បាន​ឃាត់​ខ្លួន​បន្ទាប់​ពី​បាន​ថតរូប​ស្នងការ​នគរបាល រាជធានី​ លោក  ជួន សុវណ្ណ។

លោក ណិប លី ត្រូវ​បាន​នាំ​យក​ទៅ​ប៉ុស្តិ៍​នគរបាល​នៅ​ជិត​នោះ​ធ្វើ​ការ​សាកសួរ មួយ​រយៈ​ខ្លី បន្ទាប់​មក​ត្រូវ​បាន​ដោះលែង​វិញ ​នៅ​ពេល​នគរបាល​ដឹង​ថា គាត់​ជា​បុគ្គលិក​អង្គការ​ក្រៅ​រដ្ឋាភិបាល។

លោក បន្ត​ថា​ ៖ «ខ្ញុំ​បាន​ឃើញ​លោក ជួន សុវណ្ណ និយាយ​ទៅ​កាន់​មន្រ្តី​អង្គការ​ក្រៅ​រដ្ឋាភិបាល​ឈ្មោះ​ អែ សារុំ ដូច្នេះ ខ្ញុំ​បាន​ព្យាយាម​ថត​រូប​ពួក​គេ ប៉ុន្តែ ខ្ញុំ​មិន​មាន​ពេលវេលា​គ្រប់គ្រាន់»។

ក្នុង​អំឡុង​ឧប្បត្តិហេតុ​ជាមួយ​គ្នា​នេះ​ដែរ ស្រ្តី​ម្នាក់​មក​ពី​តំបន់​បឹងកក់​បាន​ដួល​ទៅ​លើ​ដី។

បុរស ម្នាក់​ដែល​សុំ​មិន​បញ្ចេញ​ឈ្មោះ​និយាយ​ថា៖ «ខ្ញុំ​បាន​ឃើញ​សន្តិសុខ​ម្នាក់​វាយ​ស្រ្តី​នោះ​ត្រូវ​ត្រង់​ពោះ ហើយ​ធ្វើ​ឲ្យ​គាត់​ដួល​ទៅ​លើ​ដី»។

អ្នក​ស្រី​ ថៃ ណារី អាយុ​៤៣​ឆ្នាំ ជា​អតីត​ប្រជាជន​រស់​នៅ​តំបន់​បឹងកក់ បាន​ប្រាប់​ភ្នំពេញ ប៉ុស្តិ៍​ថា នៅ​ក្នុង​ខណ្ឌ​សែនសុខ មាន​សន្តិសុខ​ ចំនួន​ប្រហែល​៥០​នាក់​ បាន​មក​រុះរើ​តង់​ដែល​ប្រជាជន​នាំ​គ្នា​ធ្វើ​ ដើម្បី​រំឭក​ទិវា​នេះ។

អ្នក​ស្រី​បន្ត​ថា​៖ «​ខ្ញុំ​មាន​ការ​រន្ធត់ ​និង​ខក​ចិត្ត​ណាស់»។ អ្នក​ស្រី​បន្ថែម​ថា ​សន្តិសុខ​បាន​មក​រុះរើ​តង់​នោះ​តែ​២០​នាទី​មុន ពេល​ពិធី​ប្រារព្ធ​ធ្វើ​ឡើង។

អ្នក​ស្រី​ថ្លែង​បន្ត​ថា ​៖ «​ប្រជាជន​ភ័យ​ខ្លាច​ចំពោះ​ទង្វើ​នេះ​ណាស់ ហើយ​ខ្ញុំ​គិត​ថា វា​ជា​ការ​រំលោភ​សិទ្ធិ​មនុស្ស និង​លទ្ធិ​ប្រជាធិបតេយ្យ»។  អ្នក​ស្រី​ ណារី បន្ត​ទៀត​ថា អ្នក​ស្រី​បាន​ជម្រាប​ទៅ​អាជ្ញាធរ​សង្កាត់​ និង​ខណ្ឌ​អំពី​គម្រោង​ប្រារព្ធ​ពិធី​នេះ ប៉ុន្តែ​ទោះ​យ៉ាង​ណា​ក៏​ដោយ ​អ្នក​នាំ​ពាក្យ​សាលា​រាជធានី លោក ឡុង ឌីម៉ង់ បាន​ថ្លែង​ថា អ្នក​ស្រី​មិន​បាន​ស្វែង​រក​ការ​អនុញ្ញាត​ពី​សាលា​រាជធានី ទេ។

ដើម្បី​លើក​ឡើង​អំពី​បញ្ហា​សិទ្ធិ​មនុស្ស​អង្គការ​ក្រៅ​រដ្ឋាភិបាល​រួម​មាន អង្គការ​សិទ្ធិ​មនុស្ស អាដ​ហុក គណៈ​កម្មាធិការ​ប្រព្រឹត្តិកម្ម នៃ​អង្គការ​សមាគម​ការពារ​សិទ្ធិ​មនុស្ស​កម្ពុជា សហភាព​ការងារ​កម្ពុជា និង​ក្រុម​ការងារ​ពិសេស​សិទ្ធិ​លំនៅដ្ឋាន បាន​ចេញ​សេចក្តី​ថ្លែង​ការណ៍​អំពាវនាវ​ឲ្យ​រដ្ឋាភិបាល​ដើរ តួ​លើ​បញ្ហា​សិទ្ធិ​មនុស្ស។

អនុសាសន៍​ផ្សេងៗ​រួម​មាន ការ​ពង្រឹង​ឯករាជភាព​នៃ​ប្រព័ន្ធ​តុលាការ ការ​អភិវឌ្ឍ​គោល​នយោបាយ​ដី​ធ្លី និង​លំនៅដ្ឋាន និង​ការ​គោរព​សិទ្ធិ​កម្មករ​ឲ្យ​បាន​ប្រសើរ​ជាង​មុន ជា​ពិសេស ពាក់ព័ន្ធ​នឹង​កិច្ច​សន្យា​ការងារ​រយៈ​ពេល​ខ្លី​។

នៅ​ក្នុង​សេចក្តី​ ថ្លែង​ការណ៍​មួយ​ទៀត​របស់​សមាគម​សិទ្ធិ​មនុស្ស​អាដហុក បាន​ថ្លែង​ថា ​ប្រធាន​បទ​ផ្លូវ​ការ​នៃ​ពិធី​កាលពី​ម្សិលមិញ​គឺ​«ការ​រួម​បញ្ចូល ​និង​សិទ្ធិ​ចូល​រួម​ក្នុង​ជីវិត​សាធារណៈ​» គឺ​ពាក់​ព័ន្ធ​ជា​ពិសេស​ចំពោះ​កម្ពុជា​។

សេចក្តី​ថ្លែង​ការណ៍​លើក​ឡើង​ថា៖«​ពិត​ណាស់ ឆ្នាំ​២០១២​បាន​បង្ហាញ​ឲ្យ​ឃើញ​ឡើង​ផ្ទាល់​ភ្នែក អំពី​ការ​រំលោភ​បំពាន​សិទ្ធិ​ពលរដ្ឋ​ស៊ីវិល​កម្ពុជា និង​សិទ្ធិ​នយោបាយ»។ សេចក្តី​ថ្លែងការណ៍​នេះ​បន្ត​ថា​៖ «​ខណៈ​មាន​ការ​ទទួល​ស្គាល់​តម្រូវ​ការ​អភិវឌ្ឍ​សេដ្ឋកិច្ច យើង​អំពាវនាវ​ឲ្យ​សហគ្រាស​ពាណិជ្ជកម្ម អនុវត្ត​ដោយ​យក​ចិត្ត​ទុក​ដាក់​ និង​ត្រឹមត្រូវ ចំពោះ​សកម្មភាព​របស់​ខ្លួន​ និង​កំណត់​អត្ត​សញ្ញាណ ការ​ការ​ពារ និង​កាត់​បន្ថយ​ផល​ប៉ះ​ពាល់​អវិជ្ជមាន​លើ​សិទ្ធិ​មនុស្ស​»៕​ PS

រាយការណ៍​បន្ថែមៈ Shane Worrell

អត្ថបទគួរចាប់អារម្មណ៍