ខេត្តកំពត: តំណាងក្នុងឃុំរបស់គណបក្សប្រឆាំងមួយរូប ដែលបាននិយាយផ្សព្វផ្សាយពីការយាយីនយោបាយនៅក្នុងដំណើរការសុំស្នាមផ្តិតមេដៃដើម្បីបង្កើតញត្តិសុំឲ្យមានការដោះលែងបុរស និងស្រ្តី ២៩ នាក់ដែលត្រូវក្រុមសិទ្ធិមនុស្សកំណត់ថា ជាអ្នកទោសនយោបាយត្រូវបានឃាត់ខ្លួនកាលពីល្ងាចថ្ងៃអង្គារ។
លោក ដួង ធុន ដែលបានដើរប្រមូលស្នាមផ្តិតមេដៃពីប្រជាពលរដ្ឋដើម្បីផ្ញើទៅព្រះមហាក្សត្រនៅក្នុងស្រុកឈូក ខេត្តកំពត ត្រូវបានឃុំខ្លួនមួយយប់នៅប៉ុស្តិ៍ប៉ូលីសឃុំត្រពាំងភ្លាំង។ លោកទើបតែត្រូវបានសមត្ថកិច្ចដោះលែងកាលពីល្ងាចថ្ងៃម្សិលមិញបន្ទាប់ពីបានចុះហត្ថលេខាលើកិច្ចសន្យាមួយជាមួយនឹងសមត្ថកិច្ច។
លោក ដួង ធុន បាននិយាយថា៖ «ពួកគេបានហាមខ្ញុំមិនឲ្យប្រមូលស្នាមមេដៃហើយខ្ញុំបានស៊ីញ៉េកិច្ចព្រមព្រៀងមួយថា ឈប់ប្រមួលទៀតហើយ។ បើសិនជាខ្ញុំប្រមូលម្តងទៀត ពូកគេ (សមត្ថកិច្ច) អាចនឹងចាប់ខ្ញុំ។ ដូច្នេះខ្ញុំឈប់ហើយ»។
លោកបានបន្តទៀតថា៖ «ចំពោះរឿងកិច្ចការគណបក្ស ពួកគេពុំបានហាមទេ ក៏ប៉ុន្តែពួកគេបាននិយាយថា ធ្វើកុំឲ្យហួសព្រំដែន ដូចជាពាក់ខោអាវខ្មៅជាដើម»។
លោក ម៉ៅ ច័៍ន្ទមធុរិទ្ធ បានឲ្យដឹងថា ក្រុមសមត្ថកិច្ចបានចាត់វិធានការបែបនេះ ក៏ ព្រោះតែមានមនុស្សមួយចំនួនបានដាក់ពាក្យបណ្តឹងថា ពួកគាត់ត្រូវបានគេ «បង្ខំ» ឲ្យផ្តិតមេដៃ។
លោកបានពន្យល់ថា៖ «មានមនុស្សមកសុំពួកគាត់ផ្តិតមេដៃ... ក៏ប៉ុន្តែនៅពេលដែលពួកគាត់ត្រលប់ទៅផ្ទះវិញ សាច់ញាតិរបស់ពួកគាត់បានសួរនាំពីវា ហើយប្រាប់ពួកគាត់កុំឲ្យចេះតែផ្តិតមេដៃឲ្យគេអញ្ចឹង។ ដូច្នេះហើយបានជាពួកគាត់ភ័យខ្លាចហើយ ដាក់ពាក្យបណ្តឹងមកសមត្ថកិច្ច។
ក៏ប៉ុន្តែ លោកយឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានអះអាងថាការឃាត់ខ្លួទនលោកដួង ធុន គឺជា«រឿងនយោបាយ»។
លោកបានបកស្រាយថា៖ «យើងពុំបានបង្ខំប្រជាជន [ឲ្យផ្តិតមេដៃនោះទេ]។ យើងបានធ្វើវាដោយសន្តិវិធី។ យើងសួរប្រជាជនថា នរណាខ្លះដែលស្រលាញ់យុត្តិធម៍? ហើយឥឡូវយើងបែរជាត្រូវគេហាមឃាត់មិនឲ្យធ្វើវា។ តើប្រទេសប្រជាធិបតេយ្យបែបណាដែល ធ្វើបែបនេះ?» ៕
រាយការណ៍បន្ថែម Erin Handley /TN
