ព្រះសីហនុៈ នៅក្នុងពិធីប្រារព្ធទិវាសិទ្ធិមនុស្សអន្តរជាតិខួបលើកទី ៧១ ដែលធ្វើឡើងកាលពីម្សិលមិញ ប្រជាពលរដ្ឋជិត ៣០០ នាក់ តំណាងឲ្យពលរដ្ឋកំពុងមានវិវាទដីធ្លីចំនួន ៩ ០៥៥ គ្រួសារ នៅខេត្តព្រះសីហនុបានស្នើទៅអភិបាលខេត្ដ ប្រធានមន្ទីររៀបចំដែនដី នគរូបនីយកម្មខេត្តនេះ និងរាជរដ្ឋាភិបាល អន្តរាគមន៍ ដោះស្រាយបញ្ហាជម្លោះដីធ្លីឲ្យបានលឿន។
ញត្ដិស្នើសុំជួយអន្តរាគមន៍របស់ប្រជាពលរដ្ឋដែលបាននាំគ្នាយកទៅដាក់នៅរដ្ឋបាលខេត្ដព្រះសីហនុកាលពីម្សិលមិញឲ្យដឹងថា ប្រជាពលរដ្ឋចំនួន ៩ ០៥៥ គ្រួសារ ដែលកំពុងរងគ្រោះ ប្រឈមការបាត់បង់ដីលំនៅឋាន និងដីធ្វើស្រែចម្ការចំនួន ១៦ ៦០៩,៣១ ហិកតា នៅស្រុកស្ទឹងហាវ ស្រុកព្រៃនប់ ក្រុងព្រះសីហនុ ស្នើសុំជួយអន្តរាគមន៍ដោះស្រាយបញ្ហាដីធ្លីដោយពន្លឿនការកាត់ឆ្វៀល វាស់វែងដីធ្លី និងចេញបណ្ណកម្មសិទ្ធិដីធ្លី។
ញត្តិនេះបញ្ជាក់ថា៖ «យើងខ្ញុំទាំង ៩ ០៥៥ គ្រួសារបានចូលមករស់នៅកាន់កាប់ និងធ្វើស្រែចម្ការ សាងសង់លំនៅឋានលើដីដែលស្ថិតនៅទីតាំងខាងលើតាំងពីចន្លោះឆ្នាំ (១៩៩០-១៩៩៥) ដើម្បីបង្កបង្កើនផល និងចិញ្ចឹមជីវិត ហើយការរស់នៅនេះប្រកបដោយសេចក្តីសុខសាន្តរហូតមក។ ទើបដល់អំឡុងឆ្នាំ (២០០៥-២០០៨) មានក្រុមហ៊ុន ឈ្មួញ និងអ្នកមានអំណាចមករំលោភយកដីប្រជាពលរដ្ឋយើងខ្ញុំ ដែលរស់នៅតាមសហគមន៍ក្នុងភូមិសាស្ត្រខាងលើ»។
ញត្ដិនេះបន្ថែមថា៖ «យើងខ្ញុំគឺជាប្រជាពលរដ្ឋដែលរស់នៅស្របច្បាប់មានលិខិតបញ្ជាក់ការរស់នៅជាក់លាក់ពីអាជ្ញាធរដែនដីរួមមាន អត្តសញ្ញាណប័ណ្ណ អត្រានុកូលដ្ឋាន សៀវភៅគ្រួសារ សៀវភៅស្នាក់នៅ បណ្ណបោះឆ្នោត និងលិខិតបញ្ជាក់ការកាន់កាប់ដីធ្លីពីអាជ្ញាធរដែនដី»។
លោក យូ វាសនា តំណាងសហគមន៍ដីធ្លីម្នាក់ក្នុងចំណោមតំណាង ៨ នាក់ផ្សេងទៀតដែលបានដាក់ញត្ដិនេះបានថ្លែងថា អាជ្ញាធរខេត្ដព្រះសីហនុមិនអនុញ្ញាតឲ្យពលរដ្ឋ ធ្វើវេទិកាសាធារណៈ ឬធ្វើការហែក្បួនទេកាលពីម្សិលមិញប៉ុន្ដែពលរដ្ឋទាំងជិត ៣០០ នាក់ បានសម្រេចនាំគ្នាយកញត្ដិទៅដាក់នៅរដ្ឋបាលសាលាខេត្ដព្រះសីហនុ ដោយស្នើឲ្យរាជរដ្ឋាភិបាលតាមរយៈអាជ្ញាធរខេត្ដព្រះសីហនុជាពិសេសអភិបាលខេត្ដថ្មីជួយអន្តរាគមន៍ដោះស្រាយបញ្ហាវិវាទដីធ្លីជូនប្រជាពលរដ្ឋឲ្យបានឆាប់ចប់រួចរាល់។
លោកថ្លែងថា៖ «ពួកយើងចង់ផ្ញើសារដល់រាជរដ្ឋាភិបាលដែលមានសិទ្ធិសម្រេចចិត្ដជួយពន្លឿន និងជំរុញឲ្យអភិបាលខេត្ដថ្មីនេះដោះស្រាយវិវាទដីធ្លីជូនប្រជាពលរដ្ឋឲ្យឆាប់ចប់។ វិវាទដីធ្លីនៅក្នុងសហគមន៍យើងនេះ បានអូសបន្លាយយូរឆ្នាំពេកទៅហើយគឺជាង ១៥ ទៅ ២០ ឆ្នាំទៅហើយ។ ដូច្នេះញត្ដិយើងនេះ គឺចង់ឲ្យពន្លឿននីតិវិធីដោះស្រាយឲ្យបានឆាប់ចប់»។
លោក វាសនា បញ្ជាក់ថា រដ្ឋបាលខេត្ដព្រះសីហនុបានទទួលយកញត្ដិរបស់ប្រជាពលដ្ឋរួចហើយ ដោយបានប្រាប់ថានឹងផ្ដល់ព័ត៌មាន និងញត្ដិទៅដល់អភិបាលខេត្ដដើម្បីពិនិត្យ និងពន្លឿននីតិវិធីដោះស្រាយជូនពលរដ្ឋ។
កាលពីថ្ងៃទី ៣ ខែធ្នូតំណាងសហគមន៍ដីធ្លីមកពី ១១ សហគមន៍ ក្នុងខេត្តព្រះសីហនុបានដាក់លិខិតស្នើសុំ និងអញ្ជើញអភិបាលខេត្ដព្រះសីហនុ ប្រារព្ធទិវាសិទ្ធិមនុស្សអន្តរជាតិខួបលើកទី ៧១ នៅថ្ងៃទី ៩ ខែធ្នូ ដោយបញ្ជាក់ថា មានពលរដ្ឋប្រមាណ ២៥០ នាក់ដែលមានបញ្ហាវិវាទដីធ្លីក្នុងខេត្តនេះនឹងមកចូលរួមក្នុងវេទិកានេះ ប៉ុន្ដែត្រូវបានរដ្ឋបាលខេត្ដព្រះសីហនុបដិសេធ។
លិខិតបដិសេធរបស់រដ្ឋបាលខេត្ដព្រះសីហនុកាលពីថ្ងៃទី ២៧ ខែធ្នូបញ្ជាក់ទៅតំណាងប្រជាពលរដ្ឋដែលមានបញ្ហាដីធ្លីខាងលើថា រដ្ឋបាលខេត្តមិនអនុញ្ញាតឲ្យរៀបចំប្រារព្ធទិវាសិទ្ធិមនុស្ស ឬវេទិកាសាធារណៈនោះទេ ព្រោះកន្លងមករដ្ឋបាលខេត្តបានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សានៅតាមក្រុងស្រុកឃុំ-សង្កាត់ដោយរៀបចំវេទិកាសាធារណៈនៅតាមឃុំ សង្កាត់ព្រមទាំងបានរៀបចំកិច្ចប្រជុំសន្ទនាជាមួយអង្គការសង្គមស៊ីវិលក្នុងខេត្ត ១ ឆ្នាំ ២ ដងយ៉ាងទៀងទាត់ពាក់ព័ន្ធវិវាទដីធ្លី វិវាទផ្សេងៗព្រមទាំងសំណើសំណូមពរផ្សេងៗរបស់ប្រជាពលរដ្ឋ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងថា ពាក់ព័ន្ធនឹងប្រជាពលរដ្ឋ និងតំណាងសហគមន៍ដីធ្លីនាំគ្នាឡើងមកកាន់សាលាខេត្ដព្រះសីហនុពីម្សិលមិញគឺមិនមានបង្កបញ្ហាអ្វីដែលគួរឲ្យកត់សម្គាល់នោះទេ។ ដូច្នេះរដ្ឋបាលខេត្ដបានសម្រេចឲ្យតំណាងប្រជាពលរដ្ឋចំនួន ៦ នាក់ចូលទៅដាក់ឯកសារផ្សេងៗក្នុងរដ្ឋបាលខេត្ដ។
លោកថ្លែងថា៖ «ចំពោះសំណើ និងសំណូមពរផ្សេងៗរបស់ពួកគាត់នោះគឺតំណាងរដ្ឋបាលខេត្ដយើងនឹងធ្វើរបាយការណ៍ដាក់ជូនថ្នាក់ដឹកនាំដើម្បីពិនិត្យបន្ដ»។
លោកស្រី ជៀប សុធារី មន្ដ្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្ដព្រះសីហនុថ្លែងថា ទោះបីអាជ្ញាធរខេត្តបានជួបជុំជាមួយតំណាងអង្គការសង្គមស៊ីវិល និងពលរដ្ឋក្នុង ១ ឆ្នាំ ២ ដងក៏ដោយ ប៉ុន្ដែមិនទាន់បានដោះស្រាយបញ្ហាវិវាទដីធ្លីរួចរាល់ជូនប្រជាពលរដ្ឋនៅឡើយទេ។
លោកស្រីបានស្នើឲ្យរដ្ឋបាលខេត្ដព្រះសីហនុ ពន្លឿនការអន្តរាគមន៍ ស្វែងរកដំណោះស្រាយលើបញ្ហាវិវាទដីធ្លីណាដែលបានអូសបន្លាយមកច្រើនឆ្នាំមកហើយនោះឲ្យបានឆាប់។
លោកស្រីថ្លែងថា៖ «ការយកញត្ដិទៅដាក់របស់ប្រជាពលដ្ឋដល់រដ្ឋបាលសាលាខេត្ដព្រះសីហនុនេះគឺមិនមែនជាការតវ៉ាអ្វីទេគឺគ្រាន់តែជាការបង្កើតឲ្យមានឱកាសរវាងប្រជាពលរដ្ឋ និងអាជ្ញាធរខេត្ដ ដើម្បីពន្លឿនក្នុងការដោះស្រាយបញ្ហាវិវាទដីធ្លីរបស់ប្រជាពលរដ្ឋដែលអូសបន្លាយជាច្រើនឆ្នាំមិនទាន់បានដោះស្រាយ។ វាជាការរំឭកឡើងវិញនៃសិទ្ធិជាមូលដ្ឋាននៃសេរីភាព និងសិទ្ធិទទួលបានជាម្ចាស់កម្មសិទ្ធិនៅលើដីធ្លីរបស់ពួកគាត់ និងការរស់នៅដោយស្របច្បាប់ជាដើម»៕