The Phnom Penh Post Search

Search form

Logo of Phnom Penh Post newspaper Phnom Penh Post - តំណាង​​ពលរដ្ឋ​ម្នាក់​ត្រូវ​បញ្ជូន​ទៅ​តុលាការ​ខេត្ត​សួរ​ចម្លើយ




តំណាង​​ពលរដ្ឋ​ម្នាក់​ត្រូវ​បញ្ជូន​ទៅ​តុលាការ​ខេត្ត​សួរ​ចម្លើយ

តំណាង​ពលរដ្ឋ​លោក សៀន វី នៅ​សាលា​ដំបូង​ខេត្ត​បន្ទាយមានជ័យ​កាលពី​ម្សិលមិញ​។
តំណាង​ពលរដ្ឋ​លោក សៀន វី នៅ​សាលា​ដំបូង​ខេត្ត​បន្ទាយមានជ័យ​កាលពី​ម្សិលមិញ​។ រូបថត អាដហុក

តំណាង​​ពលរដ្ឋ​ម្នាក់​ត្រូវ​បញ្ជូន​ទៅ​តុលាការ​ខេត្ត​សួរ​ចម្លើយ

បន្ទាយមានជ័យៈ តំណាង​ពលរដ្ឋ​ម្នាក់​ត្រូវ​បាន​តុលាការ​ខេត្ត​សួរ​ចម្លើយ​កាល​ថ្ងៃ​ម្សិលមិញ​បន្ទាប់ពី​ត្រូវ​បាន​ចាប់​ឃុំ​ខ្លួន​កាលពី​ថ្ងៃ​ទី​​ ៤ កក្កដា ទាក់ទិន​នឹង​ការ​ប៉ះពាល់​ដី​កម្មសិទ្ធិ​ឯកជន​ក្នុង​ទំនាស់​ដីធ្លី​ដ៏រ៉ាំរ៉ៃ​​មួយ​ជាមួយ​ភរិយា​លោក កែ គឹមយ៉ាន តំណាង​រាស្ត្រ​គណបក្ស​ប្រជាជន​​ និង​ក្រុមហ៊ុន​ឆាយ ឆាយ។ នេះ​​បើ​តាម​ថ្នាក់ដឹកនាំ​ខេត្ត និង​អង្គការ​អាដហុក​។

លោក សៀន វី អាយុ ៥១ ឆ្នាំ​ត្រូវ​សមត្ថកិច្ច​ឃាត់​ខ្លួន​នៅ​ថ្ងៃ​ទី​ ៤ ខែ​កក្កដា​នៅពេល​ក្រុម​ពលរដ្ឋ​ប្រមាណ​ ២០ នាក់ បាន​នាំ​គ្នា​សង់ «ខ្ទម» លើ​ដី​ជម្លោះ​ដែល​​បាន​អូស​បន្លាយ​ពេល​ជាង​ ១០ ឆ្នាំ ដែល​ពួកគេ​ត្រូវ​បាន​បណ្តេញ​ចេញ​ទាំង​បង្ខំ​ និង​ដោយ​ហិង្សា​ពី​ដី​ប្រមាណ ​៤០ ហិកតា មាន ២០ គ្រួសារ ​ស្ថិត​​នៅ​ក្នុង​សង្កាត់​និម្មិត ក្រុង​ប៉ោយប៉ែត ដែល​ពី​មុន​ស្ថិត​នៅក្នុង​ឃុំ​អូរ​បី​ជាន់ ស្រុក​អូរជ្រៅ។ នេះ​បើ​តាម​លោក ស៊ុំ ចន្ទគា អ្នក​សម្របសម្រួល​សមាគម​សិទ្ធិ​មនុស្ស​អាដហុក​ខេត្ត​បន្ទាយមានជ័យ​។

លោក​ថា​៖ «​ដី​នេះ​ពលរដ្ឋ​ធ្លាប់​កាន់កាប់​អាស្រ័យ​ផល​តែ​ត្រូវ​បាន​គេ​បណ្តេញ​ចេញ​ដោយ​គ្មាន​សំណង​»។

អ្នកស្រី ព្រិន ឆយ អាយុ ៤៥ ​ឆ្នាំ ប្រពន្ធ លោក សៀន វី ថ្លែង​ថា ពលរដ្ឋ​ត្រូវ​បាន​បណ្តេញ​ចេញ​ក្នុង​ឆ្នាំ​ ២០០០ ​ដោយ​​គ្មាន​សំណង​បើ​​ទោះ​ជា​មាន​ការ​​ដាក់​បណ្តឹង​នៅ​គ្រប់​ស្ថាប័ន​រាជរដ្ឋាភិបាល​ក្តី​ក៏​មិន​មាន​ដំណោះស្រាយ​ដែរ។ ការ​បណ្តេញ​ទាំង​បង្ខំ និង​មាន​ហិង្សា​កាលពី​ឆ្នាំ​ ២០១០ ក៏​បណ្តាល​ឲ្យ​មនុស្ស​ពីរ​នាក់​ស្លាប់​ផង​ដែរ។

អ្នកស្រី​ថា៖ ​«តាំងពី​ហ្នឹង​មក​យើង​គ្មាន​ដី​ធ្វើ​ស្រែ​ យើង​ជួល​ដី​គេ​»​។

លោក កែ គឹមយ៉ាន ​មិន​អាច​ទាក់ទង​សុំ​អធិប្បាយ​​បាន​ទេ​កាលពី​ម្សិលមិញ។

លោក គោ ស៊ុំសារឿត អភិបាល​ខេត្ត​បន្ទាយមានជ័យ​ថ្លែង​ថា​ការ​ឃាត់​ខ្លួន​គឺ​ពាក់ព័ន្ធ​នឹង​ការ​ចូល​ទៅ​កាន់កាប់​ដី​កម្មសិទ្ធិ​ឯកជន​ដែល​មាន​ប្លង់​រួច​ហើយ ចាប់​តាំងពី​មុន​ការ​ចូល​កាន់​តំណែង​​របស់​លោក​នៅ​ខេត្ត​នេះ។ លោក​​បញ្ជាក់​ថា​នេះ​ជា​ដី​របស់​ក្រុមហ៊ុន​ឆាយឆាយ​អិនវេសមិន និង​របស់​ភរិយា​លោក កែ គឹមយ៉ាន ហើយ​ដី​នេះ​ជា​ផ្នែក​មួយ​នៃ​តំបន់​សេដ្ឋកិច្ច​ពិសេស។

លោក​ថ្លែង​ថា៖ «​រឿង​ដីធ្លី​មួយ​នេះ​ស្មុគស្មាញ​ខ្លាំង​ណាស់​។ វា​ជា​ដី​កម្មសិទ្ធិ​ឯកជន​ទៅ​ហើយ ហើយ​យើង​មាន​តែ​ជំរុញ​ឲ្យ​ម្ចាស់​ដី​ដោះស្រាយ​ជា​គោល​នយោបាយ​ឲ្យ​ពលរដ្ឋ​ទៅ​»។

មន្ត្រី​អាដហុក​ខេត្ត​លោក ចន្ទគា​ថ្លែង​ថា​មិន​គួរ​មាន​ការ​ចាប់​ខ្លួន​ពលរដ្ឋ​ឡើយ​ហើយ​គួរ​តែ​គណៈកម្មការ​ដោះស្រាយ​វិវាទ​​ដីធ្លី​ធ្វើការ​ដោះស្រាយ​តាម​​យន្តការ​របស់​ខ្លួន​មិនមែន​ឲ្យ​ថ្នាក់​ខេត្ត​មក​ត្រឹម​តែ «ធ្វើការ​សម្របសម្រួល​នោះ​ឡើយ​»។​«ដោយសារ​ពលរដ្ឋ​គ្មាន​ដី​គ្មាន​ជម្រើស​ទើប​គាត់​មក​នៅ​ទី​នេះ​វិញ។ គាត់​ត្រូវការ​ដី​ដើម្បី​ធ្វើ​ស្រែ​ចិញ្ចឹម​ជីវិត​។ កំហុស​ធ្ងន់​គឺ​អាជ្ញាធរ​ទទួល​បន្ទុក​បញ្ហា​ដីធ្លី​ដែល​ត្រូវ​ធ្វើ​ជា​ជាង​​ឲ្យ​តុលាការ​ជា​អ្នក​ចាត់ការ​»៕

អត្ថបទគួរចាប់អារម្មណ៍