The Phnom Penh Post Search

Search form

Logo of Phnom Penh Post newspaper Phnom Penh Post - តំណាងរាស្ត្រ​បក្ស​ប្រឆាំង​ស្នើឲ្យ​រដ្ឋាភិបាល​ទុក​ដី​ពហុកីឡាដ្ឋាន​ខេត្ត​បាត់ដំបង




តំណាងរាស្ត្រ​បក្ស​ប្រឆាំង​ស្នើឲ្យ​រដ្ឋាភិបាល​ទុក​ដី​ពហុកីឡាដ្ឋាន​ខេត្ត​បាត់ដំបង

ដី​ពហុកីឡដ្ឋាន​​ខេត្ត​​ដុះ​ស្មៅ​ដែល​ក្រុមហ៊ុន​ជួល​ធ្វើ​សណ្ឋាគារ​។
ដី​ពហុកីឡដ្ឋាន​​ខេត្ត​​ដុះ​ស្មៅ​ដែល​ក្រុមហ៊ុន​ជួល​ធ្វើ​សណ្ឋាគារ​។ រូបថត សហការី

តំណាងរាស្ត្រ​បក្ស​ប្រឆាំង​ស្នើឲ្យ​រដ្ឋាភិបាល​ទុក​ដី​ពហុកីឡាដ្ឋាន​ខេត្ត​បាត់ដំបង

បាត់ដំបងៈ តំណាងរាស្ត្រ​បី​រូប​នៃ​គណបក្ស​សង្គ្រោះ​ជាតិ​បាន​ស្នើ​ឲ្យ​រដ្ឋាភិបាល​ទុក​ដី​ពហុកីឡដ្ឋាន​ខេត្ត​បាត់ដំបង​ធ្វើ​ជា​បេតិកភណ្ឌ​ជាតិ​មិន​គួរ​​​​ផ្តល់​សិទ្ធិ​វិនិយោគ​ទៅ​​ឲ្យ​ក្រុមហ៊ុន​អ្នក​ឧកញ៉ា​ គិត ម៉េង ធ្វើ​សណ្ឋាគារ​លំដាប់​អន្តរជាតិ​នោះ​ទេ។

តាមរយៈ​រដ្ឋសភា លិខិត​ចុះ​ថ្ងៃ​ទី​ ២៦​ មិថុនា ​តំណាងរាស្ត្រ​មណ្ឌល​បាត់ដំបង​មាន​លោកស្រី មូរ សុខហួរ លោក ពិន រតនា និង​​លោក ឡុង ប៊ុត្តា នៃ​​គណបក្ស​សង្គ្រោះ​ជាតិ​បាន​ផ្ញើ​ជូន​​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​ឲ្យ​ទុក​កីឡដ្ឋាន​ខេត្ត​បាត់ដំបង​​ (ទីតាំង​កីឡា​​ប្រដាល់) ស្ថិត​ក្នុង​​ភូមិ​កម្មករ​ សង្កាត់​ស្វាយប៉ោ ក្រុង​បាត់ដំបង​ «ជា​សម្បត្តិ​បេតិកភណ្ឌ​» ដោយសារ​តំណាងរាស្ត្រ​ទាំងនោះ​បាន​ឃើញ​សំណើ​កាលពី​ឆ្នាំ​ ២០០៧ សុំ​ធ្វើការ​វិនិយោគ​សណ្ឋាគារ​ទំនើប​ខ្នាត​អន្តរជាតិ​របស់​ក្រុមហ៊ុន​ Royal Group និង​​លិខិត​ចុះ​កាលពី​ខែ​មករា ឆ្នាំ​ ២០១៥ សុំ​ជួល​ដី​វិនិយោគ​សណ្ឋាគារ​ក្នុង​ប្លុក​ពហុកីឡដ្ឋាន​ខេត្ត​បាត់ដំបង់​។

លិខិត​សរសេរ​ថា​៖ ​«​យើង​ខ្ញុំ​យល់​ថា​គួរ​គប្បី​រាជរដ្ឋាភិបាល​ជួសជុល​​ទីតាំង​នេះ​សម្រាប់​យុវជន​ និង​​​​ពលរដ្ឋ​ក្នុង​ខេត្ត​បាត់ដំបង​បាន​ប្រើប្រាស់​ជា​ប្រយោជន៍ និង​​​ទុក​ជា​​សម្បត្តិ​បេតិកភណ្ឌ​ជាតិ​»​។

ដំណឹង​នៃ​ការ​វិនិយោគ​លើ​ដី​ទំហំ​ប្រមាណ​ ៤៦៧៥ ​ម៉ែត្រ​ការ៉េ​ត្រូវ​ពិភាក្សា​​នៅពេល​មាន​កិច្ចប្រជុំ​ក្រុម​ប្រឹក្សា​ខេត្ត​បាត់ដំបង​កាលពី​ថ្ងៃ​ទី​ ២៧ ខែ​ឧសភា។ នេះ​បើ​តាម​លោក ជា ជីវ សមាជិក​ក្រុមប្រឹក្សា​ខេត្ត​មកពី​គណបក្ស​សង្គ្រោះ​ជាតិ​។

លោក​ថា​ក្នុង​កិច្ចប្រជុំ​នោះ លោក បាន​ស្នើសុំ​កុំ​ឲ្យ​មាន​ការ​អភិវឌ្ឍ​ពហុកីឡដ្ឋាន​ខេត្ត​ និង​ទុក​វា​ដើម្បី​បម្រើ​ប្រយោជន៍​កីឡា​រួម​វិញ ជាពិសេស​កីឡា​ប្រដាល់​។

លោក​ថា ៖ «មិន​មាន​ហេតុផល​អ្វី​ត្រូវ​ឲ្យ​វិនិយោគ​ទេ ​បើ​យើង​ជួល​នោះ​នឹង​បាត់បង់​បេតិកភណ្ឌ​ផ្នែក​កីឡា។ សូម​ទុក​ដើម្បី​អភិរក្ស​ទីតាំង​នោះ»។

តំណាង​រាស្ត្រ​លោក ឡុង ប៊ុត្តា ថ្លែង​ថា​កិច្ច​ការងារ​គ្រប់គ្រង​ពហុកីឡដ្ឋាន​ជា​រឿង​របស់​មន្ទីរ ឬ​ក្រសួង​អប់រំ យុវជន​​ និង​កីឡា ប៉ុន្តែ​បែរ​ជា​លោក ស ខេង នៃ​ក្រសួង​មហាផ្ទៃ​ចារ​លើ​សំណើ​សុំ​ឲ្យ​មាន​​ការ​វិនិយោគ​ទៅ​វិញ​កាលពី​ឆ្នាំ​ ២០០៧ ​ដែល​ពេល​នោះ​មាន​លោក ប្រាជ្ញ ចន្ទ ជា​អភិបាល​ខេត្ត​បាត់ដំបង។

លោក​ថា៖ «យើង​ចង់​បាន​ការ​បញ្ជាក់​ពី​រដ្ឋមន្ត្រី ស ខេង ឬ ថ្នាក់​ខេត្ត​ថា​តើ​ខាង​អប់រំ​មាន​បាន​ដឹង​រឿង​នេះ​ទេ? គាត់​មាន​សួរ​មតិ​យោបល់​ពី​ក្រសួង​អប់រំ​ទេ?»។

លោក ហង់ ជួនណារ៉ុន រដ្ឋមន្ត្រី​ក្រសួង​​អប់រំ​មិន​អាច​ទាក់ទង​បាន​ទេ​កាលពី​ម្សិលមិញ​។

លោក ច័ន្ទ សុផល អភិបាល​ខេត្ត​បាត់ដំបង​បាន​ឆ្លើយ​ក្នុង​របាយការណ៍​ក្រុម​ប្រឹក្សា​ខេត្ត​នា​កិច្ចប្រជុំ​ថ្ងៃ​ទី​ ២៧ ឧសភា​ថា​ក្រុមហ៊ុន​មិន​បាន​ដំណើរ​ការ​សាងសង់​ទេ​តែ​មួយ​រយៈ​ក្រោយមក​មាន​ការ​ធ្វើ​រោង​ដែក​តែ​ត្រូវ​អាជ្ញាធរ​ខេត្ត​ហាមឃាត់​។

លោក​និយាយ​ថា៖ «សាលា​ក្រុង​បាន​ចុះ​មក​ឃាត់​ និង​សួរ​នាំ​។ គាត់​ថា​ធ្វើ​កន្លែង​លក់ដូរ​បន្តិចបន្តួច​។ ដូច្នេះ​យើង​មិន​គាំទ្រ​គម្រោង​នេះ​ទេ ...យើង​បាន​ជំរុញ​ឲ្យ​គាត់​ដាក់​ពាក្យ​សា​ជា​ថ្មី​ដើម្បី​វិនិយោគ​ទៅ​តាម​អ្វី​ដែល​គាត់​បាន​សុំ​ពី​ពេល​មុន»​។

លោក សៀង ស៊ុតថង សមាជិក​ក្រុម​ប្រឹក្សា​ខេត្ត​មកពី​គណបក្ស​ប្រជាជន​កម្ពុជា​ថ្លែង​ថា មាន​ការ​លក់ ឬ​ដោះដូរ​ដី​រដ្ឋ​ជាច្រើន​នៅក្នុង​ខេត្ត​បាត់ដំបង​តែ​លោក​មិន​បាន​ដឹង​ពី​បញ្ហា​វិនិយោគ​ពហុកីឡដ្ឋាន​ខេត្ត​នេះ​ទេ ដោយ​លោក​និយាយ​ថា ៖ «ម៉ាស្រុក​ខ្មែរ​គេ​មិន​លក់​តែ​នៅ​ខេត្ត​បាត់ដំបង​នេះ​ទេ ហើយ​ការ​លក់ដូរ ក៏​គេ​មិន​ពិគ្រោះ​ជាមួយ​យើង​ដែរ»​។

ទីតាំង​ពហុកីឡដ្ឋាន​នេះ​ជា​កេរដំណែល​តាំងពី​សម័យ​សង្គមរាស្ត្រ​និយម​សម្រាប់​បម្រើ​ប្រយោជន៍​សាធារណៈ​ត្រូវ​បាន​ទុក​ចោល​ជិត​ ១០ ​ឆ្នាំ​មក​ហើយ​ដែល​ពី​មុន​អគារ​ទាំងនោះ​មាន​សម្រាប់​បម្រើ​កីឡា​ប្រដាល់​ បាល់​បោះ បាល់​ទាត់ បាល់ ទះ​ជាដើម។ ប៉ុន្តែ​កីឡា​ដែល​គេ​និយម​ជាង​គេ​នៅ​ទី​នេះ គឺ​កីឡា​ប្រដាល់​។ នេះ​បើ​តាម​លោក សៅ ប៊ុនធឿន អាយុ​ ៥៨ ​ឆ្នាំ​អ្នក​គ្រូ​ប្រដាល់​នៅ​ក្លិប​ពន្លឺ​សាមគ្គី​ខេត្ត​បាត់ដំបង​។

លោក​ឧកញ៉ា គិត ម៉េង ប្រធាន​ក្រុមហ៊ុន Royal Group មិន​អាច​ទាក់ទង​បាន​ទេ​ដោយ​អ្នក​លើក​ទូរស័ព្ទ​ថា​គាត់​មិន​នៅ​ទេ៕

អត្ថបទគួរចាប់អារម្មណ៍