.jpg)
លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា។ ហេង ជីវ័ន
កណ្ដាលៈ តំណាងរាស្ត្រចំនួន ៩២ រូបបានផ្តួចផ្តើមស្នើធ្វើវិសោធនកម្មច្បាប់ស្តីពីការជ្រើសរើសក្រុមប្រឹក្សារាជធានី ខេត្ត ក្រុង ស្រុក និងក្រុមប្រឹក្សាខណ្ឌ ដើម្បីបង្កើនអាសនៈសម្រាប់ពួកគេក្នុងការជួយពង្រឹងប្រសិទ្ធភាពការងារ និងដើម្បីបង្រួបបង្រួមជាតិ។
យោងតាមលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងឲ្យដឹងក្នុងឱកាសដែលលោកអញ្ជើញជួបសំណេះសំណាលជាមួយកម្មករ-កម្មការិនីប្រមាណ ១៥៦០៦ នាក់ក្នុងខេត្តកណ្តាលកាលពីព្រឹកថ្ងៃទី ២៦ ខែធ្នូ ឆ្នាំ ២០១៨។
លោកថ្លែងថា រដ្ឋសភាបាននិងកំពុងពិនិត្យមើលទៅលើវិសោធនកម្មច្បាប់ស្តីពីការជ្រើសរើសក្រុមប្រឹក្សារាជធានី ខេត្ត ក្រុង ស្រុក និងក្រុមប្រឹក្សាខណ្ឌ ដើម្បីបង្កើនអាសនៈជួយជំរុញ និងពង្រឹងប្រសិទ្ធភាពការងាររបស់ពួកគេឲ្យកាន់តែល្អប្រសើរ។
លោក ហ៊ុន សែន បានថ្លែងថា៖ «ខ្ញុំពិភាក្សាជាមួយសម្តេចក្រឡាហោមពីម្សិលថា យើងនឹងពង្រីកអាសនៈបន្ថែមសម្រាប់សមាជិកក្រុមប្រឹក្សា ស្រុក ខណ្ឌ ក្រុង និងខេត្តឲ្យកើនចំនួនឡើង...។ នៅក្រុមប្រឹក្សាក៏មានកិច្ចការច្រើនដែរ។ យើងកំពុងធ្វើវិសោធនកម្មច្បាប់ទាក់ទងការបោះឆ្នោតក្រុមប្រឹក្សា ហើយក៏ចេញអនុក្រឹត្យ ដើម្បីបង្កើតចំនួនអាសនៈនៅតាមខេត្ត ស្រុក ខណ្ឌ ហើយវាមិនដូចគ្នាទេរវាងរដ្ឋបាល»។
លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មានបានថ្លែងប្រាប់កាសែតភ្នំពេញប៉ុស្តិ៍ថា តំណាងរាស្ត្រចំនួន ៩២ រូបបានផ្ដួចផ្ដើមស្នើវិសោធនកម្មច្បាប់នេះ។
លោកបញ្ជាក់ថា៖ «ទី ១ គឺបង្រួបបង្រួមជាតិ ទី ២ យើងឃើញថាកន្លងទៅនេះ ក្រុមប្រឹក្សារាជធានី ខេត្ត ស្រុក ខណ្ឌ និងក្រុង នៅមានចំនួនតិច ហើយការងារក៏មានច្រើនដូច្នេះហើយយើងចង់បន្ថែមអាសនៈមួយចំនួនទៀតដើម្បីជួយដល់មន្ត្រីមូលដ្ឋាន និងប្រជាពលរដ្ឋមូលដ្ឋានដើម្បីជួយការអភិវឌ្ឍថ្នាក់ក្រោមជាតិ»។
លោក ឯម សុវណ្ណារ៉ា អ្នកវិភាគនយោបាយបានលើកឡើងថា ការពង្រីកអាសនៈក្រុមប្រឹក្សានៅពេលនេះវាអាចធ្វើឲ្យខាតបង់ថវិកាជាតិ។
លោកថ្លែងថា៖ «កាលណាយើងពង្រីកធំ វាចំណាយថវិកាជាតិកាន់តែធំ»។ រាជរដ្ឋាភិបាលបានកំណត់យកថ្ងៃអាទិត្យ ទី ២៦ ខែឧសភា ឆ្នាំ ២០១៩ ជាកាលបរិច្ឆេទនៃការបោះឆ្នោតលើកទី ៣ ដើម្បីជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ជាការបោះឆ្នោតអសកល៕
