The Phnom Penh Post Search

Search form

Logo of Phnom Penh Post newspaper Phnom Penh Post - តំណាងរាស្ត្រ​ស្នើ​ក្រសួង​មហាផ្ទៃ​​ ជួយ​ពលករ​ខ្មែរ​​រឿង​លិខិត​ឆ្លង​ដែន




តំណាងរាស្ត្រ​ស្នើ​ក្រសួង​មហាផ្ទៃ​​ ជួយ​ពលករ​ខ្មែរ​​រឿង​លិខិត​ឆ្លង​ដែន

ពលករ​ខ្មែរ​​​ដែល​ប្រុង​ឆ្លងដែន​ទៅ​ធ្វើការ​នៅ​ថៃ​នា​ពេល​កន្លង​មក។
ពលករ​ខ្មែរ​​​ដែល​ប្រុង​ឆ្លងដែន​ទៅ​ធ្វើការ​នៅ​ថៃ​នា​ពេល​កន្លង​មក។ ម៉ៃ វីរៈ

តំណាងរាស្ត្រ​ស្នើ​ក្រសួង​មហាផ្ទៃ​​ ជួយ​ពលករ​ខ្មែរ​​រឿង​លិខិត​ឆ្លង​ដែន

ភ្នំពេញៈ ក្រុម​អ្នក​តំណាងរាស្រ្ត​​​គណបក្ស​សង្គ្រោះ​​​​ជាតិ​កាលពី​ម្សិលមិញ​បាន​​ស្នើ​​​ដល់​​រដ្ឋមន្រ្តី​​​ក្រសួង​មហាផ្ទៃ​អន្តរាគមន៍​​​ជួយ​​​​​ដល់​​ពលករ​ខ្មែរ​​ចំណាក​ស្រុក​​​ដែល​កំពុង​ធ្វើការ​នៅ​ប្រទេស​ថៃ​ដើម្បី​ឲ្យ​ពួកគេ​ទទួល​បាន​​​លិខិត​ឆ្លង​ដែន​​​សញ្ជាតិ​​​​ខ្មែរ​។

យោង​តាម​​លិខិត​របស់​​ក្រុម​អ្នក​តំណាងរាស្រ្ត​​គណបក្ស​សង្គ្រោះ​​ជាតិ​ផ្ញើ​ជូន​លោក​​ឧបនាយក​រដ្ឋមន្ត្រី ស ខេង រដ្ឋមន្រ្តី​​ក្រសួង​មហាផ្ទៃ​តាមរយៈ ​លោក ងួន ញ៉ិល ប្រធាន​​ស្តីទី​រដ្ឋសភា​បាន​ឲ្យ​ដឹង​ថា​ក្រសួង​​មហាផ្ទៃ​ក្រសួង​ការបរទេស​​ និង​ក្រសួង​​ការងារ​បាន​ចុះ​ធ្វើ​​លិខិត​ឆ្លងដែន​សញ្ជាតិ​ខ្មែរ​​ជូន​ដល់​ពលករ​ខ្មែរ​​ដែល​​កំពុង​ធ្វើការ​ និង​មិន​មាន​លិខិត​ឆ្លង​ដែន​សញ្ជាតិ​ខ្មែរ​​នៅ​តាម​បណ្តា​​ខេត្ត​នានា​នៃ​ប្រទេស​ថៃ​តាំងពី​ខែ​មករា ឆ្នាំ​ ២០១៥​ មក​ម្ល៉េះ។​

ប៉ុន្តែ​ រហូត​មក​ទល់​ពេល​​​​នេះ​ពលករ​ខ្មែរ​រាប់​សែន​​នាក់​នៅ​ប្រទេស​​ថៃ​ដែល​បាន​បង់​ប្រាក់​ក្នុង​ម្នាក់​ចំនួន​ ១៤០០ ​បាត​ដើម្បី​​ធ្វើ​លិខិត​ឆ្លង​ដែន​​សញ្ជាតិ​ខ្មែរ​នោះ​នៅ​ពុំ​ទាន់​បាន​ទទួល​​នៅ​ឡើយ​។​

លិខិត​បន្ត​ថា៖ «សូម​​រដ្ឋមន្រ្តី​​មេត្តា​ជួយ​​អន្តរាគមន៍ ​និង​​ចាត់​វិធានការ​ដើម្បី​ឲ្យ​ពលករ​ខ្មែរ​ចំណាក​ស្រុក​​​ដែល​​បាន​ធ្វើ​លិខិត​ឆ្លងដែន​​សញ្ជាតិ​ខ្មែរ​នៅ​ប្រទេស​ថៃ​កន្លង​មក​អាច​ទទួល​បាន​​លិខិ​ឆ្លងដែន​សញ្ជាតិ​ខ្មែរ​»។

លោក គី វណ្ណថារ៉ា អ្នក​តំណាង​រាស្រ្ត​គណបក្ស​​សង្គ្រោះ​ជាតិ​ថ្លែង​ថា​លោក​​បាន​​ទទួល​ព័ត៌មាន​ថា​​​ មាន​ពលករ​ជាច្រើន​ពាន់​នាក់​មិន​ទាន់​ទទួល​បាន​លិខិត​​ឆ្លងដែន​ហើយ​​​ពលករ​ខ្មែរ​​ខុស​ច្បាប់​​នៅ​ថៃ​ភាគច្រើន​មាន Resident Card ចេញ​​​ដោយ​​​អាជ្ញាធរ​ថៃ​តែ​ប័ណ្ណ​ទាំង​នោះ​​មិនមែន​ជា​ប័ណ្ណ​​ដែល​ផ្តល់​ភាព​​​ងាយ​ស្រួល​សម្រាប់​ពួកគេ​​ធ្វើ​ដំណើរ​ដូច​លិខិត​ឆ្លងដែន​​នោះ​​​ទេ​។​

លោក​​​ថា​៖ «អាជ្ញាធរ​ថៃ​​គេ​ចេញ​ Resident Card ឲ្យ​ខ្មែរ​​បើ​ចេញ​នៅ​​បាងកក​គឺ​ធ្វើ​ដំណើរ​រក​ការងារ​បាន​នៅ​បាងកក​ដល់​ទៅ​ខេត្ត​ផ្សេង​​អត់​បាន​ទេ​មិនមែន​ដូច​លិខិត​ឆ្លង​​ដែន​នោះ​​ទេ​»។

អ្នក​នាំពាក្យ​ក្រសួង​មហាផ្ទៃ​លោក ប៉ោ ភក្តិ មិន​អាច​សុំ​​អធិប្បាយ​បាន​ទេ។

ចំណែក​អ្នក​នាំ​ពាក្យ​ក្រសួង​ការងារ​ និង​បណ្តុះ​បណ្តាល​វិជ្ជាជីវៈ​លោក ហេង សួរ បាន​បដិសេធ​ឆ្លើយតប​​ព្រោះ​លិខិត​នោះ​​ផ្ញើ​ទៅ​រដ្ឋមន្រ្តី​ក្រសួង​មហាផ្ទៃ​។

យោង​តាម​​លិខិត​​របស់​ក្រសួង​ការបរទេស ​​និង​សហប្រតិបត្តិការ​អន្តរជាតិ​បាន​ផ្ញើ​​មក​ភ្នំពេញ​ប៉ុស្តិ៍​នៅ​ពេល​ថ្មីៗ​នេះ​បាន​ឲ្យ​ដឹង​ថា​ក្នុង​​ឆ្នាំ​​ ២០១៥ ​ក្រសួង​​បាន​​​​ជួយ​សម្រួល​​ស្នើសុំ​ទិដ្ឋាការ​ជូន​​ពលករ​​កម្ពុជា​​ដែល​​ទៅ​ធ្វើការ​នៅ​ប្រទេស​​ថៃ​​​ក្នុង​ក្របខ័ណ្ឌ​នៃ​អនុស្សរណៈ​រវាង​ប្រទេស​ទាំង​ពីរ​បាន​​ចំនួន​ ៦៨១៧៤ នាក់​។​

ចំណែក​​​ក្នុង​ឆមាស​ទី​ ១ ​ឆ្នាំ​​ ២០១៦ ក្រសួង​​បាន​ជួយ​សម្រួល​ស្នើសុំ​ទិដ្ឋាការ​ជូន​ពលករ​កម្ពុជា​បាន​ចំនួន​ ៤២៧៤៣ ​នាក់៕

អត្ថបទគួរចាប់អារម្មណ៍