.jpg)
ឈើដែលគេឃើញក្នុងរថយន្តក្រឡាប់នៅមណ្ឌលគិរីថ្មីៗនេះ។ រូប Meatophoum News
មណ្ឌលគិរីៈ តំណាងសហគមន៍នៅមណ្ឌលគិរីបានអះអាងថា ការដឹកឈើខុសច្បាប់ឆ្លងដែនទៅវៀតណាមនៅតែបន្តកើតមានឥតឈប់ឈរ និងទ្រង់ទ្រាយធំ បើទោះបីនាយករដ្ឋមន្ត្រីបានព្រមាន និងបញ្ជាឲ្យឧទ្ធម្ភាគចក្រតាមដានអ្នកលួចកាប់ព្រៃឈើ ហើយបាញ់ពីលើ ខណៈរដ្ឋមន្ត្រីមហាផ្ទៃលោក ស ខេង ក៏បានព្រមានបន្ថែមយ៉ាងណាក្តី។
លោក ក្រើន តុលា តំណាងសហគមន៍នៅមណ្ឌលគិរីបានថ្លែងកាលពីម្សិលមិញថា ការដឹកឈើខុសច្បាប់ទៅប្រទេសវៀតណាមនៅតែកើតមានដដែល ហើយមានទ្រង់ទ្រាយធំទៀតផងដោយទំនងមានការឃុបឃិតជាមួយមន្ត្រីមូលដ្ឋាន និងអ្នកមានអំណាច។
លោកបានបញ្ជាក់ថា៖ «យើងសង្កេតឃើញមានការដឹកឈើខុសច្បាប់ឆ្លងដែនទៅប្រទេសវៀតណាមនៅតែកើតមានឥតឈប់ឈរ និងទ្រង់ទ្រាយធំហើយឥឡូវហ្នឹងសម្រុកយកចេញ។
ក្នុង ១ យប់មានឡានចេញទៅវៀតណាមពី ៣០ ទៅ ៧០ គ្រឿង ហើយយប់មិញ [យប់ម្សិល] នេះមានឡានចេញទៅវៀតណាមរហូតទៅដល់ ៦៥ គ្រឿង។ នេះបើតាមនគរបាលបានប្រាប់ខ្ញុំ»។
លោកបានបញ្ជាក់៖ «យើងឃើញការដឹកឈើនេះវាធ្វើឲ្យខូចផ្លូវសាធារណៈរបស់រដ្ឋ។
រដ្ឋខិតខំធ្វើហើយចំណាយលុយជាតិច្រើន ប៉ុន្តែក្រុមដឹកឈើបានដឹកឈើអនាធិបតេយ្យ និងគេចពន្ធភាគច្រើន ហើយពុំមានលិខិតជញ្ជូនទេ។ មិនយូរទេប្រទេសយើងនឹងក្លាយទៅជាប្រទេសដែលមានការរញ្ជួយដី និងគ្រោះធម្មជាតិដូចជាគ្រោះរាំងស្ងួត។ ការកាប់បំផ្លាញព្រៃឈើវាធ្វើឲ្យប៉ះពាល់ដល់ប្រភពទឹក ជម្រកសត្វព្រៃគ្រប់បែបយ៉ាង ខាតបង់ថវិការដ្ឋ»។
ប៉ុន្តែលោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរីបានច្រានចោលការចោទប្រកាន់នេះដោយបានលើកឡើងថា ពុំមានការអនុញ្ញាតណាមួយឱ្យនាំឈើក្រៅប្រទេសនោះទេ។
លោកបានបញ្ជាក់ថា៖ «គ្មាននរណាអនុញ្ញាតឲ្យនាំឈើខុសច្បាប់ទៅក្រៅស្រុកនោះទេ»។
ទោះបីយ៉ាងណាលោកស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានស្នើឲ្យសហគមន៍ទាំងនោះរាយការណ៍ទៅរដ្ឋបាលព្រៃឈើ និងអាជ្ញាធរពាក់ព័ន្ធដើម្បីឲ្យក្រសួងចាត់វិធានការទាន់ពេលវេលាក្នុងការទប់ស្កាត់ការកាប់បំផ្លាញ និងដឹកជញ្ជូនព្រៃឈើខុសច្បាប់នេះ ប៉ុន្តែលោកថាមិនបានទទួលព័ត៌មានទាក់ទងនឹងការលើកឡើងរបស់តំណាងសហគមន៍នៅមណ្ឌលគិរីនោះទេ។
លោកបញ្ជាក់ថា៖ «ប្រសិនបើបងប្អូនឃើញហើយសូមបងប្អូនរាយការណ៍មកដើម្បីយើងចាត់វិធានការដើម្បីឲ្យមន្ត្រីរបស់យើងហ្នឹងធ្វើសកម្មភាពឲ្យទាន់ពេលវេលា»។
ប្រធានការិយាល័យនគរបាលចរាចរណ៍ខេត្តមណ្ឌលគិរីលោក យឹម ចិន្តាបានឲ្យដឹងថា កាលពីយប់ថ្ងៃទី ១ ខែវិច្ឆិកាឆ្នាំនេះមានរថយន្តដឹកឈើ ១ គ្រឿងបានក្រឡាប់បណ្តាលឲ្យស្លាប់ម្នាក់ និងរបួសធ្ងន់ម្នាក់នៅចំណុចអូរងើយ ភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ប៉ុន្តែត្រូវបានគេអះអាងថា ការដឹកឈើនោះគឺមានច្បាប់អនុញ្ញាតត្រឹមត្រូវដែលមានឈើទំហំប្រមាណ ១០ ម៉ែត្រគុបដឹកចេញពីក្រុមហ៊ុនលីរិទ្ធីគ្រុបនៅស្រុកកោះញែក សំដៅទៅខេត្តត្បូងឃ្មុំ។
លោក យឹម ចិន្តា បានបញ្ជាក់ថា៖ «ឈើទាំងអស់នោះត្រូវបានយកទៅរក្សាទុកនៅទីស្នាក់ការបរិស្ថាន។ ឈើទាំងនោះមានសុក្រំ កកោះ លាយគ្នា»។
ប៉ុន្តែលោក ផែង វណ្ណៈ មន្ត្រីកងយោធពលខេមរភូមិន្ទបានបង្ហោះលើហ្វេសប៊ុករបស់លោកកាលពីថ្ងៃទី ១ ខែវិច្ឆិកាទាក់ទងនឹងករណីរថយន្តដឹកឈើក្រឡាប់នេះដោយសម្ដែងជាចម្ងល់ថា តើជាបទល្មើស ឬមិនមែន ខណៈអភិបាលខេត្តមណ្ឌលគិរីបានថា គ្មានបទល្មើសព្រៃឈើនោះ។
លោកថា៖ «...ខេត្តមណ្ឌលគិរីដែលឯកឧត្តមគ្រប់គ្រងនេះជាខេត្តដែលបំផ្លាញព្រៃឈើខ្លាំងជាងខេត្តណាៗទាំងអស់»។
លោក ស្វាយ សំអ៊ាង អភិបាលខេត្តមណ្ឌលគិរីកាលពីម្សិលមិញបានបដិសេធបំភ្លឺទាក់ទងនឹងការលើកឡើងរបស់លោក ផែង វណ្ណៈ និងការចោទប្រកាន់ពីសហគមន៍នៅខេត្តមណ្ឌលគិរីនេះ។ ប៉ុន្តែលោក អ៊ុំ វណ្ណសុភ: នាយខណ្ឌរដ្ឋបាលព្រៃឈើខេត្តមណ្ឌលគិរីបានប្រាប់សារព័ត៌មានក្នុងស្រុកដោយបានច្រានចោលចំពោះចោទប្រកាន់នោះ និងថាគ្មានមូលដ្ឋានច្បាស់លាស់។
ទាក់ទងនឹងបទល្មើសព្រៃឈើនេះដែរលោកនាយករដ្ឋមន្ត្រីធ្លាប់បានព្រមានឲ្យចាប់ក្រុមចោរលួចកាប់ឈើទាំងនោះ ហើយជាថ្មីម្តងទៀតបានបញ្ជាប្រើឧទ្ធម្ភាគចក្រតាមដាន និងបាញ់ពីលើតែម្តង បន្ទាប់ពីលោក ស ខេង បានស្តីបន្ទោសលោក ស្វាយ សំអ៊ាង អភិបាលខេត្តមណ្ឌលគិរី ចំពោះបទល្មើសព្រៃឈើដែលនៅតែបន្តកើតមានក្នុងខេត្តមណ្ឌលគិរីកន្លងទៅ៕
