កំពង់ស្ពឺៈ តំណាងកម្មករដែលរងការបណ្តេញចេញពីការងារបានអំពាវនាវឲ្យកម្មករចូលធ្វើការវិញតាមសេចក្តីសម្រេចជាលើកទី ២ របស់សាលាដំបូងខេត្តកំពង់ស្ពឺដែលកំណត់ឱសានវាទត្រឹម ៤៨ ម៉ោង បន្ទាប់ពីកម្មករបានផ្ទុះការតវ៉ាជាថ្មី និងបានស្វែងរកកិច្ចអន្តរាគមន៍ពីក្រសួងការងារកាលពីចុងសប្តាហ៍មុន។
កម្មកររោងចក្រ ម៉ូណូភា Monopia (Cambodia) ៦០០ នាក់ បានផ្ទុះការតវ៉ាតាំងនៅមុខរោងចក្រក្នុងស្រុកសំរោងទង ខេត្តកំពង់ស្ពឺកាលពីថ្ងៃទី ១៤ ខែវិច្ឆិកា ក្រោយទទួលដំណឹងពីការបញ្ឈប់តំណាងពួកគេ ២ នាក់ ហើយការតវ៉ានេះសាលាដំបូងខេត្តកំពង់ស្ពឺបានចេញដីការក្សាការពារម្តងរួចមកហើយឲ្យកម្មករចូលធ្វើការវិញ ខណៈមានកម្មករចំនួន ៧ នាក់ទៀតក៏ត្រូវបានព្យូរការងារផងដែរ។
លោក អឿន ចាន់នី តំណាងកម្មករដែលត្រូវបានរោងចក្របញ្ឈប់ពីការងារបានប្រាប់ភ្នំពេញប៉ុស្តិ៍ពីម្សិលមិញថា ក្រោយតវ៉ាជាបន្តបន្ទាប់នេះកាលពីចុងសប្តាហ៍មុនមានកម្មករជាច្រើនរយនាក់បានប្រមូលផ្តុំគ្នានៅមុខក្រសួងការងារដើម្បីសុំកិច្ចអន្តរាគមន៍ឲ្យរោងចក្រទទួលកម្មករ និងតំណាងរបស់ពួកគេ ៩ នាក់ឲ្យចូលធ្វើការវិញ។
លោកបញ្ជាក់ថា ក្នុងអំឡុងការតវ៉ានេះសាលាដំបូងខេត្តកំពង់ស្ពឺក៏បានចេញសេចក្តីសម្រេចជាលើកទី ២ ដោយតម្រូវឲ្យកម្មករទាំងអស់ចូលធ្វើការវិញក្នុងអំឡុងពេល ៤៨ ម៉ោង។ ប៉ុន្តែលោកថា រហូតមកទល់រសៀលថ្ងៃចន្ទ [ម្សិលមិញ] មានកម្មករជាច្រើនមិនព្រមចូលធ្វើការទេ ប៉ុន្តែក្នុងនាមតំណាងលោកស្នើឲ្យកម្មករចូលធ្វើការវិញចៀសវាងខុសនីតិវិធីរបស់សាលាដំបូងខេត្ត។
លោកបញ្ជាក់ថា៖ «ខ្ញុំសុំឲ្យកម្មករចូលធ្វើការសិន ព្រោះដីការក្សាការពារសម្រេច ៤៨ ម៉ោង ឲ្យកម្មករចូលធ្វើការវិញ។ យើងនឹងបន្តដើរតាមនីតិវិធីក្រុមប្រឹក្សាអាជ្ញាកណ្តាល (ក្រសួងការងារ) ដែលយើងបានដាក់ពាក្យបណ្តឹងសុំដំណោះស្រាយ។ យើងធ្វើបែបនេះដើម្បីក្រុមប្រឹក្សាអាជ្ញាកណ្តាលដោះស្រាយ ហើយបើអាជ្ញាកណ្តាលថា ម៉េចៗទៀតយើងមានសិទ្ធិធ្វើកូដកម្មបន្តទៀត»។
លោក ស៊ន វិរៈ អ្នកនាំពាក្យសាលាដំបូងខេត្តកំពង់ស្ពឺបានប្រាប់ភ្នំពេញប៉ុស្តិ៍យ៉ាងខ្លីកាលពីម្សិលមិញថា សាលាដំបូងខេត្តពិតជាបានសម្រេចជាលើកទី ២ ឲ្យកម្មកររោងចក្រនេះចូលធ្វើការវិញក្នុងអំឡុងពេល ៤៨ ម៉ោងមែន ប៉ុន្តែលោកបានបដិសេធធ្វើអត្ថាធិប្បាយបន្ថែមពីករណីនេះ។
លោកបានថ្លែងថា៖ «ខ្ញុំនឹងជូនដំណឹងពេលក្រោយ។ រឿងអ្វីផ្សេងទៀត សុំអញ្ញើញមកជួបគាត់ [តុលាការ] ផ្ទាល់ទៅ»។
អ្នកនាំពាក្យក្រសួងការងារលោក ហេង សួរ មិនអាចសុំការអត្ថាធិប្បាយបានទេ ខណៈលោក ទេស រុក្ខាផល អគ្គលេខាធិការរងនៃអគ្គលេខាធិការដ្ឋាននៃគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញានៃក្រសួងការងារក៏មិនអាចទាក់ទងសុំការអត្ថាធិប្បាយបានដូចគ្នា កាលពីម្សិលមិញ។
លោក សំ សុជា ប្រធានរដ្ឋបាលរោងចក្រ ម៉ូណូភា ក៏មិនអាចសុំអត្ថាធិប្បាយបានដែរកាលពីម្សិលមិញ។ ប៉ុន្តែលោកធ្លាប់បានប្រាប់ភ្នំពេញប៉ុស្តិ៍ថា រោងចក្រគ្មានជំហរទទួលយកតំណាងកម្មករ ២ នាក់ឲ្យចូលធ្វើការវិញទេ ដោយសារការបញ្ឈប់ពីការងារនេះធ្វើឡើងដោយមានការអនុញ្ញាតពីមន្ត្រីអធិការកិច្ចនៃមន្ទីរការងារខេត្តបន្ទាប់ពីចុះអង្កេត រកឃើញថាពួកគេពិតជាមានកំហុសនោះ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានថ្លែងថា វិវាទនឹងកាន់តែរីកធំឡើងនៅពេលរោងចក្រតែងតែប្រើប្រាស់ប្រព័ន្ធតុលាការមកដាក់គំនាបលើកម្មករ ហើយដើរតួនាទីជំនួសឲ្យយន្តការនៃការដោះស្រាយវិវាទការងារ។
លោកថា៖ «ដើម្បីឲ្យដំណោះស្រាយមួយមានភាពល្អប្រសើរនិយោជកមិនត្រូវប្រើប្រព័ន្ធតុលាការ ឬមួយក៏តុលាការត្រូវពិនិត្យមើលលើថៅកែដែលប្រើប្រាស់ដីការក្សាការពារហ្នឹងយកមកបញ្ឈប់កម្មករ ឬបណ្តេញកម្មករចេញពីរោងចក្រ និងដាក់សម្ពាធ គំរាមកំហែងកម្មករមិនឲ្យតវ៉ាដែលទាំងអស់នេះ យើងកុំប្រើប្រាស់អាហ្នឹង។ យើងមានប្រព័ន្ធច្បាប់ជាគោល ហើយបើមន្ត្រីទាំងអស់គាត់ធ្វើការដោយតម្លាភាពយើងអាចប្រើប្រាស់ច្បាប់ការងារជាគោល»។
លោក ស៊ីណា បញ្ជាក់ថាដំណោះស្រាយគឺមានតែការចេញសេចក្តីសម្រេចរបស់ក្រសួងការងារដើម្បីបញ្ជាឲ្យរោងចក្រនៅតែទទួលតំណាងកម្មករហើយសេចក្តីសម្រេចនេះត្រូវតែមានអានុភាពឲ្យភាគីរោងចក្រគោរពតាម និងចៀសវាងប្រើប្រាស់ប្រព័ន្ធតុលាការ៕