ខេត្តកោះកុង: សាលាដំបូងខេត្តកោះកុងកាលពីម្សិលមិញបានសម្រេចឃុំខ្លួនបុរសម្នាក់ឈ្មោះ ហេង សុខ តំណាងពលរដ្ឋ ៥០ គ្រួសារឱ្យជាប់ពន្ធនាគាររយៈពេល ១ ឆ្នាំ ៦ ខែ និងពិន័យជាប្រាក់ ២ លានរៀលពាក់ព័ន្ធនឹងករណីទំនាស់ដីធ្លីជាមួយក្រុមហ៊ុន LYP GROUP របស់ឧកញ៉ា លី យ៉ុងផាត់ ជាការសម្រេចដែលមន្ត្រីសិទ្ធិមនុស្ស និងគ្រួសារជនជាប់ចោទថា អយុត្តិធម៌។
ការចេញសាលក្រមនេះបន្ទាប់ពីបើកសវនាការកាលពីថ្ងៃទី ២៨ កក្កដាឆ្នាំនេះ ក្រោមការចោទប្រកាន់ពីបទ- «ប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត» តាមមាត្រា ២៥៣ នៃច្បាប់ភូមិបាល បន្ទាប់ពីលោក ហេង សុខ បានចូលទៅបោះបង្គោលព្រំលើដីកំពុងមានទំនាស់។
កាលពីថ្ងៃទី ២១ និង ២២ ខែកុម្ភៈឆ្នាំមុន លោក ហេង សុខ វ័យ ៤៨ ឆ្នាំតំណាងពលរដ្ឋ ៥០ គ្រួសារបានចូលទៅបោះបង្គោលព្រំដីនៅលើដីទំនាស់ចំនួន ១០៣ ហិកតាដើម្បីចរចាជាមួយក្រុមហ៊ុននេះ។ លុះដល់ថ្ងៃទី ២៣ កុម្ភៈ បុរសរូបនេះត្រូវសមត្ថកិច្ចឃាត់ខ្លួនទៅតាមបណ្តឹងលោក ចាន់ ណាគ្រី ជាមេការ LYP GROUP។ នេះបើតាមមន្ត្រីសិទ្ធិមនុស្សប្រចាំខេត្តកោះកុង។
លោក មាន ព្រហ្មមុនី មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តកោះកុងបានឲ្យដឹងថាការសម្រេចឃុំខ្លួនតំណាងសហគមន៍ទំនាស់ដីធ្លីនេះគឺជារឿងអយុត្តិធម៌បំផុត ព្រោះពួកគាត់ជាម្ចាស់ដីផ្ទាល់ និងបានកាន់កាប់ដោយសុចរិតមុនក្រុមហ៊ុនទទួលបានដីសម្បទានពីរដ្ឋាភិបាល ប៉ុន្ដែបែរជាត្រូវបានជាប់ទោសទៅវិញ។
លោកបញ្ជាក់ថា៖ «យើងសូមអំពាវនាវឲ្យមានការដោះលែងគាត់ដើម្បីបានចូលរួមដោះស្រាយដីធ្លីដោយសន្ដិវិធីហើយបើកឲ្យពលរដ្ឋផ្សេងមានសិទ្ធិចូលរួមដែរក្នុងគោលបំណងឲ្យមានតម្លាភាព យុត្តិធម៌ ត្រឹមត្រូវ និងពលរដ្ឋអាចទទួលបានដីគ្រប់ៗគ្នាផង»។
អ្នកស្រី អ៊ុំ តេង អាយុ ៦៥ ឆ្នាំត្រូវជាម្ដាយក្មេកលោក ហេង សុខ បានថ្លែងពីម្សិលមិញថាវាជារឿងអយុត្តិធម៌ណាស់ចំពោះការសម្រេចរបស់តុលាការនេះ។ ពលរដ្ឋដែលមានលោក ហេង សុខ ជាតំណាងធ្លាប់បានដាក់ពាក្យស្នើសុំទៅខេត្តឲ្យឆ្វៀលដី តែរដ្ឋបាលខេត្តមិនព្រមដោះស្រាយបែរជាចាប់ខ្លួនគាត់ចោទពីរឿងព្រហ្មទណ្ឌ។
អ្នកស្រីបញ្ជាក់ថា៖ «អ៊ីចឹងយើងគិតថា រឿងហ្នឹងវាអយុត្តិធម៌សម្រាប់ពលរដ្ឋ ហើយខ្ញុំថាការឃុំខ្លួនគាត់ម្នាក់ទៀតនេះ យើងគិតថាក្រុមហ៊ុននេះគឺមិនមែនជាក្រុមហ៊ុនដែលអភិវឌ្ឍជួយពលរដ្ឋឲ្យរួចផុតពីភាពក្រីក្រទេ។ សូមដោះលែងកូនខ្ញុំវិញមក គ្មានអ្នកនៅមើលថែគ្រួសារគេទេ កូនក៏តូចៗប្រពន្ធក៏គ្មានមុខរបរដែរពួកគេកំពុងវេទនាខ្លាំងណាស់លោកតុលាការអើយ»។
លោក អ៊ុន សុវណ្ណធានី អ្នកនាំពាក្យ និងជាព្រះរាជអាជ្ញារងអមសាលាដំបូងខេត្តកោះកុងបានបដិសេធធ្វើអធិប្បាយដោយលោកឆ្លើយថា កំពុងជាប់រវល់ការងារផ្ទាល់ខ្លួន។
លោក ចាន់ ណាគ្រី មេការក្រុមហ៊ុន លី យ៉ុងផាត់ បានលើកឡើងថាលោកមិនទាន់ដឹងពីការប្រកាសសាលក្រមនៃរឿងនេះទេដោយលោកថារវល់នៅភ្នំពេញ ប៉ុន្ដែលោកនៅតែថាឈ្មោះ ហេង សុខ បានរំលោភដីក្រុមហ៊ុនទាំងគាត់មិនមានឯកសារគ្រប់គ្រាន់។
លោកបញ្ជាក់ថា៖ «ដីនេះមិនមែនជារបស់ពួកគាត់ទេ ព្រោះក្រុមហ៊ុនមានអាជ្ញាប័ណ្ណត្រឹមត្រូវពីរដ្ឋាភិបាលដោយបានកំណត់ព្រំដី និងមានរបងច្បាស់លាស់ ហើយពួកគាត់ចេះតែមកចង្អុលថា កន្លែងនេះដីគាត់ កន្លែងនោះដីគាត់ ហើយយើងធ្វើនេះគឺតាមនីតិវិធីច្បាប់យើងមិនអនុញ្ញាតឲ្យអ្នកណាមករំលោភដីក្រុមហ៊ុនផ្ដេសផ្ដាសទេ។ កន្លងមកពួកគាត់ដើរតែចោទថា ក្រុមហ៊ុនរំលោភដីគាត់ ប៉ុន្ដែគ្មានទេគឺពួកគាត់ទេ ដែលមករំលោភដីក្រុមហ៊ុន»។
ប៉ុន្តែបើតាមបណ្តឹងរបស់លោក ហេង សុខ ទំនាស់នេះបានកើតឡើងពេលក្រុមហ៊ុននេះបានចូលមកដល់តំបន់ព្រែកខ្សាច់នៅឆ្នាំ ២០០៥។ លុះដល់ខែកុម្ភៈឆ្នាំ ២០១៦ ជម្លោះរីកកាន់តែធំ ខណៈក្រុមហ៊ុនបាននាំមន្ត្រីបរិស្ថានមកបោះបង្គោលព្រំដីចំនួន ៦ ចាប់ពីចំណុចឆាយក្រូចមកដល់ចំណុចលើត្រពាំងគាក្នុងភូមិសំរុងតាកែវ។ ការបោះបង្គោលនេះបានហ៊ុមព័ទ្ធផ្ទៃដីសរុប ១០៣ ហិកតាដែលពលរដ្ឋ ៥០ គ្រួសារអះអាងថា ជាដីពួកគាត់។
ពាក្យបណ្តឹងដដែលរៀបរាប់ថាក្រោយមកគឺនៅខែធ្នូ ឆ្នាំ ២០១៧ ក្រុមហ៊ុនដែលមានលោក ចាន់ ណាគ្រី ជាតំណាងបានឱ្យគ្រឿងចក្រឈូសឆាយធ្វើឲ្យបាត់ស្លាកស្នាមព្រំដីពលរដ្ឋអស់។
ពាក្យបណ្តឹងបានបញ្ជាក់ថា៖ «ពួកខ្ញុំនាំគ្នាចេញទៅតវ៉ាសុំឲ្យគ្រឿងចក្រផ្អាកការឈូសឆាយក៏តំណាងក្រុមហ៊ុនមិនព្រមស្តាប់ដែរ»។
ក្នុងបណ្តឹងនោះលោក ហេង សុខ ក៏បានសុំអន្តរាគមន៍ពីអភិបាលខេត្តលោកស្រី មិថុនាភូថង គឺ «ស្នើសុំឆ្វៀលផ្ទៃដីទំហំ ១០៣ ហិកតាដែលមានទីតាំងនៅចំណុចវាលពួចធំ ភូមិសំរុងតាកែវ ឃុំព្រែកខ្សាច់ ស្រុកគិរីសាគរពីទីតាំងអនុវត្តគម្រោងរបស់ក្រុមហ៊ុន និងសុំចុះបញ្ជីដីគ្រប់គ្រងជាកម្មសិទ្ធិ»។
ជម្លោះដីធ្លីនេះបានកើតឡើងក្រោយពីក្រុមហ៊ុននេះបានទទួលដីសម្បទានសេដ្ឋកិច្ចប្រមាណ ៩៩៧៧ ហិកតាពីរដ្ឋាភិបាលនៅឆ្នាំ ២០១០។ ផ្ទៃដីកំពុងកើតមានជម្លោះនេះគឺស្ថិតក្នុងតំបន់ឧទ្យានជាតិបទុមសាគរដែលមានព្រំប្រទល់ជាប់ប្រទេសថៃ៕