The Phnom Penh Post Search

Search form

Logo of Phnom Penh Post newspaper Phnom Penh Post - តំណាង​គ្រូ ៣២នាក់ នឹង​មក​លើក​ពី​កង្វល់​ដាក់​ជូន​រដ្ឋ​មន្ត្រី

តំណាង​គ្រូ ៣២នាក់ នឹង​មក​លើក​ពី​កង្វល់​ដាក់​ជូន​រដ្ឋ​មន្ត្រី

តំណាង​គ្រូ ៣២នាក់ នឹង​មក​លើក​ពី​កង្វល់​ដាក់​ជូន​រដ្ឋ​មន្ត្រី

ភ្នំពេញៈ តំណាង​គ្រូ​បង្រៀន មក​ពី​តាម​បណ្តា​ខេត្ត-រាជធានី ជាង ២០ ក្នុង​ប្រទេស​នឹង​មក​ជួប​ជុំ​គ្នា​ក្នុង​សិក្ខាសាលា​មួយ​ដែល​រៀបចំ ដោយ​សមាគម​គ្រូ​បង្រៀន​កម្ពុជា​ឯករាជ្យ ដែល​មាន​រយៈ​ពេល ៣ថ្ងៃ គឺ​ចាប់​ពី​ថ្ងៃ ទី៨ ដល់​ថ្ងៃ ទី១០ ខែ វិច្ឆិកា នៅ​ភោជនីយដ្ឋាន​ទន្លេ បាសាក់ ក្នុង​រាជធានី​ភ្នំពេញ។

លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ្យ​នេះ​កាល​ពី​ម្សិលមិញ​បាន ឲ្យ​ដឹង​ថា លោក​គ្រូ អ្នក​គ្រូ ជា​តំណាង​ឲ្យ​គ្រូ​នៅ​ក្នុង​ប្រទេស​ប្រមាណ​ជា ៣២នាក់ នឹង​មក​ចូល​រួម​ក្នុង​សិក្ខាសាលា​ពី​ថ្ងៃ ទី៨ ដល់​ថ្ងៃ ទី១០ វិច្ឆិកា នេះ ដើម្បី​លើក​ឡើង​អំពី​ទុក្ខ​កង្វល់​និង​បញ្ហា​ប្រឈម​របស់​ខ្លួន​នៅ​ក្នុង​វិស័យ​អប់រំ។

លោក រ៉ុង ឈុន បាន​និយាយ​កាល​ពី​ម្សិលមិញ​ថា៖ «យើង​ធ្វើ​ការ​ផ្តោត​លើ​គោល​នយោបាយ​អប់រំ និង​ការ​ផ្តល់​ឱកាស​ឲ្យ​គ្រូ​បង្រៀន​ទាំង​នោះ លើក​ឡើង​ពី​បញ្ហា​ប្រឈម​របស់​ពួក​គេ​ដែល​កំពុង​ជួប​ប្រទះ​រាល់​ថ្ងៃ​នេះ។ បន្ទាប់​មក​យើង​នឹង​ប្រមូល​នូវ​ទុក្ខ​កង្វល់​និង​បញ្ហា​ប្រឈម​ទាំង​នោះ ដាក់​ជូន​ក្រសួង អប់រំ ដែល​យើង​នឹង​យក​ទៅ​ជួប​ផ្ទាល់ ជាមួយ​រដ្ឋ​មន្រ្តី​ក្រសួង អប់រំ»។

លោក រ៉ុង ឈុន បាន​បញ្ជាក់​ទៀត​ថា អ្វី​ដែល​ជា​កង្វល់​និង​ការ​ប្រឈម​របស់​ពួក​គេ​គឺ​ប្រាក់​បៀវត្សរ៍ ការ​រើស​អើង កង្វះ​សៀវភៅ​សិក្សា​របស់​សិស្ស​និង​បញ្ហា​ពុករលួយ នោះ​ជាដើម។

លោក រ៉ុង ឈុន ថ្លែង​ដែរ​ថា៖ «ការ​លើក​ឡើង​របស់​លោក​គ្រូ​អ្នក​គ្រូ​បង្រៀន គឺ​សុទ្ធ​តែ​ជា​រឿង​ពិត ដែល​ជា​បញ្ហា​កំពុង​ប្រឈម ហើយ​ជា​ចំណុច​ដែល​ធ្វើ​ឲ្យ​ប៉ះពាល់​ដល់​វិស័យ​អប់រំ​ផង។ ខ្ញុំ​យល់​ឃើញ​ថា វា​មាន​សារៈ​សំខាន់​និង​មាន​ទម្ងន់​ខ្លាំង​ណាស់​ទៅ​លើ​ក្រសួង អប់រំ ក្នុង​ការ​ទទួល​យក​បញ្ហា​នេះ​ទៅ​ពិចារណា»។

អ្នក​គ្រូ គឹម ដារ៉ានី បង្រៀន​នៅ​សាលា​បឋមសិក្សា ពោធិ៍សាត់ ដែល​កំពុង​ធ្វើ​ដំណើរ​មក​ចូល​រួម​សិក្ខាសាលា​នេះ​ប្រាប់​ថា សិក្ខាសាលា​នេះ​មាន​សារៈ​សំខាន់​សម្រាប់​រូប​គាត់ និង​គ្រូៗ​ទាំង​អស់ ដោយ​សារ​ថា វា​ជា​ឱកាស​មួយ​ក្នុង​ការ​បញ្ចេញ​ពី​ទុក្ខ​កង្វល់​របស់​គ្រូៗ​ផ្ទាល់។

អ្នក​គ្រូ​និយាយ​ថា៖ «ខ្ញុំ​ចង់​ឲ្យ​មាន​ការ​ដោះស្រាយ​ខ្លាំង​ជាង​គេ គឺ​ប្រាក់​ខែ​ខ្ពស់​ជាង​នេះ។ ខ្ញុំ​ធ្វើ​ជា​គ្រូ ៣២ឆ្នាំ ហើយ តែ​ខ្ញុំ​បាន​ទទួល​ប្រាក់​ខែ​ត្រឹម​តែ ៣២ ម៉ឺន​រៀល​ទេ ក្នុង​មួយ​ខែ»។ អ្នក​គ្រូ​បន្ត​ថា គាត់​គិត​ថា រាជ​រដ្ឋាភិបាល​មិន​សូវ​យក​ចិត្ត​ទុក​ដាក់​នឹង​បញ្ហា​របស់​គ្រូ​បង្រៀន​ទេ ដូចនេះ អ្វី​ដែល​គាត់​រំពឹង គឺ​ក្រសួង អប់រំ នឹង​ផ្តល់​ទំនុក​ចិត្ត​ច្រើន​សម្រាប់​គ្រូៗ​នៅ​ទូទាំង​ប្រទេស។

លោក ហង់ ជួនណារ៉ុន រដ្ឋ​មន្រ្តី​ក្រសួង អប់រំ មិន​បាន​បកស្រាយ​បញ្ហា​នេះ​ទេ ដោយ​លោក​ជាប់​ប្រជុំ​កាល​ពី​ម្សិលមិញ ប៉ុន្តែ​ក្នុង​វេទិកា​ស្តីពី​ការងារ​អប់រំ​ពី​ចុង​ខែ តុលា លោក​ថ្លែង​ថា លោក​មិន​សន្យា​ថា​នឹង​ដំឡើង​ប្រាក់​បៀវត្សរ៍​ឲ្យ​បាន ២៥០ ឬ ៣០០ ដុល្លារ​បាន​ទេ តែ​លោក​នឹង​ខិតខំ​ដោះស្រាយ​ក្នុង​កម្រិត​ណា​មួយ ដែល​លោក​អាច​ធ្វើ​ទៅ​បាន៕

អត្ថបទគួរចាប់អារម្មណ៍