The Phnom Penh Post Search

Search form

Logo of Phnom Penh Post newspaper Phnom Penh Post - តំណាង​ពី​សហគមន៍​បី​ប្តឹង​មន្ត្រី​ខណ្ឌ​ដូន​ពេញ

តំណាង​ពី​សហគមន៍​បី​ប្តឹង​មន្ត្រី​ខណ្ឌ​ដូន​ពេញ

តំណាង​ពី​សហគមន៍​បី​ប្តឹង​មន្ត្រី​ខណ្ឌ​ដូន​ពេញ

130319_09a
ក្រុមអ្នកតវ៉ាមកពីសហគមន៍បឹងកក់ បុរីកីឡា និងថ្មគោល ប្រមូលផ្ដុំគ្នានៅមុខក្រសួងមហាផ្ទៃ

ក្រុម​អ្នក​តវ៉ា​មក​ពី​សហ​គមន៍​បឹង​កក់​ បុរី​កីឡា និង​​ថ្ម​គោល​ ​​ប្រមូល​ផ្ដុំ​គ្នា​នៅ​មុខ​​​ក្រសួង​មហា​ផ្ទៃ​​។ រូបថត ម៉េង​ស្រ៊ុន

ភ្នំពេញៈ ក្រុម​អ្នក​តវ៉ា​មក​ពី​សហគមន៍​បឹង​កក់ បុរី​កីឡា និង​ថ្ម​គោល​ជាង​៥០​នាក់​នៅ​ព្រឹក​ម្សិលមិញ បាន​ទៅ​​ប្រមូល​ផ្ដុំ​គ្នា​នៅ​មុខ​ក្រសួង​មហាផ្ទៃ​ដើម្បី​ដាក់​ពាក្យ ប្ដឹង​អាជ្ញាធរ​ខណ្ឌ​ដូន​ពេញ បន្ទាប់​ពី​សកម្មជន​គេ​ជា​ច្រើន​នាក់ បាន​រង​របួស​នៅ​ក្នុង​ការ​វាយ​បង្ក្រាប​ដ៏​ហិង្សា​កាល​ពី​ថ្ងៃ​ទី​១៤ មីនា។

អ្នកស្រី ង៉ែត ឃុន អាយុ​៧២​ឆ្នាំ មក​ពី​សហគមន៍​បឹង​កក់​និយាយ​ថា ពួក​គាត់​នាំ​គ្នា​មក​ដាក់​ពាក្យ​ប្ដឹង​លោក​សុខ សម្បត្តិ អភិបាល​ខណ្ឌ​ដូន​ពេញ លោក សុខ ពេញ​វុធ អភិបាល​រង​ខណ្ឌ​ដូន​ពេញ និង​លោក​ ជៀម រដ្ឋា ប្រធាន​សន្តិសុខ​សណ្ដាប់​ធ្នាប់​ខណ្ឌ​ដូន​ពេញ ដែល​«បញ្ជា»​ឲ្យ​កង​កម្លាំង​ប្រើ​ហិង្សា​មក​លើ​ពួក​គាត់​បណ្ដាល​ឲ្យ​រង​របួស​ជា​ច្រើន​នាក់​នៅ​ក្នុង​ការ​តវ៉ា កាល​ពី​ថ្ងៃ​ព្រហស្បតិ៍។

អ្នកស្រីបានបន្ត​ថា៖«​យើង​ដាក់​ពាក្យ​បណ្ដឹង​នេះ សុំ​ឲ្យ​លោក ស ខេង រដ្ឋ​មន្ត្រី​ក្រសួង​មហាផ្ទៃ ជួយ​អន្តរាគមន៍​ដាក់​ទោស​មន្ត្រី​ទាំង​នេះ​តាម​ច្បាប់»។

ក្រុមអ្នកតវ៉ាមកពី​សហគមន៍​បឹងកក់ បុរី​កីឡា និង ថ្មគោល ដែល​ទៅ​ផ្ដុំ​គ្នា​នៅ​មុខ​ក្រសួង​យុត្តិធម៌ រួច​បន្ត​មក​ភូមិ​គ្រឹះ​លោក​នាយក​រដ្ឋមន្ត្រី​ពី​ថ្ងៃ​១៤​មីនា ដើម្បី​ឲ្យ​មាន​ការ​ពន្លឿន​ការ​ជំនុំ​ជម្រះ​សំណុំ​រឿង​អ្នក​ស្រី យ៉ោម​ បុប្ផា ត្រូវ​សមត្ថកិច្ច​ចម្រុះ​ខណ្ឌ​ដូន​ពេញ​រារាំង បង្ក​ឲ្យ​មាន​ហិង្សា បណ្ដាល​ឲ្យ​ក្រុម​អ្នក​ភូមិ​ប្រមាណ​ជាង​១០​នាក់ រង​របួស​បាក់​ដៃ ដួល​សន្លប់  គ្រេច​ថ្លោះ។ល។

មន្ត្រី​ខណ្ឌ​ដូន​ពេញដែល​ពលរដ្ឋ​ប្តឹង​មិន​អាច​ទាក់​ទង​សុំ​ពន្យល់​បាន​ទេ​កាល​ពី​ម្សិល​មិញ។

ជាមួយគ្នាដែរ កាលពី​ថ្ងៃចន្ទ​ក្រុម​អ្នក​រត់​ម៉ូតូ​ឌុប​និង​ម៉ូតូ​រ៉ឺម៉ក​ទេស​ចរណ៍​ជាង​៤០​នាក់​ក៏​បាន​មក​ជុំ​គ្នា​នៅ​មុខ​សាលា​ឧទ្ធរណ៍​ដាក់​ញតិ្ត​សុំ​ឲ្យ​តុលាការ​នេះ​ពន្លឿន​នីតិវិធី​ជំនុំ​ជម្រះ​ករណី​អ្នក​ស្រី យ៉ោម បុប្ផា តាម​ដែល​អាច​ធ្វើ​បាន​ដើម្បី​ផ្ដល់​យុត្តិធម៌ និង​សង​ជំងឺ​ចិត្ត ដល់​សមាជិក​ពីរ​នាក់​ដែល​រងគ្រោះ​ក្នុង​ការ​វាយ​ប្រហារ​ពី​ក្រុម​គ្រួសារ​ស្ត្រី​ជន​ជាប់​ចោទ​ពី​ឆ្នាំ​មុន។

ប្រធានសមាគម​អ្នក​រួបរួម​ដើម្បី​អភិវឌ្ឍន៍​កម្ពុជា​លោក ឯ សុភាស់ តំណាង​ឱ្យ​ក្រុម​អ្នក​រត់​ម៉ូតូឌុប​និង​ម៉ូតូ​រ៉ឺម៉ក​ទេសចរណ៍ ​និយាយ​ថា​ សកម្មភាព​អ្នក​ភូមិ​បឹងកក់​មួយ​ក្រុម​តូច​​តែងតែ​ដើរ​អុកឡុក​បង្ក​ឱ្យ​មាន ភាព​ចលាចល​សង្គម​ ទាមទារ​ដោះ​លែង​អ្នកស្រី​ យ៉ោម បុប្ផា គឺ​ជា​ការ «បំពាន​ច្បាប់»។

លោកថ្លែងថា ពួក​គេ​បាន​ព្យាយាម​តវ៉ា​ដោយ​បង្វែរ​សំណុំ​រឿង​យ៉ោម បុប្ផា ពី​បទ​ព្រហ្មទណ្ឌ​ប្រើ​ហិង្សា​ដោយ​ចេតនា ទៅ​ជា​ករណី​ទំនាស់​ដីធ្លី​ ដែល​ជា​ការ​បំភ្លៃ​ការ​ពិត​បម្រើ​ឱ្យ​នយោបាយ​ជន​បរទេស​ អង្គការ​ជាតិ​-​អន្ដរជាតិ​ខ្លះ ប្រឆាំង​នឹង​រដ្ឋាភិ​បាល»។

បន្ទាប់ការតវ៉ានៅ​មុខ​សាលា​ឧទ្ធរណ៍​ក្រុម​អ្នក​រត់​ម៉ូតូ​ឌុប​ក៏​បាន​នាំ​គ្នា បន្ត​ដំណើរ​ទៅ​កាន់​ក្រសួង​មហាផ្ទៃ ហើយ​ភាគី​ទាំង​ពីរ​ក៏​បាន​ប៉ះ​ទង្គិច​ពាក្យ​សម្ដី​គ្នា​ ប៉ុន្តែមិន​មាន​ហិង្សា​កើត​ឡើងទេ៕

អត្ថបទគួរចាប់អារម្មណ៍