The Phnom Penh Post Search

Search form

Logo of Phnom Penh Post newspaper Phnom Penh Post - តំណាង​សហជីព​ស្នើ​សុំ​អភិបាល​ខេត្ត​ជួយ​អន្តរាគមន៍​បញ្ហា​កម្មករ

តំណាង​សហជីព​ស្នើ​សុំ​អភិបាល​ខេត្ត​ជួយ​អន្តរាគមន៍​បញ្ហា​កម្មករ

តំណាង​សហជីព​ស្នើ​សុំ​អភិបាល​ខេត្ត​ជួយ​អន្តរាគមន៍​បញ្ហា​កម្មករ

ស្វាយរៀងៈ ប្រធាន​សម្ព័ន្ធ​សហជីព​ចលនា​កម្មករ​បាន​ផ្ញើ​លិខិត​ស្នើ​សុំ​លោក​អភិបាល ខេត្ត ស្វាយរៀង ជួយ​អន្តរាគមន៍​និង​ដោះស្រាយ​ការ​ស្នើ​សុំ​របស់​កម្មករ បម្រើ​ការ​នៅ​រោងចក្រ​ទូទាំង​ខេត្ត​នេះ។

លោក ប៉ាវ ស៊ីណា ប្រធាន​សម្ព័ន្ធ​រូប​នេះ​មាន​ប្រសាសន៍​កាល ពី​ថ្ងៃ​ម្សិលមិញ​ថា ថ្នាក់​ដឹក​នាំ​សហជីព​ចលនា​កម្មករ​ប្រមាណ​ជា ៧៥ នាក់​មក​ពី​គ្រប់​បណ្តា រោងចក្រ​បាន​ធ្វើ​ការ​ប្រជុំ​ពិភាក្សា​ស្តី​ពី​ស្ថានភាព​លក្ខខណ្ឌ​ការងារ​ក្នុង​ខេត្ត ស្វាយរៀង នេះ​ទាំង​មូល។

លោក​បាន​ថ្លែង​ថា៖ «ថ្នាក់​ដឹក​នាំ​លោក​បាន​លើក​ឡើង​ពី​សិទ្ធិ​សេរីភាព​របស់​ពួកគេ​ត្រូវ​បាន គំរាម​គំហែង​ដោយ​ភាគី​ក្រុមហ៊ុន​ក៏​ដូច​ជា​សមត្ថកិច្ច​ពាក់​ព័ន្ធ ហើយ​សំណើ​ផ្សេងៗ​ដែល​ពួកគេ​ស្នើ​ទៅ​ក្រុមហ៊ុន​គឺ​ពុំ​ត្រូវ​បាន​យក​ចិត្ត​ទុក​ដាក់​ដោះស្រាយ​ទេ»។

នៅ​ក្នុង​លិខិត​ដែល​បាន​ដាក់​ជូន​លោក​អភិបាល ខេត្ត ស្វាយរៀង កាល​ពី​ម្សិលមិញ​នោះ បាន​ធ្វើ​ការ​រៀប​រាប់​ពី​ការ​មិន​យក​ចិត្ត​ទុក​ដាក់​របស់​ស្ថាប័ន​ពាក់​ព័ន្ធ ចំពោះ​ទុក្ខ​លំបាក​ក៏​ដូចជា​សំណូមពរ​របស់​កម្មករ ដូចជា​តំណាង​ក្រសួង ការងារ​និង​អាជ្ញាធរ​មូលដ្ឋាន។

លោក​បាន​ឲ្យ​ដឹង​ទៀត​ថា នៅ​ពេល​ដែល​មាន​កូដកម្ម​កើត​ឡើង ថ្នាក់​ដឹក​នាំ​សហជីព ឬ​តំណាង​កម្មករ​ដែល​ចូល​រួម​តវ៉ា​នូវ​លក្ខខណ្ឌ​ការងារ​ណា​មួយ ពួក​គេ​ត្រូវ​បាន​ក្រុមហ៊ុន​បញ្ឈប់​ពី​ការងារ។

លោក ប៉ាវ ស៊ីណា បាន​ថ្លែង​ថា៖ «យើង​បាន​សម្រេច​ធ្វើ​ការ​ស្នើ​សុំ​ឲ្យ​លោក​អភិបាល​ជួយ​អន្តរាគមន៍​ឲ្យ​ថ្នាក់​គ្រប់​គ្រង​ក្រុមហ៊ុន​រោងចក្រ​ទាំង​អស់​ទូ​ទាំង​ខេត្ត ស្វាយរៀង នូវ​ចំណុច​មួយ​ចំនួន​ដូចជា​ឈប់​រើស​អើង​សេរីភាព​សហជីព អាជ្ញាធរ​បញ្ឈប់​ការ​គំរាម​កំហែង​មក​លើ​ថ្នាក់​ដឹក​នាំ និង​សកម្មជន​សហជីព ក្រុមហ៊ុន​ត្រូវ​អនុវត្ត​លក្ខខណ្ឌ​ការងារ​ឲ្យ​បាន​ត្រឹម​ត្រូវ​ស្រប​តាម​ច្បាប់ និង​អនុសញ្ញា​អន្តរជាតិ​ស្តីពី​ការងារ»។

លោក ជៀង អំ អភិបាល​ខេត្ត ស្វាយរៀង មិន​អាច​ទាក់​ទង​បាន​ទេ​កាល​ពី​ម្សិលមិញ។

ទាកទិន​នឹង​ការ​តវ៉ា​របស់​កម្មករ-កម្មការិនី​អតីត​អភិបាល​ក្រុង បាវិត បាន​បាញ់​ឲ្យ​រង​របួស​បី​នាក់​រហូត​មក​ដល់​ពេល​នេះ​ពុំ​ទាន់​មាន​សំណង​នៅ​ឡើយ៕

អត្ថបទគួរចាប់អារម្មណ៍