បន្ទាយមានជ័យៈ លោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធ និងតំណាងពលរដ្ឋ ២ នាក់ទៀត បានប្រកាសដកខ្លួនចេញពីគម្រោងធ្វើបាតុកម្មទាមទារឲ្យបើកច្រកទ្វារព្រំដែនអន្តរជាតិប៉ោយប៉ែតឡើងវិញ បន្ទាប់ពីលោក អ៊ុំ រាត្រី អភិបាលខេត្ដបន្ទាយមានជ័យមិនអនុញ្ញាតឲ្យធ្វើបាតុកម្មទៅតាមសំណើចាប់ពីថ្ងៃទី ១ ដល់ថ្ងៃទី ៧ ខែមិថុនា ដែលថានឹងមានពលរដ្ឋប្រមាណ ១ ៥០០ នាក់ចូលរួម។
នៅថ្ងៃទី ២៥ ខែឧសភា លោក ឌិន ពុទ្ធី បានដាក់លិខិតទៅអភិបាលខេត្ដបន្ទាយមានជ័យ ដើម្បីស្នើសុំធ្វើបាតុកម្មដោយសន្តិវិធី។ ក្នុងលិខិតសរសេរថា ពលរដ្ឋខ្មែរដែលជាអាជីវករ អ្នកលក់ដូរទំនិញនៅក្នុងផ្សាររុងក្លឿ ស្រុកអារញ្ញ ខេត្ដស្រះកែវ ប្រទេសថៃ កម្មករ អូសរទេះ អ្នករត់ម៉ូតូឌុប អ្នករត់តាក់ស៊ី អ្នករត់ម៉ូតូកង់បី និងអ្នកប្រកបរបរសេដ្ឋកិច្ចក្រៅប្រព័ន្ធទាំងអស់រស់នៅក្នុងក្រុងប៉ោយប៉ែតបានឯកភាពគ្នាជាឯកច្ឆន្ទនឹងចូលរួមធ្វើបាតុកម្ម ដែលមានមនុស្សចូលរួមចំនួន ១ ៥០០ នាក់ រទេះ ១០០ គ្រឿង និងឧគ្ឃោសនស័ព្ទចំនួន ១ គ្រឿង។
លោក ពុទ្ធី បន្តថា បាតុកម្មនេះនឹងធ្វើឡើងនៅចំណុចច្រកទ្វារអន្តរជាតិប៉ោយប៉ែត ដោយចាប់ផ្ដើមពីថ្ងៃទី ១ ដល់ថ្ងៃទី ៧ ខែ មិថុនា ឆ្នាំ ២០២០ ចាប់ពីម៉ោង ៦ ព្រឹកដល់ម៉ោង ៦ ល្ងាចជារៀងរាល់ថ្ងៃ។
លោកថ្លែងថា៖ «ការធ្វើបាតុកម្មនេះ ពលរដ្ឋមានគោលបំណងទាមទារស្នើសុំការអនុញ្ញាត ការធ្វើដំណើរថ្មើរជើង រទេះ ទោចក្រយានយន្ត និងរថយន្តអាចឆ្លងកាត់តាមច្រកទ្វារព្រំដែនអន្តរជាតិប៉ោយប៉ែតខ្លងលឹកដើម្បីបានចូលទៅលក់ដូរនៅក្នុងស្រុកអារញ្ញខេត្ដស្រះកែវវិញនៅថ្ងៃទី ១ ខែមិថុនា ឆ្នាំ ២០២០ ជាកំហិត»។
លោកបន្ថែមថា ក្នុងករណីភាគីថៃនៅតែមិនព្រមបើកច្រកទ្វារព្រំដែនអន្តរជាតិខ្លងលឹកប៉ោយប៉ែតវិញនោះទេ ពួកយើងខ្ញុំទាំងអស់គ្នាស្នើសុំឯកឧត្ដមអភិបាលនៃគណៈអភិបាលខេត្ដបន្ទាយមានជ័យមេត្តាបិទច្រកទ្វារព្រំដែនអន្តរជាតិប៉ោយប៉ែត កុំឲ្យមានរថយន្តរបស់ថៃអាចបើកបរចូលមកទឹកដីនៃព្រះរាជាណាចក្រកម្ពុជាបានជាបន្តទៅទៀត។
ឆ្លើយតបនឹងសំណើខាងលើនេះលោក អ៊ុំ រាត្រី បានប្រាប់ទៅលោក ឌិន ពុទ្ធី ថា រដ្ឋបាលខេត្ដមិនអនុញ្ញាតឲ្យធ្វើបាតុកម្មនោះទេ ពីព្រោះបច្ចុប្បន្ននេះរាជរដ្ឋាភិបាលកំពុងមានវិធានការទប់ស្កាត់ការរីករាលដាលនៃជំងឺកូវីដ១៩ នៅទូទាំងប្រទេសដែលជំងឺនេះបាននិងកំពុងរីករាលដាលជាសកលឥតឈប់ឈរ ស្ទើរគ្រប់ប្រទេសនៅលើសកលលោក។
លោកថា ជាក់ស្ដែងរាជរដ្ឋាភិបាលដែលមានក្រសួងសុខាភិបាលជាសេនាធិការបានជំរុញការអប់រំសុខភាពដល់ប្រជាពលរដ្ឋ និងពង្រឹងការងារតាមដានការអនុវត្ដវិធានការការពាររលកទី ២ នៃការចម្លងជំងឺកូវីដ១៩ដោយបន្តការហាមឃាត់មិនឲ្យមានការជួបជុំ ឬរៀបចំពិធីណាមួយ ដែលមានអ្នកចូលរួមច្រើនកុះករពេក រហូតដល់ខែកញ្ញា ឆ្នាំ ២០២០។
លោកបញ្ជាក់ថា៖ «កន្លងមករដ្ឋបាលខេត្ដបន្ទាយមានជ័យធ្លាប់បានអន្តរាគមន៍ទៅរដ្ឋបាលខេត្ដស្រះកែវ ព្រះរាជាណាចក្រថៃដើម្បីសុំឲ្យជួយសម្រួលមិនយកកម្រៃឈ្នួលតូបពីបងប្អូនអាជីវករ និងសុំសម្រួលឲ្យបងប្អូនអាជីវករកម្ពុជាទាំងអស់ក្នុងផ្សាររុងក្លឿបានចេញចូលទៅមើលតូបរបស់ខ្លួនក្នុង ១ លើក ២០ នាក់រហូតដល់ស្ថានភាពវិលមកជាប្រក្រតីវិញ»។
សំណើនេះត្រូវបានភាគីថៃឆ្លើយតបថា នឹងជួយសម្រួលមិនយកកម្រៃឈ្នួលតូបពីអាជីវករកម្ពុជាប៉ុន្ដែចំពោះសំណើសុំសម្រួលឲ្យអាជីវករកម្ពុជាទាំងអស់ក្នុងផ្សាររុងក្លឿបានចេញ-ចូលទៅមើលតូបរបស់ខ្លួនក្នុង ១ លើក ២០ នាក់ ភាគីថៃមិនឯកភាពនោះទេ។ ជាមួយគ្នានេះលោក អ៊ុំ រាត្រី បានប្រាប់ទៅលោក ឌិន ពុទ្ធី ថាត្រូវធ្វើសកម្មភាពឲ្យស្របតាមច្បាប់ស្ដីពីសមាគម និងអង្គការមិនមែនរដ្ឋាភិបាល លិខិតបទដ្ឋានគតិយុត្ដនានាជាធរមាន និងលក្ខន្តិកៈរបស់ខ្លួនដូចបានតម្តល់ទុកនៅក្រសួងមហាផ្ទៃ។
លោក ឌិន ពុទ្ធី ថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ក្រោយទទួលបានលិខិតឆ្លើយតបរបស់អភិបាលខេត្ដបន្ទាយមានជ័យ សមាគមលោកនឹងដកខ្លួនចេញដោយមិនដឹកនាំពលរដ្ឋចំនួន ១៥០០ នាក់ដើម្បីធ្វើបាតុកម្មទៀតឡើយ។ ប៉ុន្ដែលោកបញ្ជាក់ថា ពលរដ្ឋ អាជីវករដែលមានតូបលក់ដូរនៅផ្សាររុងក្លឿនឹងនៅតែបន្តធ្វើបាតុកម្មតាមពេលកំណត់ដដែល មិនព្រមបញ្ឈប់នោះទេ។ លោកថ្លែងថា៖ «រដ្ឋបាលខេត្ដបន្ទាយមានជ័យបានសម្រេចមិនអនុញ្ញាតឲ្យថ្នាក់ដឹកនាំសមាគមចូលរួមសម្របសម្រួលក្នុងការធ្វើបាតុកម្មនៅចំណុចច្រកទ្វារព្រំដែនអន្តរជាតិប៉ោយប៉ែតនាថ្ងៃទី ១ ដល់ថ្ងៃទី ២០ ខែ មិថុនា ឆ្នាំ ២០២០ នោះទេ»។
លោកបញ្ជាក់ថា ដូច្នេះរូបលោក និងលោក ហ៊ិន សេងអឿន ព្រមទាំងលោក ស៊ីម វណ្ណៈ ដែលជាតំណាងឲ្យប្រជាពលរដ្ឋ សូមប្រកាសមិនចូលរួមក្នុងការធ្វើបាតុកម្មពីថ្ងៃទី ១ ដល់ថ្ងៃទី ៧ ខែមិថុនា ខាងមុខនេះឡើយ ហើយការបន្តធ្វើ ឬមិនធ្វើគឺជាសិទ្ធិរបស់ប្រជាពលរដ្ឋនៅក្រុងប៉ោយប៉ែត។
លោក ធន តឿ អាជីវករខ្មែរម្នាក់មានតូបលក់ដូរនៅផ្សាររុងក្លឿប្រាប់ភ្នំពេញប៉ុស្ដិ៍ពីម្សិលម្សិញថា ជីវភាពរបស់ពួកលោកមានការធ្លាក់ចុះ ដោយសារតែមិនមានមុខរបររកស៊ី និងការងារធ្វើនោះទេព្រោះមានតែរបរលក់ដូរនៅផ្សាររុងក្លឿប៉ុណ្ណោះដើម្បីផ្គត់ផ្គង់ជីវភាព។
លោកថ្លែងថា៖ «ពួកខ្ញុំនឹងនៅតែធ្វើបាតុកម្មតាមថ្ងៃកំណត់ដដែល បើទោះបីសមាគមមិនចូលរួមជាមួយពួកខ្ញុំក៏ដោយ ព្រោះបើមិនធ្វើទេ គឺងាប់ទាំងអស់ ជាពិសេសពលរដ្ឋជាកម្មករតែម្ដង ដូចជាកម្មករអូសរទេះក្នុង ១ ថ្ងៃរកកម្រៃតែ ១ ម៉ឺនរៀលមិនបានផង។ បើរដ្ឋាភិបាលមិនគិតគូររឿងនេះទេ នឹងកើតចោរពេញប្រទេសមិនខានព្រោះអ្នកក្រគ្មានអ្វីផ្គត់ផ្គង់ក្រពះ។ និយាយហើយត្រូវតែធ្វើ ព្រោះបើនៅតែមិនបើកទ្វារព្រំដែនឲ្យពួកខ្ញុំចូលទៅរកស៊ីទេ ពួកខ្ញុំគ្មានមុខរបរអ្វីដើម្បីផ្គត់ផ្គង់ជីវភាពបានទេ»៕