.jpg)
កម្មករ-កម្មការិនីរោងចក្រពេលទៅទទួលការចាក់វ៉ាក់សាំងការពារជំងឺកូវីដ ១៩ នៅក្នុងខណ្ឌមានជ័យ រាជធានីភ្នំពេញ កាលពីខែមេសា ឆ្នាំ ២០២១។ ហ៊ាន រង្សី
ភ្នំពេញៈ តំណាងអង្គការសុខភាពពិភពលោក (WHO) ប្រចាំប្រទេសកម្ពុជា បានអបអរសាទរ និងធ្វើការកោតសរសើរយ៉ាងខ្លាំងចំពោះការចាក់វ៉ាក់សាំង ដែលដំណើរការបានយ៉ាងល្អ ដែលមកដល់ពេលនេះប្រជាពលរដ្ឋជាង ២,២ លាននាក់ ហើយបានទទួលការចាក់វ៉ាក់សាំងការពារវីរុសកូវីដ ១៩។
លោកស្រី លី អៃឡែន តំណាងអង្គការ WHO ប្រចាំកម្ពុជាបានថ្លែងដូចនេះ ក្នុងពេលចុះពិនិត្យមើលការចាប់ផ្តើមចាក់វ៉ាក់សាំងការពារវីរុសកូវីដ ១៩ នៅក្នុងខណ្ឌច្បារអំពៅនាព្រឹកថ្ងៃទី ២៥ ខែឧសភា ដោយលោកស្រីបានលើកឡើងថា ការរៀបចំនូវការចាក់វ៉ាក់សាំងមានរបៀបរៀបរយល្អ ហើយប្រជាពលរដ្ឋមានការសប្បាយរីករាយក្នុងការទទួលការចាក់វ៉ាក់សាំងនេះ។
លោកស្រីមានប្រសាសន៍ថា៖ «ខ្ញុំអាចនិយាយបានថាប្រជាជនកម្ពុជាពិតជាមានសំណាង ដែលមានឱកាសបានទទួលវ៉ាក់សាំង ការពារវីរុសកូវីដ ១៩ នេះ ហើយប្រទេសកម្ពុជាក៏ជាប្រទេសដំបូងគេ ដែលបានទទួលវ៉ាក់សាំងតាមរយៈយន្តការកូវ៉ាក់នេះ»។
ប្រទេសកម្ពុជាមានលទ្ធភាពរក្សាបាននូវវ៉ាក់សាំងសម្រាប់ផ្តល់ដល់ប្រជាពលរដ្ឋរបស់ខ្លួនបានជាច្រើនទៀត ខណៈដែលប្រទេសជាច្រើនផ្សេងទៀត នៅរង់ចាំវ៉ាក់សាំងនៅឡើយ។
លោកស្រីបន្តថា៖ «ខ្ញុំក៏សូមថ្លែងអំណរគុណ ចំពោះគណៈកម្មការចំពោះកិច្ចចាក់វ៉ាក់សាំងការពារវីរុសកូវីដ ១៩ ដែលបានរៀបចំដំណើរការ ចាក់វ៉ាក់សាំងនេះបានយ៉ាងល្អ រួមនឹងស្ថាប័នផ្សេងៗទៀត និងអាជ្ញាធរមូលដា្ឋនផងដែរ ដែលបានចូលរួមយ៉ាងសស្រោកសស្រាំដែលធ្វើឱ្យយុទ្ធនាការនេះដំណើរការបានយ៉ាងល្អ»។
ជាមួយគ្នានេះ លោកស្រីក៏បានបន្តធ្វើការក្រើនរំឭកទៅដល់ពលរដ្ឋកម្ពុជានៅទូទាំងប្រទេសផងដែរថា ស្ថានភាពកូវីដ ១៩ នៅមានសភាពធ្ងន់ធ្ងរនៅឡើយ ហើយបើទោះបីជាវ៉ាក់សាំងគឺជាឧបករណ៍មួយដែលមានសារៈសំខាន់ក្នុងការទប់ស្កាត់នូវការរាតត្បាតនេះក៏ដោយ តែវ៉ាក់សាំង ១ មុខគឺមិនគ្រប់គ្រាន់ទេ។ ដូចនេះប្រជាពលរដ្ឋទាំងអស់ត្រូវតែចូលរួមអនុវត្តឱ្យបានត្រឹមត្រូវនូវវិធានការ «៣ កុំ ៣ ការពារ» ហើយត្រូវចៀសវាងកន្លែងដែលមានមនុស្សច្រើន និងពុំមានខ្យល់ចេញចូលគ្រប់គ្រាន់។
ទន្ទឹមនឹងនេះដែរ លោកស្រី អៃឡែន នៅតែបង្ហាញពីការបារម្ភចំពោះស្ថានភាពកូវីដ ១៩ នៅកម្ពុជាដែលស្ថានភាពពិតប្រាកដ វាអាចធ្ងន់ធ្ងរជាងអ្វីដែលបានមើលឃើញនៅក្នុងពេលបច្ចុប្បន្ននេះ។
លោកស្រីបញ្ជាក់ថា៖ «ចំណុចដែលនាងខ្ញុំគិតថា ស្ថានភាពដែលគួរឱ្យបារម្ភ ហើយនឹងធ្ងន់ធ្ងរជាងអ្វីដែលយើងកំពុងតែឃើញនេះ មានមូលហេតុចំនួន ៣ គឺទី១ ទាក់ទងនឹងប្រភេទមេរោគបំប្លែងថ្មី ដែលអាចមានការឆ្លងខ្លាំងហើយឆ្លងលឿន ឯចំណុចទី២ គឺទាក់ទងនឹងក្រុមប្រជាពលរដ្ឋមួយចំនួនដែលគាត់ឆ្លងជំងឺនេះហើយ ប៉ុន្តែមិនមានរោគសញ្ញាដែលអាចបន្តការចម្លងនេះដោយមានលក្ខណៈស្ងាត់ស្ងៀម»។
កម្មករក្នុងខណ្ឌមានជ័យជួបគ្រូពេទ្យដើម្បីចាក់វ៉ាក់សាំង។ហ៊ាន រង្សី
ចំពោះមូលហេតុទី៣ គឺទាក់ទងនឹងការអនុវត្តការការពាររបស់ប្រជាពលរដ្ឋ មានការធូររលុងជាងមុន ដែលអាចធ្វើឱ្យការចម្លងនេះមានការកើនឡើង។
លោកស្រីបន្ថែមថា៖ «នាងខ្ញុំជឿជាក់ថាប្រជាពលរដ្ឋទាំងអស់នឹងចង់ឃើញចំនួនឆ្លង និងចំនួនអ្នកស្លាប់ដោយសារកូវីដ ១៩ មានការថយចុះនៅក្នុងពេល ១ សប្តាហ៍ ឬក្នុងពេល ១ ខែ ឬក៏ ២-៣ ខែទៅមុខនេះ។ ដូចនេះដើម្បីឱ្យចំនួននេះមានការថយចុះបានលុះត្រាតែយើងទាំងអស់គ្នាចូលរួមក្នុងសកម្មភាពនៅថ្ងៃនេះ ដើម្បីឱ្យមានលទ្ធផលថយចុះតាមការចង់បាន»។
ចំណែកលោកស្រី ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានឱ្យដឹងផងដែរថា ដំណើរការចាក់វ៉ាក់សាំងក្នុងខណ្ឌចំនួន ៣ គឺខណ្ឌច្បារអំពៅ ខណ្ឌចំការមន និងខណ្ឌ៧មករា បានចាប់ផ្តើមពីថ្ងៃទី ២៥ ខែឧសភា ដែលមានប្រជាពលរដ្ឋប្រមាណជា ២៦០ ៥៨៣ នាក់។ «ស្ថានភាពនៃការចាក់វ៉ាក់សាំងមកដល់ពេលនេះជារួមគឺមានវឌ្ឍនភាពល្អទាំងខាងក្រុមយោធា (ក្រសួងការពារជាតិ) និងខាងស៊ីវិល (ក្រសួងសុខាភិបាល) ដែលមកដល់ត្រឹមថ្ងៃទី ២៤ ខែឧសភា ការចាក់វ៉ាក់សាំងចាក់បានចំនួន ២២,៧០% បើធៀបនឹងចំនួនប្រជាពលរដ្ឋចំនួន ១០ លាននាក់តាមផែនការរបស់សម្តេចនាយករដ្ឋមន្ត្រី ហ៊ុន សែន នៅទូទាំងប្រទេស»។
លោកស្រីបញ្ជាក់ថា គណៈកម្មការចំពោះកិច្ចចាក់វ៉ាក់សាំងកូវីដ ១៩ ក៏មានផែនការចាក់ទៅតាមបណ្តាខេត្តផ្សេងៗទៀត ឱ្យបានគ្រប់ចំនួន ១០ លាននាក់ ឬលើសនេះ ប៉ុន្តែដោយមានការគិតគូររបស់លោកនាយករដ្ឋមន្ត្រី បានសម្រេចចាក់ជូនប្រជាពលរដ្ឋក្នុងរាជធានីភ្នំពេញជាមុនសិន មុននឹងឈានទៅរកការចាក់នៅតាមតំបន់ផ្សេងៗ ដូចជាខេត្តកណ្តាល ខេត្តព្រះសីហនុ។
លោកស្រីប្រាប់ថា៖ «គណៈកម្មការចំពោះកិច្ចនឹងពិចារណា ជាបន្តបន្ទាប់ទៀតដោយរៀបចំផែនការលម្អិតដើម្បីឱ្យមានភាពបន្ស៊ីគ្នា រវាងផែនការយុទ្ធសាស្ត្រជាតិចាក់វ៉ាក់សាំងកូវីដ ១៩ នេះរបស់ក្រសួងសេដ្ឋកិច្ច និងហិរញ្ញវត្ថុ និងគណៈកម្មការចំពោះកិច្ចចាក់វ៉ាក់សាំង សម្រាប់រៀបចំធ្វើយ៉ាងណាឱ្យមានការអនុវត្តនូវការចាក់វ៉ាក់សាំងជាបន្តបន្ទាប់ទៀតដោយមានការយល់ព្រមពីលោកនាយករដ្ឋមន្ត្រីផងដែរ»។
ដោយឡែក លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងទៅដល់ម្ចាស់ ឬនាយករោងចក្រ សហគ្រាស កាលពីថ្ងៃទី ២៤ ខែឧសភាថា ដើម្បីបង្កលក្ខណៈងាយស្រួលដល់កម្មករនិយោជិតដែលត្រូវចាក់វ៉ាក់សាំងដូសទី ២ គឺត្រូវអនុញ្ញាតឱ្យកម្មករនិយោជិតឈប់សម្រាកចំនួន ១ ថ្ងៃ ដោយមានប្រាក់ឈ្នួល។ «ក្នុងករណីម្ចាស់ ឬនាយករោងចក្រ សហគ្រាសណាមិនអនុញ្ញាតឱ្យបងប្អូនកម្មករនិយោជិតបានសម្រាកចំនួន ១ ថ្ងៃ ដោយមានប្រាក់ឈ្នួល ដើម្បីទៅចាក់វ៉ាក់សាំងកូវីដ ១៩ ដូសទី ២ សូមបងប្អូនកម្មករនិយោជិតជូនដំណឹងមកក្រសួងតាមរយៈទូរស័ព្ទលេខ ០៨៧ ៥២៥ ៦៥៦ ឬក្រុមតេឡេក្រាម https://t.me/KhmerWorkerChat»។
លោកបន្តថា ការរារាំងបុគ្គលណាម្នាក់មិនឱ្យទៅចាក់វ៉ាក់សាំងកូវីដ ១៩ គឺល្មើសនឹងច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ច្បាប់ស្តីពីការងារ និងលិខិតបទដ្ឋានគតិយុត្តពាក់ព័ន្ធនឹងកាតព្វកិច្ចក្នុងការទទួលការចាក់វ៉ាក់សាំងការពារជំងឺកូវីដ ១៩។
លោកព្រមានថា៖ «ម្ចាស់ ឬនាយករោងចក្រ សហគ្រាសត្រូវជួយជំរុញ និងអនុញ្ញាតឱ្យកម្មករនិយោជិតទៅចាក់វ៉ាក់សាំង បើមិនដូច្នេះ ម្ចាស់ ឬរោងចក្រ សហគ្រាស នឹងត្រូវទទួលពិន័យជាប្រាក់ និងផ្តន្ទាទោសដាក់ពន្ធនាគារតាមច្បាប់ជាធរមាន»៕
