ភ្នំពេញៈ មន្ត្រីក្រសួងធនធានទឹកបានឲ្យដឹងថា តំបន់មួយចំនួននៃខេត្តចំនួន ៦ កំពុងប្រឈមការខ្វះខាតទឹកដើម្បីប្រើប្រាស់ព្រោះតែរដូវប្រាំងឈានចូលមកដល់ និងអាកាសធាតុមានការប្រែប្រួលទៅជាក្ដៅហួតហែង ប៉ុន្តែមិនទាន់មានបញ្ហាធ្ងន់ធ្ងរទេ។ ទន្ទឹមនឹងនេះមន្ត្រី និងអាជ្ញាធរក៏មានវិធានការដោះស្រាយជាបន្តបន្ទាប់។
លោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយម បានថ្លែងប្រាប់ភ្នំពេញប៉ុស្ដិ៍កាលពីម្សិលមិញថាខេត្ដ ឧត្ដរមានជ័យ បាត់ដំបង កំពង់ធំ ព្រៃវែង ព្រះវិហារ និងខេត្ដកោះកុង ដែលតំបន់ខ្លះនៃខេត្តទាំងនោះ កំពុងប្រឈមនឹងការខ្វះខាតទឹកប្រើប្រាស់។
លោក យុត្ថា បានថ្លែងថា៖ «កើតឡើងចំពោះ ៦ ខេត្ដនេះ ប៉ុន្ដែដូចខ្ញុំបានបញ្ជាក់ហើយថា មិនមែនមានបញ្ហាខ្វះខាតទឹកនេះទូទាំងខេត្ដទេ គឺកើតឡើងដោយតំបន់នីមួយៗក្នុងខេត្ដប៉ុណ្ណោះ។ក្រសួងបានត្រៀមរួចហើយ ក្នុងនោះមានកញ្ចប់ថវិកាសម្រាប់ដោះស្រាយ»។
លោកបន្ដ៖ «ក្រសួងបានឲ្យជីកអណ្ដូង និងការបញ្ចូនរថយន្ដដឹកទឹកទៅតាមខេត្ដដែលមានបញ្ហា។ ប្រព័ន្ធផ្លូវទឹក ក៏ដូចជាទឹកក្រោមដី យើងបានសិក្សាហើយ កន្លែងណាដែលមានទឹកក្រោមដី យើងទាញយកទឹកក្រោមដីប្រើ កន្លែងណាដែលអាចបង្វែរទឹកមកបានទោះបីនៅឆ្ងាយយ៉ាងម៉េចក៏យើងបង្វែរទឹកមកប្រើប្រាស់បានដែរ។ក្រសួងបានដោះស្រាយ យោងទៅតាមស្ថានភាពជាក់ស្ដែងនៃភូមិសាស្រ្ដនីមួយៗក្នុងខេត្ដដែលជួបបញ្ហា»។
ទោះជាយ៉ាងណាក៏ដោយលោក យុត្ថា បានអះអាងថា នៅស្រុកគាស់ក្រឡ និងម៉ោងឬស្សី នៃខេត្តបាត់ដំបងបានឲ្យដឹងថាប្រជាពលរដ្ឋមាន ២៨ ០០០ គ្រួសារ កំពុងប្រឈមមុខខ្លាំងចំពោះផលប៉ះពាល់ ដែលត្រូវជួយសង្គ្រោះដោយកាយប្រឡាយទឹកបន្ថែមប្រហែល ៦ គីឡូម៉ែត្រ ដោយនាំទឹកមកពីទំនប់ទឹកពហុបំណង ដែលស្ថិតនៅក្នុងស្រុករតនមណ្ឌល។
លោកថ្លែងថាបញ្ហាកើតមានឡើងនៅក្រុងខេមរភូមិន្ទ នៅខេត្ដកោះកុង។ ស្រុកមេសាងនៃខេត្តព្រៃវែង ស្រុកស្ទោងនៃខេត្តកំពង់ធំ។ ដោយឡែក នៅខេត្ដឧត្ដរមានជ័យ និងខេត្ដព្រះវិហារ បញ្ហាកង្វះខាតទឹកប្រើប្រាស់នេះ បានកើតឡើងតែនៅក្នុងពន្ធនាគារចំនួន ២ ប៉ុណ្ណោះ។ ដំណោះស្រាយដំបូងនៅក្នុងខេត្ដ ២ នេះ ក្រសួងបានឲ្យអាជ្ញាធរខេត្ដដឹកទឹកចែកជូនប្រើប្រាស់បណ្ដោះអាសន្ន បន្ទាប់មកលោករដ្ឋមន្រ្ដីក្រសួងធនធានទឹក ក៏បានបញ្ជាឲ្យជីកអណ្ដូងដើម្បីប្រើប្រាស់វិញ។
លោក ឡុង ផល្គុន ប្រធានមន្ទីរធនធានទឹកនិងឩតុនិយមខេត្តបាត់ដំបងបានឲ្យដឹងថា ការខ្វះខាតទឹកនេះ គឺពិតជាមានការខ្វះខាតមែន ប៉ុន្ដែមិនមានការប្រឈមជាបញ្ហាធ្ងន់ធ្ងរនោះទេ។
លោក ផល្គុន ថ្លែងបន្ដថា៖ «ខេត្ដយើងមានអាងស្ដុកទឹកធំសម្រាប់អន្ដរាគមន៍ជុំវិញបញ្ហានេះ។ ជាវិធានការជាក់ស្ដែងយើងបានប្រើម៉ាស៊ីនធំៗ ៦៥ សេស ដើម្បីបូមទឹកបញ្ចូនទៅឲ្យប្រជាពលរដ្ឋនៅតំបន់ដែលខ្វះខាតទឹក។ យើងក៏មានជីកជាអណ្ដូងដើម្បីជាប្រភពទឹកក្រោមដី។ អ៊ីចឹងអ្វីដែលជាបញ្ហាប្រឈមចំពោះបញ្ហាខ្វះទឹកនេះយើងបានដោះស្រាយហើយ»។
រដ្ឋាភិបាលបានឲ្យពលរដ្ឋត្រៀមទឹកទុកសម្រាប់ប្រើប្រាស់ នៅក្នុងរដូវប្រាំងខាងមុខដោយកម្ពុជា នឹងរងឥទ្ធិពលដោយប្រយោលនៃបាតុភូត អែល នីណូ (El Nino)៕