.jpg)
លោក ហ៊ុន សែន ក្នុងពិធីនៅខេត្តកណ្តាលពីថ្ងៃ ២៨ កុម្ភៈ។ រូបថត SPM
កណ្តាលៈ រាជរដ្ឋាភិបាលមានគម្រោងកាត់តំបន់មួយចំនួនក្នុងទឹកដីស្រុកល្វាឯម ខេត្តកណ្ដាល ចូលមកក្នុងការគ្រប់គ្រងរបស់រដ្ឋបាលរាជធានីភ្នំពេញក្រោយពីសាងសង់ស្ពានឆ្លងកាត់ទន្លេមេគង្គចំនួន ២ ទៀតរួច។ នេះបើយោងតាមប្រសាសន៍របស់លោកនាយករដ្ឋមន្ត្រី ហ៊ុន សែន ក្នុងពិធីស្រោចស្រពព្រះសុគន្ធវារីប្រគេនសម្តេចព្រះសង្ឃនាយករង ៣ ព្រះអង្គ ដែលត្រូវបានធ្វើឡើងកាលពីព្រឹកថ្ងៃទី ២៨ ខែ កុម្ភៈ ឆ្នាំ ២០២០។
សម្តេចព្រះសង្ឃនាយករងទាំង ៣ ព្រះអង្គដែលបានទទួលស្រោចស្រពព្រះសុគន្ធវារីនៅថ្ងៃនោះរួមមាន សម្តេចព្រះពោធិវង្ស អំ លីមហេង សម្តេចព្រះសង្ឃនាយករងទី ១ សម្តេចព្រះវ័នរ័ត ណយ ច្រឹក សម្តេចព្រះសង្ឃនាយករងទី ២ និង សម្តេចព្រះឧត្តមវង្សា មួង រ៉ា សម្តេចព្រះសង្ឃនាយករងទី ៣។
លោកនាយករដ្ឋមន្ត្រីថ្លែងថា ដោយសារប្រទេសជាតិមានសុខសន្តិភាពប្រជាពលរដ្ឋមានជីវភាពល្អប្រសើរធ្វើឲ្យវិស័យពុទ្ធចក្រ និងអាណាចក្រមានដំណើរការរីកចម្រើនទៅមុខជាបន្តបន្ទាប់។ ជាមួយដំណើរការរីកចម្រើននេះ ស្ពានឆ្លងទន្លេមេគង្គចំនួន ២ ខ្សែទៀតនឹងត្រូវសាងសង់ក្នុងពេលដ៏ខ្លីខាងមុខនេះ ដើម្បីតភ្ជាប់តំបន់ជ្រោយចង្វារ និងច្បារអំពៅនៃរាជធានីភ្នំពេញទៅកាន់តំបន់អរិយក្សត្រនៃស្រុកល្វាឯម ខេត្តកណ្ដាលដែលនឹងផ្ដល់នូវសារៈប្រយោជន៍បន្ថែមទៀតដល់ប្រជាពលរដ្ឋកម្ពុជា ពិសេសប្រជាពលរដ្ឋដែលរស់នៅក្បែរតំបន់គម្រោងអភិវឌ្ឍន៍ស្ពានទាំង ២ ខ្សែនេះ។ លោកថ្លែងថា៖ «តំបន់អរិយក្សត្រនឹងក្លាយជាខណ្ឌមួយចំណុះឲ្យរដ្ឋបាលរាជធានីភ្នំពេញ ក្រោយពីស្ពានត្រូវបានសាងសង់ឆ្លងទៅដល់តំបន់នោះ»។
កាលពេលថ្មីៗនេះលោក ហ៊ុន សែន បានស្នើរដ្ឋាភិបាលកូរ៉េខាងត្បូង ដើម្បីជួយកសាងស្ពានឆ្លងកាត់ទន្លេមេគង្គពីតំបន់ជ្រោយចង្វារឆ្ពោះទៅកាន់ស្វាយជ្រំនៅតំបន់អរិយក្សត្រ។ ក្រៅពីនេះរាជរដ្ឋាភិបាលក៏គ្រោងសាងសង់ស្ពានពីតំបន់ក្តីតាកុយ ខណ្ឌច្បារអំពៅទៅកាន់ស្រុកល្វាឯមក្នុងភូមិសាស្ត្រខេត្តកណ្ដាលផងដែរ។
ជុំវិញការលើកឡើងអំពីគម្រោងកាត់តំបន់អរិយក្សត្រឲ្យមកស្ថិតក្រោមការគ្រប់គ្រងរបស់រដ្ឋបាលរាជធានីភ្នំពេញនេះលោក ភឹម ភីរ៉ា អភិបាលស្រុកល្វាឯមបានប្រាប់ភ្នំពេញប៉ុស្តិ៍ថា មកទល់ពេលនេះលោកនៅមិនទាន់ដឹងច្បាស់អំពីចំនួនភូមិឃុំ នៃស្រុកល្វាឯមដែលនឹងត្រូវកាត់ចូលក្នុងរាជធានីភ្នំពេញនោះទេ។
លោកថ្លែងថា៖ «យ៉ាងណាក៏ដោយនៅពេលនេះប្រជាពលរដ្ឋមួយចំនួនដែលមានលំនៅឋានជាប់តំបន់អភិវឌ្ឍន៍គម្រោងសាងសង់ស្ពានទាំង ២ ខ្សែនោះមានក្ដីរីករាយដោយរំពឹងថា ជីវភាពរស់នៅរបស់ពួកគេនឹងមានភាពកាន់តែល្អប្រសើរឡើងថែមមួយកម្រិតទៀតនៅពេលស្ពានទាំង ២ ខ្សែនោះត្រូវបានស្ថាបនារួច»។
លោក កាន់ ពេញ នាយនគរបាលប៉ុស្តិ៍ឃុំអរិយក្សត្រថ្លែងថា ការកាត់តំបន់អរិយក្សត្រចូលក្នុងរាជធានីភ្នំពេញក្រោយពីស្ពានត្រូវបានស្ថាបនារួចនោះគឺល្អបំផុតព្រោះតំបន់អរិយក្សត្រនាពេលនេះក៏មានការអភិវឌ្ឍរីកចម្រើនជាបន្តបន្ទាប់ផងដែរ ខណៈតំបន់នេះមានភូមិសាស្ត្រយ៉ាងប្រកៀកទៅនឹងរាជធានីភ្នំពេញដែលឈមជាមួយខណ្ឌជ្រោយចង្វារផ្នែកខាងជើងឆៀងខាងលិច និងខាងត្បូងឆៀងខាងលិចនៃខណ្ឌច្បារអំពៅ។
លោកពេញថ្លែងថា៖ «គ្រាន់តែសម្ដេចតេជោប្រកាសឲ្យដឹងពីគម្រោងនេះ [សង់ស្ពាន និង កាត់តំបន់អរិយក្សត្រចូលរាជធានីភ្នំពេញ] ភ្លាមនោះអ្នកភូមិមួយចំនួនបានប្រកាសដំឡើងថ្លៃដីរបស់ពួកគាត់តែម្ដង»៕
