.jpg)
តំបន់មួយចំនួន នឹងបន្តមានភ្លៀងធ្លាក់ដល់ដើមខែកញ្ញា ដោយប្រព័ន្ធសម្ពាធទាបសកម្មមួយដែលលាតសន្ធឹងពីប្រទេសភូមា។ រូបថត ភ្នំពេញ ប៉ុស្តិ៍
ភ្នំពេញៈ ចាប់ពីម្សិលមិញរហូតដល់ដើមខែកញ្ញាខាងមុខ តំបន់មួយចំនួននៅជាប់ជួរភ្នំ និងខ្ពង់រាបភាគខាងជើង និងភាគឦសាន ជាពិសេសតំបន់ផ្ទៃរងទឹកភ្លៀងនៃអាងទន្លេមេគង្គលើនៃប្រទេសកម្ពុជា និងតំបន់មួយចំនួនទៀត នៅជាប់ព្រំដែនវៀតណាមមានភ្លៀងធ្លាក់ពីតិចទៅច្រើន។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ឲ្យដឹងថា ព្យុះ BAVI ដែលវិវត្តចេញពីប្រព័ន្ធសម្ពាធទាបសកម្មមួយនៅហ្វីលីពីន គ្មានឥទ្ធិពលអ្វីមកលើកម្ពុជានោះទេ ដោយសារព្យុះនេះបានធ្វើដំណើរឆ្ពោះទៅកាន់ឧបទ្វីបកូរ៉េ និងបានស្រូបយកកំណកទឹកភ្លៀងមួយផ្នែកពីលម្ហអាកាសនៃតំបន់ឈូងសមុទ្រចិនភាគខាងត្បូង។
ប៉ុន្តែប្រព័ន្ធសម្ពាធទាបសកម្មថ្មីមួយទៀតដែលលាតសន្ធឹងពីប្រទេសភូមា ទៅដល់ឈូងសមុទ្រចិនខាងត្បូងដោយអូសកាត់លើភាគខាងជើងប្រទេសថៃ ឡាវ និងប្រទេសវៀតណាម កំពុងវិវត្តខ្លួនទៅជាព្យុះទីហ្វុងថ្មីមួយផ្សេងទៀតក្នុងពេលឆាប់ៗខាងមុខហើយឥទ្ធិពលរបស់វានឹងគ្របដណ្ដប់លើតំបន់ផ្ទៃរងទឹកភ្លៀងនៃអាងទន្លេមេគង្គភាគខាងលើប្រទេសកម្ពុជា។ «ស្ថានភាពនេះនឹងបង្កឲ្យមានភ្លៀងធ្លាក់ច្រើនទៀតនៅតំបន់ផ្ទៃរងទឹកភ្លៀងនៃអាងទន្លេមេគង្គលើ និងនៅតំបន់ខ្ពង់រាបភាគខាងជើង និងឦសាននៃប្រទេសកម្ពុជា ជាពិសេសបណ្តាខេត្តជាប់ព្រំដែនកម្ពុជាវៀតណាម។ រីឯទឹកទន្លេមេគង្គក៏នឹងបន្តហក់ឡើងជាលំដាប់នៅគ្រប់ស្ថានីយជលសាស្ត្រ»។
បើតាមលោក យុត្ថា ចាប់ពីដើមខែកញ្ញា ដល់ចុងខែតុលា ភ្លៀងនឹងធ្លាក់រាយប៉ាយគ្របដណ្ដប់លើផ្ទៃប្រទេសក្នុងកម្រិតពីតិចទៅច្រើន និងមានខ្យល់បក់បោកខ្លាំង ពិសេសនៅតំបន់មាត់សមុទ្រ។ ដោយឡែកបាតុភូតផ្គររន្ទះ នឹងមានការថមថយបន្តិចវិញ។
យ៉ាងណាក្តីលោកបានអំពាវនាវដល់ប្រជាពលរដ្ឋឲ្យបង្កើនការប្រុងប្រយ័ត្នចំពោះជំនន់ទឹកភ្លៀងដែលនឹងកើតមាននៅតាមតំបន់ផ្ទៃរងទឹកភ្លៀងមួយចំនួន ពិសេសតំបន់ផ្ទៃរងទឹកភ្លៀងនៃជួរភ្នំ និងខ្ពង់រាប និងតំបន់ផ្ទៃរងទឹកភ្លៀងនៃអាងទន្លេមេគង្គភាគខាងលើនៃប្រទេសកម្ពុជា៕
