.jpg)
សត្វស្លាបដែលរស់នៅតំបន់អភិរក្សបឹងស្នេហ៍ទួលពាន់តាឡី។ រូបថត ហ្វេសប៊ុក
ព្រៃវែង៖ ស្ថានភាពសត្វស្លាបក្នុងតំបន់អភិរក្សបឹងស្នេហ៍ទួលពាន់តាឡី នៅពេលនេះបានវិលត្រឡប់មករកភាពធម្មតាឡើងវិញហើយ ប៉ុន្តែដើម្បីបង្ការទប់ស្កាត់ការរីករាលដាលនៃជំងឺកូវីដ ១៩ អាជ្ញាធរស្រុកបាភ្នំ បានបន្តបិទខ្ទប់ទេសចរណ៍ចូលទស្សនាសត្វស្លាបក្នុងតំបន់នោះ។ នេះបើតាមការអះអាងរបស់ប្រជាសហគមន៍បឹងស្នេហ៍ទួលពាន់តាឡី។
លោក ពុទ្ធ បូ ប្រធានសហគមន៍អភិរក្សបឹងស្នេហ៍ទួលពាន់តាឡី បានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ២១ ខែមេសានេះថា ក្នុងរយៈពេលមួយសប្ដាហ៍ចុងក្រោយនេះចំនួនសត្វស្លាបងាប់នៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡី បានប្រទះឃើញត្រឹមតែ ៣ ទៅ ៤ ក្បាលប៉ុណ្ណោះក្នុងមួយថ្ងៃ។ ចំនួននេះបានថយចុះយ៉ាងគំហុកបើធៀបទៅនឹងថ្ងៃដំបូងនៃការផ្ទុះជំងឺគ្រុនផ្ដាសាយបក្សី A/H5N1 ដែលមានចំនួនរហូតដល់ជាង ១០០ ក្បាល។
លោកថ្លែងថា៖ «ការធ្លាក់ចុះនៃអត្រាងាប់សត្វស្លាបព្រៃក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីនាពេលនេះ អាចបណ្ដាលមកពីមេរោគជំងឺគ្រុនផ្ដាសាយបក្សី A/H5N1 ថយចុះនូវឥទ្ធិពលរបស់វា ឬត្រូវសាបរលាប ព្រោះប៉ុន្មានថ្ងៃនេះមានភ្លៀងធ្លាក់ច្រើន»។
លោកបានបន្តថា យោងតាមទិន្នន័យដែលបានកត់ត្រាចាប់តាំងពីថ្ងៃទី ១៧ ខែ មីនា ឆ្នាំ ២០២១ រហូតមកទល់ថ្ងៃទី ១៩ ខែមេសា កន្លងទៅនេះ សត្វស្លាបព្រៃក្នុងតំបន់អភិរក្សបឹងស្នេហ៍ទួលពាន់តាឡី ដែលបានងាប់ដោយសារជំងឺគ្រុនផ្ដាសាយបក្សី A/H5N1 មានចំនួន ២០០៩ ក្បាល រួមមាន សត្វចង្កៀលខ្យង ក្អែកទឹក កុកគ្រោង ខ្វែកត្រយ៉ងខ្លួនរលោង និងសត្វអូដ្ឋស្បូវ។ ក្នុងចំណោមនោះ សត្វចង្កៀលខ្យងបានងាប់ច្រើនជាងគេ គឺរហូតដល់ ២ ០០០ ក្បាល។
លោក កង ធឿង ប្រធានក្រុមប្រជាការពារភូមិកំពុងស្លែង ឃុំធាយ ដែលអះអាងថា នៅពេលព្រឹក និងពេលល្ងាច លោកបានដឹកនាំកម្លាំងប្រជាការពារភូមិ និងប្រជាសហគមន៍ ចូលរួមជាមួយក្រុមមន្ត្រីជំនាញបសុសត្វ និងមន្ត្រីបរិស្ថាន ចុះរុករក និងប្រមូលសត្វដែលបានងាប់ក្នុងតំបន់អភិរក្សបឹងស្នេហ៍ទួលពាន់តាឡី ដើម្បីដុតកម្ទេចចោល ហើយពេលយប់ដឹកនាំប្រជាការពារចូលរួមជាមួយកម្លាំងនគរបាលប៉ុស្តិ៍ ល្បាតត្រួតពិនិត្យរក្សាសន្តិសុខសង្គម និងហាមឃាត់អ្នកដែលល្មើសបម្រាមរបស់អាជ្ញាធរស្ដីពីការអនុវត្ត វិធានការទប់ស្កាត់ជំងឺកូវីដ ១៩ បានប្រាប់ ភ្នំពេញ ប៉ុស្តិ៍ថា ក្នុងរយៈពេល ២ ថ្ងៃជាប់គ្នានេះ [ថ្ងៃទី ២០-២១ ខែ មេសា ឆ្នាំ ២០២១] ក្រុមការងាររបស់លោកមិនប្រទះឃើញសត្វស្លាបងាប់ទៀតនោះទេ។
លោកបានបញ្ជាក់ថា៖ «ទោះជាយ៉ាងណាក៏ដោយ អាជ្ញាធរស្រុកបាភ្នំ និងមន្ទីរបរិស្ថានខេត្តព្រៃវែង នៅមិនទាន់ប្រកាសបើកឲ្យដំណើរការទទួលភ្ញៀវទេសចរណ៍ចូលមកទស្សនាកម្សាន្តសត្វស្លាបនៅក្នុងតំបន់នេះឡើងវិញទេ ព្រោះបារម្ភពីការឆ្លងរីករាលដាលនៃជំងឺកូវីដ ១៩»។
សត្វស្លាបជាច្រើនពាន់ក្បាលត្រូវបានប្រមូលយកមកដុតចោល ដែលងាប់ដោយសារមេរោគជំងឺគ្រុនផ្ដាសាយបក្សី A/H5N1 នាពេលកន្លងមក។ រូបថត ហ្វេសប៊ុក
លោក ទេព ភារុន អភិបាលស្រុកបាភ្នំ បានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែមេសាថា ការមិនប្រទះឃើញវត្តមានសត្វស្លាបព្រៃនៅក្នុងតំបន់នេះងាប់តទៅទៀតនេះ គឺជាសញ្ញាមួយបង្ហាញថា មេរោគគ្រុនផ្ដាសាយបក្សី A/H5N1 បានអស់ឥទ្ធិពលមកលើសត្វស្លាបព្រៃនៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីហើយ។ ប៉ុន្តែ ក្នុងអំឡុងពេលនេះ ការរីកឆ្លងរាលដាលនៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ កំពុងបង្កហានិភ័យកាន់តែខ្លាំងឡើង ដែលតម្រូវឲ្យមានការបិទខ្ទប់ការហូរចូលទេសចរណ៍ទស្សនាកម្សាន្តសត្វស្លាបក្នុងតំបន់នេះជាបន្តទៀត។
លោក ភារុន បានថ្លែង៖ «យើងពិតជារីករាយណាស់ នៅពេលទទួលដំណឹងពីមន្ត្រីមូលដ្ឋាន និងប្រជាសហគមន៍អះអាងថា សត្វស្លាបព្រៃក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡី លែងងាប់ទៀតហើយ។
ទោះយ៉ាងណា ខ្ញុំសូមឲ្យបងប្អូនប្រជាពលរដ្ឋមេត្តាអត់ធ្មត់ ហើយចូលរួមសហការជាមួយអាជ្ញាធរ បន្តផ្អាកការនាំភ្ញៀវទេសចរចូលទស្សនាសត្វស្លាបព្រៃក្នុងតំបន់នេះមួយរយៈពេលបន្ថែមទៀត ព្រោះក្នុងអំឡុងពេលនេះការរីកឆ្លងរាលដាលនៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ កំពុងបង្កគ្រោះថ្នាក់ខ្លាំងណាស់»។
លោកបានបន្តថា នៅពេលនេះអាជ្ញាធរកំពុងអនុវត្តវិធានការបិទខ្ទប់ការឆ្លងរីករាលដាលនៃជំងឺកូវីដ ១៩ ដោយមិនអនុញ្ញាតឲ្យបុគ្គលណាម្នាក់ ដែលគ្មានភារកិច្ចចាំបាច់ ត្រូវធ្វើដំណើរឆ្លងកាត់ពីខេត្តមួយទៅខេត្តមួយនោះទេ ជាពិសេសពីតំបន់ដែលមានការរកឃើញនូវវត្តមានអ្នកឆ្លងជំងឺកូវីដ ១៩។ អ្នកដែលល្មើសនឹងបម្រាមនេះនឹងត្រូវប្រឈមការផាកពិន័យអន្តរកាល ឬនិងត្រូវប្រឈមការផ្ដន្ទាទោសជាប់ពន្ធនាគារពី ៦ ខែទៅ ១ ឆ្នាំ។
ទន្ទឹមជាមួយគ្នានេះ លោក តូច វ៉ារដ្ឋា ប្រធានមន្ទីរបរិស្ថានខេត្តព្រៃវែង បានប្រាប់ ភ្នំពេញ ប៉ុស្តិ៍ថា ក្រោយស្ថានការណ៍នៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ត្រូវបានទប់ស្កាត់ដោយជោគជ័យហើយនោះ គណៈកម្មការចម្រុះថ្នាក់ជាតិ និងថ្នាក់ខេត្ត នឹងចុះវាយតម្លៃអំពីស្ថានភាពសត្វស្លាបព្រៃនៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីជាថ្មីម្ដងទៀត។ ក្នុងករណីជំងឺគ្រុនផ្ដាសាយបក្សី A/H5N1 អស់ឥទ្ធិពលដូចអ្វីដែលក្រុមមន្ត្រីប្រចាំការនៅក្នុងតំបន់នោះបានសន្និដ្ឋាន គណៈកម្មការជំនាញថា្នក់ជាតិ និងថ្នាក់ខេត្ត នឹងប្រកាសឲ្យដំណើរការទទួលភ្ញៀវទេសចរចូលទៅទស្សនាកម្សាន្តសត្វស្លាបព្រៃក្នុងតំបន់នេះឡើងវិញ។
លោកបានបញ្ជាក់ថា៖ «ឥឡូវយើងកំពុងរវល់រឿងទប់ស្កាត់ការរីករាលដាលជំងឺកូវីដ ១៩ អ៊ីចឹងទេ យើងត្រូវរង់ចាំដល់ស្ថានការណ៍កូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ត្រូវបានដោះស្រាយចប់ជាស្ថាពរសិន ទើបអាចអនុញ្ញាតឲ្យបើកដំណើរការទទួលភ្ញៀវទេសចរចូលកម្សាន្តក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីវិញបាន»៕
