The Phnom Penh Post Search

Search form




Logo of Phnom Penh Post newspaper Phnom Penh Post - តំបន់​ព្រែក​ទាល់​គ្រោង​ស្នើ​បញ្ចូល​ជា​សមាជិក​តំបន់​រ៉ាំ​សារ​ជា​ផ្លូវ​ការ

តំបន់​ព្រែក​ទាល់​គ្រោង​ស្នើ​បញ្ចូល​ជា​សមាជិក​តំបន់​រ៉ាំ​សារ​ជា​ផ្លូវ​ការ

តំបន់​បឹង​សត្វ​ស្លាប​រស់​នៅ ស្ថិត​ក្នុង ខេត្ត​បាត់ដំបង។
តំបន់​បឹង​សត្វ​ស្លាប​រស់​នៅ ស្ថិត​ក្នុង ខេត្ត​បាត់ដំបង។ ម៉ៃ វីរៈ

តំបន់​ព្រែក​ទាល់​គ្រោង​ស្នើ​បញ្ចូល​ជា​សមាជិក​តំបន់​រ៉ាំ​សារ​ជា​ផ្លូវ​ការ

ភ្នំពេញៈ ក្រសួង​បរិស្ថាន​គ្រោង​ដាក់​លិខិត​ទៅ​ទីស្តីការ​គណៈ​រដ្ឋ​មន្រ្តី​ក្រោយ​ពិធី​បុណ្យ​អុំ​ទូក ដើម្បី​សុំ​ការ​ទទួល​ស្គាល់​ជា​សំណើ​ផ្លូវ​ការ​ទៅ​កាន់​ប្រទេស​ជា​សមាជិក​នៃ​តំបន់​រ៉ាំសារ (Ramsar) ដាក់​បញ្ចូល​តំបន់​ព្រែក​ទាល់ ស្ថិត​ក្នុង ស្រុក​ឯក​ភ្នំ ខេត្ត​បាត់ដំបង ជា​តំបន់​អភិរក្ស​សំខាន់ (International Protection Importance) ដោយ​សារ​តំបន់​នេះ ជា​ជម្រក​សត្វ​ស្លាប ជម្រក​ត្រី​ពង និង​មាន​ព្រៃ​លិច​ទឹក ជាច្រើន​កន្លែង។

ប្រធាន​នាយកដ្ឋាន​តំបន់​ដី​សើម​និង​តំបន់​ឆ្នេរ​នៃ​អគ្គ​នាយកដ្ឋាន​រដ្ឋបាល​ការពារ​និង​អភិរក្ស​ធម្មជាតិ​នៃ​ក្រសួង​បរិស្ថាន​លោក ស្រី ស៊ុនលាង បាន​ប្រាប់ ភ្នំពេញ ប៉ុស្តិ៍ កាល​ពី​ម្សិល​មិញ​នេះ​ថា គម្រោង​ស្នើ​នេះ គឺ​ទាមទារ​ការ​ឆ្លើយ​តប​ពី​ប្រមុខ​រដ្ឋាភិបាល​កម្ពុជា ជា​មុន​សិន ដើម្បី​រៀបចំ​ជា​ប្រកាស​ស្នើ​ទៅ​កាន់​ប្រទេស​ជា​សមាជិក​រ៉ាំសារ​ពិចារណា។

លោក​បាន​ប្រាប់​ថា៖ «ការ​ដែល​យើង​ស្នើ​នេះ ព្រោះ​តំបន់​ព្រែក​ទាល់​នេះ​ជា​តំបន់​ស្នូល ជាប់​គ្រប់​លក្ខខណ្ឌ​ទាមទារ​របស់​រ៉ាំសារ ហើយ​ត្រូវ​បាន​អ្នក​ជំនាញ​បច្ចេកទេស​របស់​រ៉ាំសារ និង​អ្នក​ជំនាញ​របស់​ក្រសួង​បរិស្ថាន​ចុះ​សិក្សា​ផ្ទាល់​ម្តង​រួច​មក​ហើយ។»

បើ​តាម​លោក ស្រី ស៊ុនលាង នៅ​ប្រទេស​កម្ពុជា តំបន់​ចំនួន ៣ ត្រូវ​បាន​ដាក់​ចូល​ក្នុង​តំបន់​រ៉ាំសារ។ ទី​មួយ​តំបន់ បឹង​ឆ្មារ និង​ប្រព័ន្ធ​ព្រែក ស្ថិត​នៅ​បឹង​ទន្លេ​សាប ខេត្ត​កំពង់ធំ មាន​ផ្ទៃ​ដី​សរុប ២៨ ពាន់​ហិកតា ជា​តំបន់​សម្បូរ​ដោយ​ព្រៃ​លិច​ទឹក ដើម​រាំង ជា​ទី​ចំណី​សត្វ​ស្លាប​ទឹក​សំខាន់ៗ ត្រី និង​ពពួក​សត្វ​ល្មូន។ ទី​ពីរ តំបន់​កោះ​កាពិ ខេត្ត​កោះកុង មាន​ផ្ទៃ​ដី​សរុប ១២ ពាន់​ហិកតា ជា​តំបន់​តែ​មួយ​គត់ ដែល​សម្បូរ​ព្រៃ​កោង​កាង​មាន​គុណភាព និង ទី៣ តំបន់​រ៉ាំសារ​ស្ទឹងត្រែង ស្ថិត​នៅ​ប៉ែក​ខាង​ជើង ខេត្ត​ស្ទឹងត្រែង តាម​ដង​ទន្លេ​មេគង្គ មាន​ផ្ទៃ​ដី​សរុប ១៤ ពាន់ ៦ រយ​ហិកតា ជា​តំបន់​ចរន្ត​ទឹក​ហូរ​ខ្លាំង​ប្រកប​ដោយ​ផ្លូវ​ទឹក​តូច​ជា​ច្រើន នៅ​ចន្លោះ​ជួរ ថ្ម កោះ​តូច​ធំ ហើយ​មាន​អន្លង់​ជ្រៅៗ ខ្សាច់ និង​ផ្ទាំង​ថ្ម​ធំៗ។

លោក ឈិត សំអាត នាយក​មូលនិធិ​សកល​សម្រាប់​ការ​អភិរក្ស​ធនធាន​ធម្មជាតិ​បាន​ឲ្យ​ដឹង​តាម​ការ​សិក្សា​ឃើញ​ថា តំបន់​នេះ​សម្បូរ​ទៅ​ដោយ​ជីវចម្រុះ។

លោក​ថ្លែង​ថា៖ «បើ​ក្លាយ​ជា​តំបន់​រ៉ាំសារ (តំបន់​ព្រែក​ទាល់) នឹង​ទទួល​បាន​ការ​ការពារ​ខ្ពស់ ព្រោះ​តំបន់​អភិរក្ស​ភាគ​ច្រើន​រង​ការ​គំរាម​កំហែង​ច្រើន​ដោយ​សារ​ការ​កសាង​ទំនប់​វារី​អគ្គិសនី និង​សកម្មភាព​ខុស​ច្បាប់ ម្លោះ​ហើយ​បើ​យើង​បាន​ដាក់​បញ្ចូល​នឹង​ជួយ​ឲ្យ​មាន​ការ​ការពារ»។

រ៉ាំសារ គឺជា​អនុសញ្ញា​រួម និង​ជា​សន្ធិ​សញ្ញា​អន្តរជាតិ ស្តី​ពី​ការ​អភិរក្ស​និង​ការ​ប្រើ​ប្រាស់​តំបន់​ដី​សើម​ប្រកប​ដោយ​និរន្តរភាព ផ្តោត​លើ​បរិស្ថាន​និង​ប្រព័ន្ធ​អេកូ​ឡូស៊ី។ បើ​តាម​តួ​លេខ​គិត​ត្រឹម ឆ្នាំ​២០០៦ អនុ​សញ្ញា រ៉ាំសារ នេះ​មាន​ប្រទេស​ជា​សមាជិក​ចំនួន ១៥៣ ដែល​មាន​ចំនួន ១ ៦៣៤ តំបន់ លើ​ផ្ទៃ​រាប់​សិប​ម៉ឺន​ហិកតា ដែល​ជា​តំបន់​អភិរក្ស​សំខាន់ៗ៕

អត្ថបទគួរចាប់អារម្មណ៍