ភ្នំពេញៈ ប្រជានេសាទសមុទ្រត្រូវ បានហាមឃាត់នេសាទត្រីកាម៉ុងឬ ត្រីប្លាធូ ក្នុងរយៈ ពេល ៧៦ ថ្ងៃ ដោយចាប់ផ្ដើមពីថ្ងៃទី ១៥ ខែមករាដល់ថ្ងៃទី ៣១ ខែមីនា ខាងមុខនេះដោយសារ រដូវពងកូនរបស់វាបានមកដល់។ នេះ បើតាមសេចក្ដីជូនដំណឹងរបស់រដ្ឋបាលជលផលចុះ ថ្ងៃទី ១៤ ខែមករា ឆ្នាំ ២០១៩ ដែលភ្នំពេញប៉ុស្តិ៍ ទទួលបានកាលពីម្សិលមិញ។
តាមមន្ត្រីជំនាញជលផលបានថ្លែងថា ត្រីកាម៉ុងឬត្រីប្លាធូជាប្រភេទត្រីបំផ្លាស់ទី។ ពួកវាចូលចិត្តរស់នៅជាហ្វូងក្នុងជម្រៅទឹកជាមធ្យមចន្លោះពី ៣០ ម៉ែត្រ ទៅ ៤០ ម៉ែត្រ ហើយចូលចិត្តស៊ីរុក្ខជាតិសមុទ្រ និងប្លុងតុងជាអាហារ។ ជាទូទៅនៅចន្លោះពាក់កណ្ដាលខែមករា រហូតដល់ដំណាច់ខែមីនា ពួកវាតែងតែឡើងមកតំបន់ក្បែរមាត់ឆ្នេរដើម្បីបង្កាត់ពូជពោលគឺរយៈពេលនេះជារដូវពងកូនរបស់វា។
លោក ហុង ហី ប្រធាននាយកដ្ឋានរដ្ឋបាលនៃរដ្ឋបាលជលផលបានថ្លែងកាលពីម្សិលថា៖ «ដើម្បីធានានូវនិរន្តរភាពធនធានជលផលសមុទ្រនៅកម្ពុជា ជារៀងរាល់ឆ្នាំក្នុងចន្លោះពេលនេះរដ្ឋបាលជលផលតែងចេញសេចក្តីជូនដំណឹងស្ដីពីការហាមឃាត់ នេសាទត្រីកាម៉ុងឬត្រីប្លាធូនេះដល់ប្រជានេសាទសមុទ្រ»។
យ៉ាងណាក្ដី ប្រជានេសាទខ្លះថា ការនេសាទត្រីកាម៉ុង ត្រូវចំណាយទុនច្រើនដោយត្រូវប្រើប្រាស់ទូកអូសគូកម្លាំងម៉ាស៊ីនខ្លាំង និងត្រូវប្រើមងឬអួនវែងៗនិងមានជម្រៅទឹកចាប់ពី ១០ ម៉ែត្រឡើងទៅប៉ុន្តែអ្នកនេសាទលក្ខណៈគ្រួសារមួយចំនួនពុំមានលទ្ធភាពក្នុងការចាប់វាទេ។
ប្រជានេសាទក្នុងសង្កាត់ត្រើយកោះ ក្រុងកំពត ខេត្តកំពតលោក នាក់ សេន ដែលថាមានតែលបក្ដាម និងឧបករណ៍ឈឹបសម្រាប់នេសាទត្រីប្រភេទចម្រុះក្នុងតំបន់ទឹករាក់នោះបានប្រាប់ភ្នំពេញប៉ុស្តិ៍កាលពីម្សិលមិញថា កាលពី ២០ ឆ្នាំមុន គាត់អាចនេសាទត្រីកាម៉ុងបានយ៉ាងតិច ២ គីឡូ ក្នុង ១ ថ្ងៃ ប៉ុន្តែចាប់តាំងពីឆ្នាំ ២០១០ មក ត្រីកាម៉ុងលែងមានវត្តមានតាមឆ្នេរនៃខេត្តកំពតដូចមុនទៀតហើយ ដោយសារព្រៃកោងកាងត្រូវបានបំផ្លាញនិងចាក់ដីលុបដើម្បីអភិវឌ្ឍជារោងចក្រ។
លោក សេន បានបញ្ជាក់ថា៖ «កាលពីមុននៅខេត្តកំពតយើងក៏មានត្រីកាម៉ុងដែរ ប៉ុន្តែបច្ចុប្បន្នខ្ញុំមិនដែលឃើញ ឬជួបប្រទះហ្វូងវាឡើងមកដល់ក្បែរមាត់ឆ្នេរខេត្តកំពតយើងទេហើយពួកយើងក៏គ្មានលទ្ធភាពទិញទូកនិងឧបករណ៍នេសាទសម្រាប់ចាប់វាដែរ»។
ជុំវិញករណីនេះ លោក ស សូរិន នាយខណ្ឌរដ្ឋបាលជលផលខេត្តកំពតបានទទួលស្គាល់ថា បច្ចុប្បន្នត្រីកាម៉ុងពិតជាពុំសូវមានក្នុងដែនសមុទ្រនៃខេត្តនេះមែន ដោយសារប្រជុំកោះ ១ ចំនួនស្ថិតក្នុងខ្សែទឹកខាងក្នុងនិងមានជម្រៅទឹករាក់ជាងខ្សែទឹកខាងក្រៅនៃបណ្ដាប្រជុំកោះ ១ ចំនួនក្នុងខេត្តព្រះសីហនុ និងខេត្តកោះកុង។
លោកថ្លែងថា៖ «ប្រជានេសាទ ១ ចំនួនក្នុងខេត្តកំពតរបស់យើង ពួកគាត់ចេញទូកទៅនេសាទត្រីកាម៉ុងក្នុងខេត្តព្រះសីហនុ ៤-៥ ថ្ងៃម្ដង ទើបត្រឡប់មកវិញ ហើយពួកគាត់នេសាទបានប្រមាណពី ១០-២០ គីឡូ។ប៉ុន្តែចំពោះអ្នកព្យាយាមនេសាទនៅប្រជុំកោះ ១ ចំនួនក្នុងខេត្តកំពត និងខេត្តកែប ពួកគេអាចចាប់បានត្រីកាម៉ុងត្រឹម ៤-៥ គីឡូប៉ុណ្ណោះក្នុងរយៈពេលដូចគ្នានេះ»។
ចំណែកលោក ឯក ភា នាយខណ្ឌរដ្ឋបាលជលផលខេត្តព្រះសីហនុ ក៏បានប្រាប់ភ្នំពេញប៉ុស្តិ៍ដែរថា ត្រីកាម៉ុងមានច្រើននៅតំបន់កោះសេះ កោះប៉ូលូវ៉ៃកោះព្រីង និងប្រជុំកោះរ៉ុង។
លោកបានបន្តថា ប្រជានេសាទសមុទ្រស្ទើរទាំងអស់ក្នុងខេត្តនេះសុទ្ធតែដឹងច្បាស់ថា នេះជារដូវពងកូនរបស់ត្រីកាម៉ុង និងជាពេលត្រូវហាមនេសាទត្រីប្រភេទនេះបណ្ដោះអាសន្ន។
លោក ភា ថា៖ «យើងបានចុះផ្សព្វផ្សាយ និងបិទប្រកាសសេចក្ដីជូនដំណឹងស្ដីពីការបិទនេសាទត្រីកាម៉ុងនេះដល់មូលដ្ឋាននៃសហគមន៍នេសាទ និងទីតាំងប្រមូលផលនេសាទដើម្បីឲ្យពួកគេបញ្ឈប់ការចាប់ឬប្រមូលផលវាជាបណ្ដោះអាសន្ន»។
បើតាមលោក ភា ក្នុង ១ ឆ្នាំៗខេត្តព្រះសីហនុប្រមូលផលត្រីសមុទ្រចម្រុះបានជាង ៤០០០ តោន ក្នុងនោះមានត្រីកាម៉ុង ប្រមាណជាង ៥០០ តោន។
លោក ណុន ឌឿន ប្រជានេសាទនៅភូមិកោះខ្យង ឃុំអូរជ្រៅ ស្រុកព្រៃនប់ ខេត្តព្រះសីហនុ បានថ្លែងថា ពេលនេះប្រជានេសាទក្នុងសហគមន៍គាត់កំពុងមមាញឹករៀបចំឧបករណ៍ចាប់បង្គា ក្ដាម និងមឹក។
លោកថា៖ «ការពិតរដូវនេះជារដូវហាមនេសាទត្រីកាម៉ុង តែការនេសាទតែបង្គាក្ដាម មិនគ្រប់គ្រាន់ទេ គឺយើងអាចចាប់ត្រីចម្រុះមួយចំនួនក្រៅពីត្រីកាម៉ុង ដើម្បីផ្គត់ផ្គង់ដល់គ្រួសារ»៕