ភ្នំពេញ៖ ក្នុងត្រីមាសទី១ ឆ្នាំនេះ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» សង្កេតឃើញបទល្មើសពាក់ព័ន្ធនឹងការលក់អាល់កុល និងជែលក្លែងក្លាយមានការចុះថយគួរឱ្យកត់សម្គាល់ បើប្រៀបធៀបនឹងឆ្នាំមុន ហើយការយល់ដឹងពីហានិភ័យពាក់ព័ន្ធអាល់កុល និងជែលក្លែងក្លាយរបស់អាជីវករមានការកើនឡើង។
លោក ផាន អូន អគ្គនាយកនៃអគ្គនាយកដ្ឋាន «ក.ប.ប.» នៃក្រសួងពាណិជ្ជកម្មបានប្រាប់ ភ្នំពេញ ប៉ុស្ដិ៍ ពីម្សិលមិញថា ក្នុងត្រីមាសទី១ ឆ្នាំនេះ មន្រ្តីស៊ើបអង្កេតនៃអគ្គនាយកដ្ឋាន ក.ប.ប. បានចុះស៊ើបអង្កេត តាមទីតាំងលក់ និងចែកចាយអាល់កុល និងជែលនៅតាមទីផ្សារនិងឱសថស្ថាននានា ដោយបានយកគំរូនៃអាល់កុល និងជែលចំនួន ៧៨ គំរូ ដែលបានប្រមូលវិភាគ ក្នុងនោះមានតែ ២ គំរូ ប៉ុណ្ណោះដែលជាអាល់កុលក្លែងក្លាយ។
លោកបានថ្លែងថា ក្នុងចំណោមអាល់កុល និងជែលក្លែងក្លាយទាំងនេះ មានបរិមាណចំណុះ ៤៥.៥០ លីត្រ ត្រូវបានមន្រ្តីនៃអគ្គនាយកដ្ឋាន ក.ប.ប. រឹបអូស និងកម្ទេចចោល។ ជាមួយគ្នានេះ តម្រូវឱ្យម្ចាស់ធ្វើកិច្ចសន្យាបញ្ឈប់សកម្មភាពខិលខូចបែបនេះបន្តទៀត (ព្រោះជាករណីលើកទី១)។ កាលពីឆ្នាំ ២០២០ មន្រ្តីនៃអគ្គនាយកដ្ឋាន ក.ប.ប. រឹបអូសនិងកម្ទេចចោល អាល់កុល និងជែលក្លែងក្លាយជាង ៩៤ តោន និងសំណុំរឿងមួយចំនួនបានបញ្ជូនទៅតុលាការ៕