ភ្នំពេញៈ ក្នុងត្រីមាសទី១ ឆ្នាំនេះអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» សង្កេតឃើញបទល្មើសពាក់ព័ន្ធនឹងការលក់ អាល់កុល និងជេលក្លែងក្លាយមានការថយចុះគួរឱ្យកត់សម្គាល់បើប្រៀបធៀបនឹងឆ្នាំមុនហើយការយល់ដឹងពីហានិភ័យពាក់ព័ន្ធអាល់កុល និងជេលក្លែងក្លាយរបស់អាជីវករមានការកើនឡើង។
លោក ផាន អូន អគ្គនាយកនៃអគ្គនាយកដ្ឋាន «ក.ប.ប.» នៃក្រសួងពាណិជ្ជកម្មប្រាប់ ភ្នំពេញ ប៉ុស្ដិ៍ ពីម្សិលមិញថា ក្នុងត្រីមាសទី១ ឆ្នាំនេះ មន្ត្រីស៊ើបអង្កេតនៃអគ្គនាយកដ្ឋាន ក.ប.ប. បានចុះស៊ើបអង្កេតតាមទីតាំងលក់ និងចែកចាយអាល់កុល និងជេលនៅតាមទីផ្សារ និងឱសថស្ថាននានា ដោយបានយកគំរូនៃអាល់កុល និងជេលចំនួន ៧៨ គំរូដែលបានប្រមូលវិភាគ ក្នុងនោះមានតែ ២ គំរូប៉ុណ្ណោះដែលជាអាល់កុលក្លែងក្លាយ។
លោកថ្លែងថា ក្នុងចំណោមអាល់កុល និងជេលក្លែងក្លាយទាំងនេះមានបរិមាណចំណុះ ៤៥,៥០ លីត្រ ត្រូវបានមន្ត្រីនៃអគ្គនាយកដ្ឋាន ក.ប.ប. រឹបអូស និងកម្ទេចចោល ហើយបានឱ្យម្ចាស់ធ្វើកិច្ចសន្យាបញ្ឈប់សកម្មភាពខិលខូចបែបនេះបន្តទៀត (ព្រោះជាករណីលើកទី ១)។ ដោយឡែកកាលពីឆ្នាំ ២០២០ មន្ត្រីនៃអគ្គនាយកដ្ឋាន ក.ប.ប. រឹបអូស និងកម្ទេចចោលអាល់កុល និងជេលក្លែងក្លាយជាង ៩៤ តោន និងសំណុំរឿងមួយចំនួនបានបញ្ជូនទៅតុលាការ។
លោក ផាន អូន ថ្លែងថា៖ «យើងសង្កេតឃើញថា បទល្មើសពាក់ព័ន្ធនឹងអាល់កុល និងជេលមានការចុះថយគួរឱ្យកត់សម្គាល់ បើប្រៀបធៀបជាមួយឆ្នាំកន្លងមក ហើយការយល់ដឹងពីហានិភ័យពាក់ព័ន្ធអាល់កុល និងជេលក្លែងក្លាយរបស់អាជីវករក៏មានការយល់ដឹងកើនឡើង។ បច្ចុប្បន្នការដាក់តាំងលក់ជាទូទៅ គឺមានស្លាកសញ្ញា ដែលផ្ទុយស្រឡះទៅនឹងពេលមុនបង្ក្រាប»។
យោងតាមរបាយការណ៍អំពីយុទ្ធនាការនៃការចុះត្រួតពិនិត្យគុណភាពអាល់កុល និងជេលក្លែងក្លាយក្នុងត្រីមាសទី ១ ឆ្នាំនេះ បានឱ្យដឹងថា ចំពោះតំបន់ដែលពុំទាន់មានការផ្ទុះជំងឺកូវីដ១៩ ចូលក្នុងសហគមន៍មន្ត្រីនៃអគ្គនាយកដ្ឋាន ក.ប.ប. បានបន្តចុះទៅដល់ទីតាំងលក់ និងចែកចាយអាល់កុល និងជេលនៅតាមទីផ្សារ ឱសថស្ថានផ្ទាល់ ដើម្បីត្រួតពិនិត្យនូវគុណភាពអាល់កុល និងជេល។
ចំណែកទីតាំងកំពុងមានការផ្ទុះឡើងកូវីដ១៩ ចូលក្នុងសហគមន៍មន្ត្រីនៃអគ្គនាយកដ្ឋាន ក.ប.ប. ក៏បានចុះឃ្លាំមើលទីតាំងដែលធ្លាប់បានបង្ក្រាបដល់ឫសគល់នាឆ្នាំកន្លងទៅ។ ក.ប.ប. ឃ្លាំមើលពិនិត្យទីតាំងថ្មីបន្ថែមទៀត រួមទាំងនៅបន្តតាមអង្កេតតាមទីផ្សារឱសថស្ថាននានាផងដែរដើម្បីបង្ការទប់ស្កាត់ការកើតឡើងវិញនូវបទល្មើសការចរាចរ អាល់កុល និងជេលក្លែងក្លាយនៅលើទីផ្សារកម្ពុជា។
លោកបញ្ជាក់ថា៖ «ទាំងនេះជាផ្នែកមួយយ៉ាងសំខាន់នៃការផ្សព្វផ្សាយ និងអនុវត្តច្បាប់យ៉ាងម៉ឺងម៉ាត់ធ្វើឡើងជាប្រចាំដោយអគ្គនាយកដ្ឋាន ក.ប.ប.។ ពិសេសក្រោមការចង្អុលបង្ហាញដ៏ឈ្លាសវៃ និងការគិតគូរយកចិត្តទុកដាក់ខ្ពស់អំពីសុខុមាលភាពរបស់អ្នកប្រើប្រាស់ពីសំណាក់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម»។
បើតាមលោក ផាន អូន បន្ទាប់ពីកម្ពុជាមានការផ្ទុះជំងឺកូវីដ១៩ក្នុងសហគមន៍ឡើងវិញ ពលរដ្ឋបន្តមានការព្រួយបារម្ភ និងត្រូវការសម្ភារការពារខ្លួន ដូចជា អាល់កុល ជេលលាងដៃ និងម៉ាស់សម្រាប់ពាក់ការពារ តាមការណែនាំរបស់ក្រសួងសុខាភិបាលជាខ្លាំង។ ក៏ប៉ុន្តែតម្រូវការនេះបានធ្វើឱ្យជនឆ្លៀតឱកាសមួយចំនួនបានលក់សម្ភារទាំងនេះដំឡើងតម្លៃ និងក្លែងបន្លំសារធាតុអាល់កុល និងជេលជារបស់ក្លែងក្លាយគ្មានគុណភាព។
ដូច្នេះដើម្បីជាមូលដ្ឋានទប់ស្កាត់ ទង្វើរបស់ជនខិលខូចអគ្គនាយកដ្ឋាន ក.ប.ប. បានណែនាំឱ្យមន្ត្រី ក.ប.ប. គ្រប់សាខា រាជធានី-ខេត្ត ចុះត្រួតពិនិត្យគុណភាព និងតម្លៃនៅតាមទីផ្សាររួចរាយការណ៍មកអគ្គនាយកដ្ឋានជារៀងរាល់ថ្ងៃ។
អគ្គនាយកដ្ឋាន ក.ប.ប. បន្តអំពាវនាវ និងសំណូមពរដល់អាជីវករកុំឆ្លៀតឱកាសលក់ផលិតផលម៉ាស់ អាល់កុល សម្រាប់ លាងសម្អាតដៃ កិបកេងយកផលចំណេញ ហួសហេតុ និងអំពាវនាវដល់ពលរដ្ឋ កុំទិញផលិតផលអាល់កុល ជេលលាងដៃដែលគ្មានស្លាកសញ្ញា និងប្រភពច្បាស់លាស់ ដើម្បីចៀសវាងផលិតផលក្លែងក្លាយ គ្មានគុណភាព ហើយពេលប្រើនាំឱ្យប៉ះពាល់សុខភាព និងអាយុជីវិត។
លោក មៀច សុផាន់ណា រដ្ឋលេខាធិការ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) នៃក្រសួងមហាផ្ទៃថ្លែងពីម្សិលមិញថា គ.ប.ផ.ក បានសហការជាមួយក្រសួង និងសមត្ថកិច្ចពាក់ព័ន្ធក្នុងការអង្កេត និងបង្ក្រាបការចរាចរលក់ដូរផលិតផលក្លែងក្លាយ ដូចជា អាល់កុល និងជេលក្លែងក្លាយនេះ ពិសេសក្នុងពេលដែលប្រជាពលរដ្ឋកំពុងមានតម្រូវការប្រើប្រាស់នៅសម្ភារសម្រាប់ការពារមេរោគកូវីដ ១៩ នេះ។
លោកថ្លែងថា៖ «កន្លងមក គ.ប.ផ.ក. បានធ្វើការសម្របសម្រួលជាមួយគ្រប់ក្រសួង ស្ថាប័នទាំងអស់ដើម្បីធ្វើការបង្ក្រាបការចរាចរលក់ដូរ ផលិតផលអាល់កុល និងជេលក្លែងក្លាយខុសស្ដង់ដានេះ។ យើងដឹងហើយថា ផលិតផលក្រោមស្ដង់ដា គឺជាផលិតផលគ្មានប្រសិទ្ធភាពនាំឱ្យប៉ះពាល់ដល់ការប្រើប្រាស់របស់ប្រជាពលរដ្ឋ»។
លោកបានឱ្យដឹងថា ក្នុងត្រីមាសទី១ ឆ្នាំនេះកងកម្លាំងនៃ គ.ប.ផ.ក. បានបង្ក្រាបបទល្មើសចរាចរណ៍ លក់ដូរ អាល់កុល និងជេលក្លែងក្លាយនេះប្រមាណ ២០ ករណី៕