ភ្នំពេញៈ ត្រឹមត្រីមាសទី ១ ឆ្នាំ ២០២០ ក្រសួងព័ត៌មានបានផ្ដល់អាជ្ញាប័ណ្ណលើការប្រកបអាជីវកម្មខាងវិស័យព័ត៌មាន និងសោតទស្សន៍រួមមានសារព័ត៌មានផ្សាយតាមប្រព័ន្ធអេឡិចត្រូនិក (គេហទំព័រ) ចំនួន ៥៣៦ អង្គភាព និងសារព័ត៌មានបោះពុម្ពផ្សាយកាសែតចំនួន ៤៥១ អង្គភាព និងទស្សនាវដ្ដីចំនួន ១៩៦ អង្គភាពខណៈក្រសួងនឹងរៀបចំវគ្គបណ្តុះបណ្តាលអ្នកសារព័ត៌មានដើម្បីលើកកម្ពស់សមត្ថភាពរបស់ពួកគេ។ នេះបើតាមមន្ត្រីក្រសួងព័ត៌មាន។
លោក មាស សុភ័ណ្ឌ អនុរដ្ឋលេខាធិការក្រសួងព័ត៌មានថ្លែងនៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងព័ត៌មាន» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកាលពីថ្ងៃទី ៩ ខែមេសាថា ត្រឹមត្រីមាសទី ១ ឆ្នាំ ២០២០ នេះក្រសួងព័ត៌មានបានផ្ដល់អាជ្ញាប័ណ្ណលើការប្រកបអាជីវកម្មខាងវិស័យព័ត៌មាន និងសោតទស្សន៍រួមមានស្ថានីយទូរទស្សន៍អាណាឡូក ១៩ ស្ថានីយ ទូរទស្សន៍ឌីជីថល ៨ ស្ថានីយទូរទស្សន៍ខ្សែកាប ២១២ (២ នៅភ្នំពេញ ២១០ នៅតាមបណ្ដាខេត្ដ) ទូរទស្សន៍តាមប្រព័ន្ធ (Over the Top) OTT ៧ និងទូរទស្សន៍ផ្កាយរណប ២ (DTV, Sky One TV)។ ដោយឡែកស្ថានីយវិទ្យុ FM ២២០ ស្ថានីយ (៨៣ នៅភ្នំពេញ ១៣៧ នៅតាមបណ្ដាខេត្ដ) ស្ថានីយវិទ្យុ AM ១ ស្ថានីយ។ ចំណែកសារព័ត៌មានផ្សាយតាមប្រព័ន្ធអេឡិចត្រូនិក (គេហទំព័រ) ៥៣៦ អង្គភាព (ចាងហ្វាងខ្មែរ ៥១៨ និងចាងហ្វាងបរទេស ១៨ អង្គភាព)។ រីឯសារព័ត៌មានបោះពុម្ពផ្សាយកាសែត ៤៥១ អង្គភាព (ចាងហ្វាងខ្មែរ ៤២៤ និងចាងហ្វាងបរទេស ២៧)។ ទស្សនាវដ្ដី ១៩៦ អង្គភាព (ចាងហ្វាងខ្មែរ ១៦៤ និងចាងហ្វាងបរទេស ៦)។
លោកថា៖ «តាមរយៈនៃការពង្រីក និងការរីកចម្រើននៃវិស័យព័ត៌មានទាំងវិសាលភាព និងមធ្យោបាយនៃការផ្សព្វផ្សាយនេះយើងឃើញថា វិស័យព័ត៌មានកម្ពុជាកំពុងតែដើរតួយ៉ាងសំខាន់នៅក្នុងការពាំនាំព័ត៌មានពិតពីរាជរដ្ឋាភិបាលកម្ពុជាទៅកាន់ប្រជាជន។ សម្ដេចតេជោនាយករដ្ឋមន្ត្រីលោកតែងតែចាត់ទុកអ្នកសារព័ត៌មានគឺជាដៃគូមិនអាចខ្វះបានក្នុងការផ្ដល់ព័ត៌មានពីរដ្ឋទៅប្រជាជនក៏ដូចជាពីប្រជាជនមករដ្ឋវិញផងដែរ»។
លោកថា ទន្ទឹមនឹងនោះបច្ចុប្បន្នក្រសួងបានផ្ដល់អាជ្ញាប័ណ្ណដល់សមាគមអ្នកសារព័ត៌មានចំនួន ៤៥ គឺកើនឡើង បើធៀបទៅនឹងឆ្នាំ ២០១៨ ដែលកាលនោះមានសមាគមអ្នកសារព័ត៌មានតែចំនួន ៣៨ អង្គភាពប៉ុណ្ណោះ។
បើតាមលោក សុភ័ណ្ឌ កម្ពុជាក៏មានទីភ្នាក់ងារសារព័ត៌មានជាតិ និងបរទេសចំនួន ២២ អង្គភាព ដែលកំពុងតែមានការិយាល័យអចិន្រៃ្តយ៍នៅកម្ពុជាផងដែរ។ ក្នុងចំណោមទីភ្នាក់ងារព័ត៌មានទាំង ២២ នេះមានការិយាល័យតំណាងទីភ្នាក់ងាររបស់កាសែតបរទេស ១៤ ដែលកំពុងតែប្រតិបត្ដិការវិជ្ជាជីវៈ។
ក្រសួងព័ត៌មានក៏បានចេញបណ្ណព័ត៌មានជូនអ្នកសារព័ត៌មានជាតិចំនួន ៣ ៥៤៩ បណ្ណ រហូតដល់ពេលបច្ចុប្បន្ន និងចេញបណ្ណជូនដល់អ្នកសារព័ត៌មានអន្តរជាតិចំនួន ៦២ បណ្ណ។ «ទាំងអស់នេះគឺជាវឌ្ឍនភាពការងារទៅលើការផ្សព្វផ្សាយនៃប្រព័ន្ធផ្សព្វផ្សាយក្នុងប្រទេស កម្ពុជា យើងដែលមានទាំងស្ថាប័នរដ្ឋ និងឯកជនកំពុងតែដើរតួនាទីសំខាន់នៅក្នុងការផ្ដល់ព័ត៌មាននៅក្នុងព្រះរាជាណាចក្រកម្ពុជារបស់យើងក៏ដូចជាទៅកាន់តំបន់ និងពិភពលោកផងដែរ»។
លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកព័ត៌មាន និងសោតទស្សន៍នៃក្រសួងព័ត៌មានបញ្ជាក់ថា ក្រសួងក៏នឹងរៀបចំវគ្គបណ្ដុះបណ្ដាលអ្នកសារព័ត៌មានលើជំនាញផ្លូវច្បាប់រដ្ឋបាល និងជំនាញគ្រប់គ្រងជាដើមដើម្បីលើកកម្ពស់សមត្ថភាពរបស់ពួកគេឱ្យកាន់តែមានជំនាញវិជ្ជាជីវៈពិតប្រាកដបន្ថែមទៀតនាពេលខាងមុខ។
លោកថា៖ «ការបង្កើនការពង្រឹងក្រមសីលធម៌វិជ្ជាជីវៈរបស់អ្នកសារព័ត៌មាននេះដើម្បីឱ្យអ្នកសារព័ត៌មានចៀសវាងបាននូវការបំពានសិទ្ធិអ្នកដទៃ និងបំភ្លៃការពិត។ ជាពិសេសចូលរួមលុបបំបាត់ព័ត៌មានក្លែងក្លាយដែលបង្កឱ្យមានការបំពុលសង្គម»៕