ភ្នំពេញៈ ប្រមុខការពារជាតិលោក ទៀ បាញ់ អះអាងថាក្រសួងការពារជាតិកំពុងត្រៀមរៀបចំតំបន់យោធានៅទីតាំងមួយចំនួនដែលធ្លាប់ជាកន្លែងប្រយុទ្ធគ្នា ដើម្បីការពារ និងរក្សាឲ្យបាននូវតឹកតាងប្រវត្តិសាស្ត្រទាំងឡាយឲ្យបានស្ថិតស្ថេរសម្រាប់ទុកជាភ័ស្តុតាងឲ្យមនុស្សជំនាន់ក្រោយបានយល់ដឹងពីប្រវត្តិសាស្ត្រ។
ក្នុងពិធីបើកកិច្ចប្រជុំស្តីពី «ការរៀបចំតំបន់ប្រវត្តិសាស្ត្រយោធា» នាថ្ងៃទី ២២ កក្កដា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិលោក ទៀ បាញ់ ថ្លែងថា ការរៀបចំឲ្យមានតំបន់ប្រវត្តិសាស្ត្រយោធានេះដើម្បីធ្វើជាខ្សែចង្វាក់រៀបចំឲ្យទៅជារឿងមួយដែលពាក់ព័ន្ធសំខាន់ក្នុងវិស័យ ការពារជាតិផង ការពារបូរណភាពដែនដីផង។ លើសពីនេះការពារតឹកតាងទាំងឡាយដែលប្រវត្តិសាស្ត្របានបន្សល់ទុកឲ្យស្ថិតស្ថេរសម្រាប់មនុស្សជំនាន់ក្រោយបានយល់ដឹងពីប្រវត្តិសាស្ត្រ។
លោកថ្លែងថា៖ «ដូច្នេះយើងកំពុងជជែកពិភាក្សាគ្នាជាមួយមន្ត្រីជំនាញពាក់ព័ន្ធ ដើម្បីស្វែងរកភាពពិតប្រាកដជាចំណុចស្នូលដែលយើងហៅថា ទីតាំងប្រវត្តិសាស្ត្រពិត គឺមានន័យថាទីតាំងដែលអាចបញ្ជាក់ពីតឹកតាងប្រវត្តិសាស្ត្រពិត។ ឥឡូវនេះយើងទើបតែរកឃើញ និងកំណត់បានទីតាំងមួយចំនួនទេ។ ប៉ុន្ដែវាមិនទាន់អាចរកឃើញដូចអ្វីដែលយើងចង់បាននៅឡើយ ពោលគឺយើងនៅបន្តស្វែងរកបន្ថែមទៀត»។
លោកថាក្រោយពីរកឃើញទីតាំងសមរម្យហើយ ក្រុមការងារជំនាញក្រសួងការពារជាតិនឹងរៀបចំចាត់ចែងទៅតាមផ្លូវច្បាប់ ឬនីតិវិធីក្នុងការកាន់កាប់ ត្រួតត្រា គ្រប់គ្រង ប្រើប្រាស់តំបន់នោះនាពេលអនាគត។ ទីតាំងភូមិសាស្ត្រដែលមានប្រតិបត្តិការទាក់ទងនឹងសមរភូមិនៅគ្រប់ដំណាក់កាលដែលអាចកំណត់បានថាជាទីតាំងប្រវត្តិសាស្ត្រយោធា។ ជាពិសេសឯកសារ រូបថត និងសម្ភារនានា ដើម្បីចងក្រងរក្សាទុកជាតឹកតាងប្រវត្តិសាស្ត្រ សម្រាប់យោធិនជំនាន់ក្រោយសិក្សា។
ប្រមុខការពារជាតិថ្លែងថា ជុំវិញការងាររៀបចំតំបន់ប្រវត្តិសាស្ត្រយោធានេះគឺក្រុមការងារត្រូវស្រាវជ្រាវពីព្រឹត្តិការណ៍ជាប្រវត្តិសាស្ត្រធំៗជាច្រើនដែលបានកើតឡើងដោយកំណត់ទីតាំង ដែលបានបន្សល់ទុកស្វែងរកសាក្សីមកបញ្ជាក់ប្រវត្តិ និងព័ត៌មានទាក់ទងទៅនឹងទីតាំងនីមួយៗឲ្យបានច្បាស់លាស់ផងដែរ។
លោក ឡៅ ម៉ុងហៃ អ្នកវិភាគបញ្ហាសង្គម និងនយោបាយថ្លែងពីម្សិលមិញថា នេះជាគម្រោងមួយសម្រាប់លើកតម្កើងតម្លៃ និងកេរ្តិ៍ឈ្មោះរបស់កងទ័ពដែលមានលោកនាយករដ្ឋមន្ត្រី ហ៊ុន សែន ជានាយឧត្តមសេនីយ៍ផ្កាយមាស ៥ និងជាមេបញ្ជាការផុតលេខក្នុងជួរកងទ័ព។ លោកថ្លែងថា៖ «ជាពិសេស ត្រូវចារផែនទីកម្ពុជាដែលកងទ័ពបានប្រើប្រាស់សម្រាប់ការពារព្រំដែនពីជំនាន់មួយទៅជំនាន់មួយទៀត និងទំហំនៃថវិកាជាតិសម្រាប់កងទ័ពក្នុងប្រវត្តិសាស្ត្រនៃកងទ័ពផងដែរ»៕