The Phnom Penh Post Search

Search form




Logo of Phnom Penh Post newspaper Phnom Penh Post - ថៃ​ដោះលែង​អ្នក​កាប់​ឈើ​ខ្មែរ​ចំនួន​ ៥៨ ​នាក់​ពី​ពន្ធនាគារ

ថៃ​ដោះលែង​អ្នក​កាប់​ឈើ​ខ្មែរ​ចំនួន​ ៥៨ ​នាក់​ពី​ពន្ធនាគារ

ថៃ​ដោះលែង​អ្នក​កាប់​ឈើ​ខ្មែរ​ចំនួន​ ៥៨ ​នាក់​ពី​ពន្ធនាគារ

ភ្នំពេញៈ អាជ្ញាធរ​ថៃ​បាន​ដោះលែង​អ្នក​កាប់​ឈើ​កម្ពុជា ៥៨ នាក់​បន្ទាប់ពី​ពួកគេ​បាន​ជាប់​ពន្ធនាគារ​ពី​បទ​ឆ្លង​ដែន​ខុស​ច្បាប់​ចូល​ក្នុង​ទឹកដី​ថៃ​ដើម្បី​​កាប់​ឈើ។ នេះ​បើ​យោង​តាម​លោក ជុំ សុន្ទរី អ្នក​នាំពាក្យ​ក្រសួង​ការបរទេស​បាន​ឲ្យ​ដឹង​កាលពី​ម្សិលមិញ។

យោង​តាម​លោក សុន្ទរី បាន​ឲ្យ​ដឹង​ថា​អ្នក​កាប់​​ឈើ ៥៨ នាក់ ក្នុង​ចំណោម ៩២ នាក់ ដែល​បច្ចុប្បន្ន​ជាប់​ពន្ធនាគារ​នៅក្នុង​ខេត្ត Nokor Rajaseima ប្រទេស​ថៃ​ត្រូវ​បាន​ដោះលែង និង​​បញ្ជូន​មក​​កម្ពុជា​វិញ​តាម​ច្រក​អូរស្មាច់​ក្នុង​​ខេត្ត​ឧត្តរមានជ័យ​កាលពី​ថ្ងៃ​ទី ១១ ខែ​កញ្ញា។

លោក​បន្ថែម​ថា​អ្នក​កាប់​ឈើ​ទាំង ៥៨ នាក់​ត្រូវ​បាន​នាំ​ខ្លួន​ទៅ​តុលាការ​ហើយ​បន្ទាប់ពី​អន្តរាគមន៍​ពី​មន្រ្តី​កម្ពុជា​ពួកគេ​ត្រូវ​បាន​ពិន័យ​ជា​ប្រាក់ ៤២៥០ បាត​ក្នុង​មួយ​នាក់​ទើប​ត្រូវ​បាន​ដោះលែង​។ លោក​​ថ្លែង​ថា៖ «​យើង​មិន​មាន​ព័ត៌មាន​លម្អិត​អំពី​រយៈពេល​ជាប់​ពន្ធនាគារ​របស់​ពួកគេ​ទេ​ប៉ុន្តែ​ពួកគេ​ភាគច្រើន​មកពី​ខេត្ត​បាត់ដំបង​»។

អ្នក​កាប់​ឈើ ៣៤ នាក់​នៅ​សល់​កំពុង​ជាប់​ពន្ធនាគារ និង​រង់ចាំ​ការ​ជំនុំជម្រះ។

បន្ទាប់ពី​បាន​វិល​មក​វិញ​អ្នក​កាប់​ឈើ​អះអាង​ថា​ពួកគេ​ត្រូវ​មេខ្យល់​បោក​ប្រាស់​ឲ្យ​ទៅ​ធ្វើការ​ត្រឹមត្រូវ​នៅ​ថៃ​ដោយ​គេ​សន្យា​ផ្តល់​ប្រាក់ ១០០០ បាត​ក្នុង​មួយ​​ថ្ងៃ​។

លោក អ៊ុក គឹមលី ប្រធាន​ការិយាល័យ​ទំនាក់ទំនង​ព្រំដែន​កម្ពុជា​ថៃ​នៅ​ច្រក​អូរស្មាច់​មិន​អាច​​​​ទាក់ទង​សុំ​ការ​អត្ថាធិប្បាយ​បាន​ទេ​ប៉ុន្តែ​លោក ងូវ ជាង នាយរង​នគរបាល​អន្តោប្រវេសន៍​នៅ​ច្រក​អូរស្មាច់​បាន​ថ្លែង​ថា​មាន​អ្នក​កាប់​ឈើ​មួយ​ចំនួន​បាន​បញ្ជូន​តាម​ច្រក​អូរស្មាច់​ប៉ុន្មាន​ថ្ងៃ​នេះ។

លោក​បន្ត​​ថា៖ «​ប្រហែល​អ្នក​ខ្លះ​មក​តាម​ច្រក​នេះ​អ្នក​ខ្លះ​មក​តាម​ច្រក​ផ្សេង​ទៀត។ ​យើង​មិន​ស្គាល់​ពួកគេ​អស់​ទេ»។

យោង​តាម​របាយការណ៍​រយៈពេល ៦ ខែ​​របស់​ការិយាល័យ​ទំនាក់ទំនង​ព្រំដែន​កម្ពុជា ថៃ បាន​បង្ហាញ​ថា​អ្នក​កាប់ឈើ ៥ នាក់​ត្រូវ​បាន​គេ​បាញ់​សម្លាប់​ដោយ​ម្នាក់​រងរបួស ១៥ ​នាក់​បាត់​ខ្លួន និង​ ២៩ នាក់​ជាប់​ពន្ធនាគារ​ដោយសារ​តែ​ឆ្លងដែន​ខុស​​ច្បាប់​ចូល​ទឹកដី​ថៃ​ដើម្បី​កាប់ឈើ។

ប្រជាពលរដ្ឋ​ខ្មែរ​ជាច្រើន​នៅ​តែ​បន្ត​លួច​​ឆ្លងដែន​ទៅ​ស្វែងរក​ការងារ​ធ្វើ​នៅ​ប្រទេស​ថៃ​ដោយ​ខុស​ច្បាប់​តាមរយៈ​មេ​ខ្យល់​ហើយ​ជា​ញឹកញាប់​តែងតែ​ត្រូវ​បាន​សមត្ថកិច្ច​ថៃ​ចាប់​ខ្លួន​៕ TK

អត្ថបទគួរចាប់អារម្មណ៍