The Phnom Penh Post Search

Search form




Logo of Phnom Penh Post newspaper Phnom Penh Post - ថៃ​បាញ់​ពលរដ្ឋ​ខ្មែរ​របួស​ម្នាក់ ចាប់​ខ្លួន ២ នាក់​ទាក់​ទង​គ្រឿង​ញៀន

ថៃ​បាញ់​ពលរដ្ឋ​ខ្មែរ​របួស​ម្នាក់ ចាប់​ខ្លួន ២ នាក់​ទាក់​ទង​គ្រឿង​ញៀន

ពលរដ្ឋ​ខ្មែរ​ដែល​ឆ្លង​ដែន​ទៅ​ថៃ​ត្រូវ​បាន​គេ​បាញ់​ឲ្យ​របួស​កន្លង​មក។
ពលរដ្ឋ​ខ្មែរ​ដែល​ឆ្លង​ដែន​ទៅ​ថៃ​ត្រូវ​បាន​គេ​បាញ់​ឲ្យ​របួស​កន្លង​មក។ ហេង ជីវ័ន

ថៃ​បាញ់​ពលរដ្ឋ​ខ្មែរ​របួស​ម្នាក់ ចាប់​ខ្លួន ២ នាក់​ទាក់​ទង​គ្រឿង​ញៀន

បន្ទាយ​មាន​ជ័យៈ ពលរដ្ឋ​ខ្មែរ​ម្នាក់ ត្រូវ​បាន​ទាហាន​ថៃ​បាញ់​របួស​ជើង ចំណែក​ពីរ​នាក់​ទៀត ត្រូវ​បាន​ចាប់​ឃុំ​ខ្លួន ពាក់​ព័ន្ធ​នឹង​ករណី​ជួញ​ដូរ​គ្រឿង​ញៀន​ប្រមាណ ២០០ គ្រាប់​នៅ​ក្នុង​ប្រតិបត្តិ​ការ​បង្រ្កាប​របស់​ទាហាន​ថៃ ក្នុង ស្រុក​គោកស៊្យូង ខេត្ត​ស្រះ​កែវ ប្រទេស​ថៃ ឈម​នឹង ស្រុក​អូរ​ជ្រៅ ខេត្ត​បន្ទាយ​មាន​ជ័យ។

ប្រធាន​នាយកដ្ឋាន​កណ្តាល​នគរបាល​ព្រំដែន​នៃ​អគ្គ​ស្នងការ​ដ្ឋាន​នគរបាល​ជាតិ លោក ហ៊ូ សាគុណ បាន​ឲ្យ​ដឹង​ថា ហេតុ​ការណ៍​នោះ បាន​កើត​ឡើង​នៅ​ម៉ោង ៥ ល្ងាច ថ្ងៃ ទី២៥ ខែ​កុម្ភៈ ត្រង់​ចំណុច ភូមិ​គោកស៊្យូង ឃុំ​គោកស៊្យូង ស្រុក​គោកស៊្យូង ខេត្ត​ស្រះ​កែវ ប្រទេស​ថៃ ឈម​នឹង ភូមិ​ព្រែក​ចន្ទន៍ ឃុំ​អូរ​បី​ជាន់ ស្រុក​អូរជ្រៅ ខេត្ត​បន្ទាយ​មាន​ជ័យ ខណៈ​ដែល​ពលរដ្ឋ​ខ្មែរ​ទាំង​បី​នាក់​នោះ បាន​ឆ្លង​ដែន​ទៅ​ជួញ​ដូរ​គ្រឿង​ញៀន​នៅ​ប្រទេស​ថៃ។

លោក​ថា៖ «ក្រោយ​ទាហាន​ថៃ​ប្រទះ​ឃើញ ក៏​បាន​ដេញ​ចាប់ និង​បាន​បាញ់​ត្រូវ​ពលរដ្ឋ​ម្នាក់​បណ្តាល​ឲ្យ​របួស​ជើង និង​ចាប់​ខ្លួន​បាន​ពីរ​នាក់ ហើយ​បច្ចុប្បន្ន​នេះ ពលរដ្ឋ​រង​របួស​ត្រូវ​បាន​បញ្ជូន​ទៅ​ព្យាបាល​នៅ​មន្ទីរពេទ្យ ខេត្ត​ស្រះ​កែវ ចំណែក​ពលរដ្ឋ​ខ្មែរ​ពីរ​នាក់​ទៀត​នោះ ត្រូវ​បាន​បញ្ជូន​ទៅ​ឃុំ​ខ្លួន​នៅ ខេត្ត​ស្រះ​កែវ ប្រទេស​ថៃ»។

បើ​តាម​របាយ​ការណ៍​របស់​សមត្ថកិច្ច បាន​ឲ្យ​ដឹង​ថា បុរស​ដែល​ត្រូវ​បាន​ទាហាន​ថៃ បាញ់​ឲ្យ​រង​របួស​នោះ មាន​ឈ្មោះ រ៉េត រិទ្ធិ អាយុ ៣៧​ឆ្នាំ ជា​ម្ចាស់​គ្រឿង​ញៀន ចំណែក​ពីរ​នាក់​ទៀត ដែល​ថៃ​ចាប់​បាន​នោះ មាន​ឈ្មោះ ប៊ុន យ៉ុង អាយុ ៥៤​ឆ្នាំ និង​ឈ្មោះ ប៊ុន សុវាត អាយុ ២៦​ឆ្នាំ ជា​អ្នក​ស៊ី​ឈ្នួល​កាន់​ថ្នាំ​ញៀន ហើយ​អ្នក​ទាំង​បី មិន​មាន​លំនៅ​ច្បាស់​លាស់​ទេ។ ក្នុង​ប្រតិបត្តិការ​នោះ ទាហាន​ថៃ រឹប​អូស​បាន​ថ្នាំ​ញៀន ចំនួន ២០០ គ្រាប់​និង​ម៉ូតូ ២ គ្រឿង​ជា​វត្ថុតាង។

លោក​បញ្ជាក់​ថា៖ «ការងារ​នេះ ជា​ធម្មតា​ទាក់​ទិន​នឹង​រឿង​បាញ់​នេះ បន្ទាប់​ពី​ទទួល​បាន​ព័ត៌មាន គឺ​យើង​រាយ​ការណ៍​ទៅ​ក្រសួង​ការ​បរទេស ហើយ​ទាល់​តែ​ក្រសួង​ការ​បរទេស​ទើប​បាន​ដឹង​ថា​យ៉ាង​ម៉េច ព្រោះ​គាត់​ជា​អ្នក​ទាក់ទង​ផ្នែក​ការ​ទូត សម្រប​សម្រួល និង​ដោះ​ស្រាយ​រឿង​នេះ»។

ភ្នំពេញ ប៉ុស្តិ៍ មិន​អាច​សុំ​ការ​ឆ្លើយ​តប​ពី​អ្នក​នាំ​ពាក្យ​ក្រសួង​ការ​បរទេស​កម្ពុជា លោក កុយ គួង បាន​ទេ កាល​ពី​ម្សិល​មិញ។ បើ​តាម​ប្រធាន​ការិយាល័យ​ទំនាក់​ទំនង​ការងារ​ព្រំដែន​កម្ពុជា ថៃ លោក ពេជ្រ វណ្ណា ករណី​នេះ ភាគី​ថៃ​នឹង​ចាត់​វិធាន​ការ​ផ្លូវ​ច្បាប់​របស់​ខ្លួន​លើ​អ្នក​ទាំង​នោះ។ លោក​ថា៖ «យើង​សុំ​យក​មក​ដាក់​នៅ​ស្រុក​យើង គឺ​អត់​បាន​ទេ លុះ​ណា​តែ​គេ (ថៃ) មាន​គម្រោង​បញ្ជូន​មក»។

ដោយ​ឡែក ករណី​បុរស​ពីរ​នាក់ ដែល​ត្រូវ​បាន​ទាហាន​ថៃ​ចាប់​ដុត​ទាំង​រស់ កាល​ពី​ថ្ងៃ ទី៧ ខែ​មករា នៅ​ក្នុង ស្រុក​ខ្លងហាត ខេត្ត​ស្រះ​កែវ ជាប់​នឹង ស្រុក​សំពៅ​លូន ខេត្ត​បាត់​ដំបង ដែល​ទាំង​ភាគី​ខ្មែរ និង​ថៃ អះអាង​ថា ជា​ពលរដ្ឋ​របស់​ខ្លួន​នោះ នៅ​មិន​ទាន់​មាន​សញ្ញាណ​ណា​មួយ​នៃ​វិធាន​ការ​ដោះ​ស្រាយ​នោះ​ទេ ខណៈ​ដែល​កម្ពុជា នៅ​បន្ត​រង់​ចាំ​លទ្ធផល​នៃ​កោសល្យ​វិច័យ​លើ​សាក​សព​ដើម្បី​កំណត់​អត្ត​សញ្ញាណ។

លោក ពេជ្រ វណ្ណា បាន​ឲ្យ​ដឹង​ថា៖ «យើង​បាន​បន្ទាន់​ដែរ តែ​គេ​ថា ថ្នាក់​លើ​គេ​អត់​ទាន់​ប្រាប់​មក​ដែរ ចំណែក​ខាង​កម្ពុជា​យើង ក៏​អត់​មាន​បណ្តឹង​ថា គ្រួសារ​រង​គ្រោះ​ណា ដល់​អ៊ីចឹង​យើង​អត់​អាច​មាន​វិធាន​ការ​អី​ទេ ព្រោះ​មិន​ច្បាស់​ថា ជា​ខ្មែរ ឬ​ថៃ បើ​មាន​បណ្តឹង យើង​នឹង​ស្រាវជ្រាវ»។

កាល​ពី​ថ្ងៃ ទី៥ ខែ​កុម្ភៈ ពលរដ្ឋ​ខ្មែរ ៣​នាក់ ត្រូវ​បាន​ទាហាន​ថៃ​បាញ់​ស្លាប់ និង​ម្នាក់​របួស​ធ្ងន់ ខណៈ​លួច​ឆ្លង​ដែន​ខុស​ច្បាប់​ចូល​ទៅ​ក្នុង​ទឹក​ដី​ថៃ​ដើម្បី​កាប់​ឈើ​គ្រញូង​លក់ ហើយ​ករណី​នេះ ក្រសួង​ការ​បរទេស​កម្ពុជា ក៏​បាន​ធ្វើ​កំណត់​ការ​ទូត​ស្នើ​ទៅ​ភាគី​ថៃ ផ្តន្ទាទោស​ទាហាន​ថៃ​ផង​ដែរ។

តាម​របាយ​ការណ៍​ស្តី​ពី​លទ្ធផល​ការងារ ឆ្នាំ​២០១៤ និង​ទិស​ដៅ​ការងារ​សម្រាប់ ឆ្នាំ​២០១៥ របស់​ក្រសួង​មហា​ផ្ទៃ ចេញ​ផ្សាយ​កាល​ពី​ថ្ងៃ ទី២៣ ខែ​កុម្ភៈ បាន​ឲ្យ​ដឹង​ថា ប្រជា​ពលរដ្ឋ​ខ្មែរ​នៅ​តែ​បន្ត​លួច​ឆ្លង​ដែន​ចូល​ក្នុង​ទឹក​ដី​ថៃ ដោយ​ខុស​ច្បាប់ និង​ត្រូវ​បាន​ទាហាន​ថៃ​បាញ់​សម្លាប់​សរុប ៩​នាក់ រង​របួស ១៦​នាក់ រត់​រួច​មក​វិញ ២៨​នាក់ ថៃ​ចាប់​បាន ១៩​នាក់ និង​បញ្ជូន​ឲ្យ​មក​កម្ពុជា​វិញ​ចំនួន ៣២៨៣ នាក់។ ចំនួន​នេះ មាន​ការ​ធ្លាក់​ចុះ បើ​ធៀប​ទៅ​នឹង ឆ្នាំ​២០១៣ ដែល​ថៃ បាន​បាញ់​សម្លាប់​ពលរដ្ឋ​ខ្មែរ​រហូត​ដល់​ទៅ ៤៧​នាក់៕

អត្ថបទគួរចាប់អារម្មណ៍