ភ្នំពេញៈ ថៃបិទការធ្វើដំណើរចេញចូលតាមច្រកផ្លូវគោកគ្រប់កន្លែង និងរឹតបន្តឹងលក្ខខណ្ឌសម្រាប់ការធ្វើដំណើរតាមផ្លូវអាកាសជាវិធានការដើម្បីទប់ស្កាត់ការបន្តរីករាលដាលនៃជំងឺកូវីដ ១៩។
សមត្ថកិច្ចថៃចាប់ផ្ដើមអនុវត្តការជូនដំណឹងអំពីការផ្អាកការធ្វើដំណើរចេញចូលប្រទេស ថៃ ដោយច្រកខ្លះត្រូវបានបិទចាប់ពីថ្ងៃទី ១៨ មីនា ខណៈច្រកនៅសេសសល់នឹងត្រូវបិទចាប់ពីថ្ងៃទី ២៣ មីនានេះតទៅ លើកលែងតែការដឹកជញ្ជូនទំនិញប៉ុណ្ណោះដែលត្រូវបានអនុញ្ញាតក្រោមលក្ខខណ្ឌតឹងរ៉ឹង។
យោងតាមសេចក្ដីជូនដំណឹងរបស់ស្ថានអគ្គកុងស៊ុលកម្ពុជាប្រចាំខេត្តស្រះកែវ បានឲ្យដឹងថា អាជ្ញាធរថៃបានប្រកាសបិទច្រកឆ្លងកាត់ព្រំដែនទាំងអស់ដែលជាប់ជាមួយកម្ពុជានៅក្នុងខេត្តទាំង ៥ របស់ថៃរួមមាន ខេត្ត ឧប៊ុនរាជធានី ខេត្តស៊ីសាកេត ខេត្តបុរីរ៉ាំ ខេត្តច័ន្ទបុរី និងខេត្តត្រាត។ ច្រកខ្លះបានចាប់ផ្ដើមបិទចាប់ពីថ្ងៃទី ១៨ មីនា ដូចជាច្រកអានសេះ ខេត្តព្រះវិហារ ហើយច្រកខ្លះទៀតត្រូវបានបិទនៅថ្ងៃទី ១៩ ដូចជាច្រកជប់គគីនៅខេត្តឧត្តរមានជ័យ។
ច្រកដែលត្រូវបានបិទនៅថ្ងៃទី ២១ រួមមានច្រកអូរស្មាច់ ខេត្តឧត្តរមានជ័យ ច្រកអន្តរជាតិព្រំ (ប៉ៃលិន) ច្រកតំបន់ស្វាយវែង ច្រកអូររំដួល និងច្រកអូរអន្លក់ (បាត់ដំបង)។ ដោយឡែកច្រកដែលត្រូវបានបិទនៅថ្ងៃអាទិត្យម្សិលមិញគឺច្រកអន្តរជាតិចាំយាម (ខេត្តកោះកុង) ដែលជាប់ខេត្តត្រាតរបស់ថៃរួមទាំងច្រកតំបន់ និងច្រកទ្វេភាគីទាំងអស់ដែលស្ថិតក្នុងភូមិសាស្ត្រខេត្តត្រាត។
ច្រកខ្លះនឹងត្រូវបិទចាប់ពីថ្ងៃទី ២៣ មីនានេះតទៅរួមមានច្រកអន្តរជាតិភ្នំដី និងច្រកទ្វារតំបន់គឺច្រកបឹងត្រកួន និងច្រកម៉ាឡៃ។ ច្រកទ្វារទ្វេភាគីចំនួន ១៥ ទីតាំងផ្សេងទៀតដែលមានទីតាំងតាមព្រំដែនរវាងខេត្តស្រះកែវរបស់ថៃ និងខេត្តបន្ទាយមានជ័យក៏ត្រូវបានបិទទាំងស្រុងផងដែរ។
ចំពោះច្រកព្រំដែនអន្តរជាតិប៉ោយប៉ែតភាគីថៃបានស្នើសុំបិទរយៈពេល ១៤ ថ្ងៃដូចគ្នា ប៉ុន្តែអនុញ្ញាតឲ្យរថយន្តធុនធំដឹកទំនិញចេញ-ចូលធម្មតាដោយតម្រូវឲ្យមានអ្នកបើកបរតែម្នាក់គត់។ ក្រៅពីនេះក៏អនុញ្ញាតឲ្យអ្នកជំងឺដែលត្រូវការសង្គ្រោះបន្ទាន់ចូលធម្មតា តែត្រូវអនុវត្តតាមអនុស្សរណៈនៃការយោគយល់គ្នា។ ចំពោះមធ្យោបាយផ្សេងៗដូចជារថយន្តលក្ខណៈគ្រួសារ ម៉ូតូ រទេះរុញ កម្មករ អាជីវករលក់ដូរក្នុងផ្សារ រ៉ុងក្លឿ មិនអនុញ្ញាតឲ្យចេញ-ចូលឡើយ។
យោងតាមឯកសារស្ថានទូតដែលភ្នំពេញប៉ុស្តិ៍ទទួលបាន បានបញ្ជាក់ថា ច្រកព្រំដែនផ្សេងទៀតដែលត្រូវបានបិទរួមមានច្រកថ្មដា ខេត្តពោធិ៍សាត់ និងច្រកឆករកា (បាត់ដំបង) ដែលត្រូវបានបិទកាលពីថ្ងៃទី ២០ មីនា។ បន្ថែមលើការបិទការធ្វើដំណើរថៃក៏បានចេញវិធានការតឹងរ៉ឹងលើការធ្វើដំណើរតាមផ្លូវអាកាសចូលប្រទេសថៃ។
យោងតាមសេចក្ដីជូនដំណឹងរបស់ស្ថានទូតកម្ពុជាប្រចាំប្រទេសថៃចុះថ្ងៃទី ២០ មីនា បានឲ្យដឹងថា៖ «អាជ្ញាធរអាកាសចរណ៍ស៊ីវិលថៃបានចេញវិធានការរឹតបន្តឹងចំពោះអ្នកដំណើរទាំងជនជាតិថៃ និងជនបរទេសរួមទាំងកម្ពុជាដែលធ្វើដំណើរតាមយន្តហោះចូលប្រទេសថៃចាប់ពីម៉ោង ០០ ថ្ងៃទី ២០ មីនាតទៅដែលតម្រូវឲ្យអ្នកដំណើរត្រូវត្រៀមឯកសារទុកបង្ហាញប្រតិបត្តិករអាកាសចរណ៍ ដើម្បីចេញបណ្ណធ្វើដំណើរ»។
ស្ថានទូតកម្ពុជាបានរំឭកពលរដ្ឋដែលមានបំណងធ្វើដំណើរទៅប្រទេសថៃ ត្រូវមានសំបុត្រពេទ្យដែលបញ្ជាក់ថា អ្នកដំណើរ «មិនមានហានិភ័យនាំឲ្យឆ្លងកូវីដ ១៩» និងមានសុពលភាពមិនលើសពី ៧២ ម៉ោងមុនកាលបរិច្ឆេទនៃការធ្វើដំណើរ។ លើសពីនេះអ្នកដែលចូលប្រទេសថៃត្រូវមានឯកសារធានារ៉ាប់រងសុខភាពដែលបញ្ជាក់ពីទឹកប្រាក់ធានារ៉ាប់រងគ្របដណ្ដប់ប្រទេសថៃផង ដែលមានចំនួនទឹកប្រាក់ទាបបំផុត ១០ ម៉ឺនដុល្លារ និងទទួលរ៉ាប់រងលើជំងឺកូវីដ១៩។
ស្ថានទូតបញ្ជាក់ថា៖ «បើអ្នកដំណើរមិនបង្ហាញឯកសារខាងលើប្រតិបត្តិករអាកាសចរណ៍នឹងមិនចេញប័ណ្ណធ្វើដំណើរ និងហាមមិនឲ្យឡើងយន្តហោះ»។
ក្នុងករណីដែលអ្នកដំណើរបានទៅដល់ប្រទេសថៃហើយអ្នកដំណើរដែលមានឯកសារខាងលើអាចនឹងត្រូវបំពេញលក្ខខណ្ឌបន្ថែមទៀតដូចជាការដាក់ឲ្យនៅដាច់ដោយឡែកស្ថិតក្រោមការឃ្លាំមើល ឬវិធានការនានាសម្រាប់បង្ការ និងត្រួតពិនិត្យជំងឺឆ្លង។
លោក ស៊ីន ចាន់សិរីវុត្ថា អ្នកនាំពាក្យអាកាសចរស៊ីវិលថ្លែងថា៖ «លក្ខខណ្ឌតម្រូវការនេះធ្វើឲ្យមានបញ្ហាដល់ការធ្វើដំណើរហាក់ដូចជាអាចបិទដែរ។ គេមិនបិទទេ តែគេដាក់លក្ខខណ្ឌអ៊ីចឹង។ តែ (ចូល) ស្រុកខ្មែរយើងអត់មានលក្ខខណ្ឌអីទេគឺធម្មតាមានតែប្រទេសដែលយើងហាមឃាត់ប៉ុន្មានប្រទេសនោះដែលយើងត្រូវអនុវត្តតាមលក្ខខណ្ឌតម្រូវរបស់រដ្ឋាភិបាលយើង។ ក្រៅពីនេះយើងស្គ្រីនអីធម្មតា»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលថ្លែងថា ច្រកចេញចូលទាំងអស់មានការប្រុងប្រយ័ត្នហើយត្រូវមានក្រុមចត្តាឡីស័កពិនិត្យសុខភាពរបស់ពួកគេ និងឲ្យពួកគេបំពេញទម្រង់បែបបទបញ្ជាក់ពីសុខភាព និងណែនាំឲ្យពួកគាត់នៅដាច់ដោយឡែកដោយខ្លួនឯងរយៈពេល ១៤ ថ្ងៃ។ ចៀសវាងការនាំចូលបន្ថែមទៀតកូវីដ ១៩ មកកម្ពុជា៕