ភ្នំពេញ៖ ស្ថានទូតកម្ពុជាប្រចាំប្រទេសថៃ បានអះអាងតាមរយៈសេចក្ដីជូនដំណឹងកាលពីម្សិលមិញថា រដ្ឋាភិបាលថៃបានអនុញ្ញាតឲ្យអ្នកដំណើរជនបរទេសមួយចំនួនអាចចូលប្រទេសថៃ បាន ប៉ុន្តែពេលបញ្ចប់ភារកិច្ចត្រូវត្រឡប់វិញភ្លាម។ ការប្រកាសនេះស្របពេលដែលកម្ពុជា និងថៃ កំពុងពិភាក្សាពីលទ្ធភាពបើកច្រកតាមព្រំដែនសំខាន់ៗ ដើម្បីសម្រួលដល់សេដ្ឋកិច្ច។
តាមសេចក្ដីជូនដំណឹងការអនុញ្ញាតនេះមានដូចជា អ្នកមានសញ្ជាតិថៃ, អ្នកដែលទទួលបានការលើកលែង ឬជាករណីដែលនាយករដ្ឋមន្ត្រីអនុញ្ញាត ឬអញ្ជើញចូលមកប្រទេស, អង្គទូត មន្ត្រីកុងស៊ុល, តំណាងអង្គការអន្តរជាតិ ឬតំណាងរដ្ឋាភិបាល និងស្ថាប័នបរទេសដែលមកបំពេញបេសកកម្មនៅថៃ, អ្នកដឹកជញ្ជូនទំនិញ។
ប៉ុន្ដែពេលបញ្ចប់ភារកិច្ចត្រូវចេញពីថៃវិញភ្លាម រីឯអ្នកបញ្ជាយានយន្តដែលមានភាពចាំបាច់បំផុតត្រូវកំណត់ពេលវេលាឲ្យបានច្បាស់លាស់។ សេចក្ដីជូនដំណឹងបន្តថា ក្នុងនោះក៏មានជនបរទេសដែលជាភរិយា ឬស្វាមី ជាជនជាតិថៃ ព្រមទាំងឪពុកម្ដាយ ឬកូនរបស់គាត់, សិស្ស និងនិស្សិតបរទេសដែលសិក្សានៅក្នុងប្រទេសថៃ, ជនបរទេសដែលមានភាពចាំបាច់ត្រូវចូលមកព្យាបាលជំងឺ និងអ្នកអមដំណើរផងដែរ។ ប៉ុន្ដែមិនមែនករណីចូលមកព្យាបាលជំងឺកូវីដ ១៩ នោះទេ។
ស្របពេលជាមួយនេះដែរ កាលពីថ្ងៃ ៣០ ខែមិថុនា មន្ត្រីកម្ពុជា និងថៃ បានជួបពិភាក្សាពីលទ្ធភាពបើកច្រកព្រំដែនអន្ដរជាតិសំខាន់ៗឡើងវិញនៅតាមព្រំដែននៃប្រទេសទាំង ២ ដើម្បីទម្លាយភាពជាប់គាំងផ្នែកសេដ្ឋកិច្ចដោយសារការរឹតបន្តឹងការឆ្លងដែន ដើម្បីបង្ការការរីករាលដាលជំងឺកូវីដ ១៩។
កិច្ចពិភាក្សានេះ ធ្វើឡើងរវាងប្រតិភូកម្ពុជាដឹកនាំដោយលោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ និងប្រតិភូធុរជនថៃ ដឹកនាំដោយលោក ឆានីត ចាន់ឆៃណារ៉ុង ប្រធានក្រុមប្រឹក្សាធុរកិច្ចថៃ-កម្ពុជា នៅស្ថានឯកអគ្គរាជទូតកម្ពុជា ក្នុងទីក្រុងបាងកក។
មន្ត្រីស្ថានទូតកម្ពុជាសុំមិនបញ្ចេញឈ្មោះម្នាក់ប្រចាំប្រទេសថៃ កាលពីម្សិលមិញបានបដិសេធការធ្វើអត្ថាធិប្បាយ ជុំវិញកិច្ចប្រជុំពិភាក្សានេះ ដោយលោកអះអាងថា លោកមិនបានចូលរួមក្នុងកិច្ចប្រជុំ ដែលមិនអាចនិយាយពីលទ្ធផលប្រជុំនេះបាន។
ប៉ុន្តែតាមហ្វេសប៊ុករបស់ស្ថានទូតកម្ពុជាប្រចាំនៅប្រទេសថៃ បានឲ្យដឹងពីម្សិលមិញថា ជំនួបនោះ គឺដើម្បីលើកសំណើទៅប្រមុខរដ្ឋាភិបាលកម្ពុជា-ថៃ ដើម្បីបើកច្រកអន្ដរជាតិប៉ោយប៉ែតខ្លងលឹក ស្ថិតនៅចន្លោះព្រំប្រទល់ខេត្តបន្ទាយមានជ័យ (កម្ពុជា) និងខេត្តស្រះកែវ (ថៃឡង់ដ៍) សម្រាប់ភ្ញៀវទេសចរកម្ពុជាដែលត្រូវការមកពិនិត្យជំងឺនៅថៃ និងធុរជនថៃ ដែលត្រូវការចូលមកវិនិយោគនៅកម្ពុជា ដោយមានកំណត់ចំនួនក្នុង ១ ថ្ងៃ។
ស្ថានទូតកម្ពុជាបន្តថា ប្រសិនបើគម្រោងខាងលើទទួលបានជោគជ័យភាគីទាំង ២ ក៏នឹងដាក់សំណើទៅកាន់ប្រមុខរដ្ឋាភិបាល ដើម្បីសុំបើកច្រកអន្តរជាតិផ្សេងៗផងដែរ ដូចជាច្រកអន្តរជាតិអូរស្មាច់ (ខេត្តឧត្តរមានជ័យ) និងចុងជាំ (ខេត្តសុរិន្ទ) ,ច្រកអន្តរជាតិដូង (បាត់ដំបង) និងឡែម (ច័ន្ទប៊ុរី) និងច្រកអន្តជាតិចាំយាម (កោះកុង) និងហាតឡេក (ត្រាត) ជាដើម។ល។ ដើម្បីជំរុញលំហូរទេសចរណ៍ និងពាណិជ្ជកម្មទេ្វភាគី សំដៅស្តារឡើងវិញនូវចរន្តសេដ្ឋកិច្ចនៃប្រទេសទាំង ២។
មន្ត្រីស្ថានទូតថៃប្រចាំកម្ពុជាពីម្សិលមិញ មិនអាចទាក់ទងសុំការបញ្ជាក់ ជុំវិញការពិភាក្សាពីលទ្ធភាពបើកច្រកព្រំដែនអន្ដរជាតិសំខាន់ៗឡើងវិញនេះបានទេ។
ប៉ុន្ដែតាមសារព័ត៌មាន XINHUANET ចេញផ្សាយកាលពីថ្ងៃទី ២៩ ខែមិថុនា បានដកស្រង់សម្ដីលោក Thaweesilp Visanuyothin អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ ១៩ (Center for COVID-19 Situation Administration (CCSA)) ដែលមានលោកនាយករដ្ឋមន្ត្រីថៃ ប្រាយុធ ចាន-អូចា ជាប្រធានបានឲ្យដឹងថា CCSA បានសម្រេចបើកច្រកព្រំដែនអន្តរជាតិ ៣៧ ច្រក ជាប់ជាមួយប្រទេសមីយ៉ាន់ម៉ា ឡាវ កម្ពុជា និងម៉ាឡេស៊ី។
បើតាម CCSA ក្នុងនោះច្រកជាប់ជាមួយឡាវមានចំនួន ១៤ ច្រក, មីយ៉ាន់ម៉ាចំនួន ៨ ច្រក, កម្ពុជាមានចំនួន ៧ ច្រក និង ៨ ច្រក ជាប់ជាមួយម៉ាឡេស៊ី។
យោងតាមទិន្នន័យពីក្រសួងពាណិជ្ជកម្មថៃ ក្នុងរយៈពេល ៤ ខែដំបូងនៃឆ្នាំនេះ ការដោះដូរពាណិជ្ជកម្មទ្វេភាគីកម្ពុជា-ថៃ សម្រចបានទឹកប្រាក់ ៣,១ ពាន់លានដុល្លារ កើនឡើង ១៨,៣ ភាគរយ ធៀបរយៈពេលដូចគ្នាក្នុងឆ្នាំ ២០១៩។ ក្នុងនោះការនាំចេញរបស់កម្ពុជាទៅថៃ មានទឹកប្រាក់ ៦៨៧ លានដុល្លារកើនឡើង ១០៦ ភាគរយ ចំណែកការនាំចូលមានទឹកប្រាក់ ២,៤ ពាន់លានដុល្លារ កើនឡើង ៥,៦ ភាគរយ៕