The Phnom Penh Post Search

Search form




Logo of Phnom Penh Post newspaper Phnom Penh Post - ថៃ​បញ្ជូន​ខ្មែរ​ខុស​ច្បាប់​ ១៣ ​នាក់​មក​វិញ

ថៃ​បញ្ជូន​ខ្មែរ​ខុស​ច្បាប់​ ១៣ ​នាក់​មក​វិញ

ពលរដ្ឋ​ខ្មែរ​ត្រូវ​ថៃ​ចាប់​បញ្ជូន​មក​វិញ​តាម​ច្រក​ព្រំដែន​អន្តរជាតិ​ប៉ោយប៉ែត​កាលពី​ឆ្នាំ​មុន​។
ពលរដ្ឋ​ខ្មែរ​ត្រូវ​ថៃ​ចាប់​បញ្ជូន​មក​វិញ​តាម​ច្រក​ព្រំដែន​អន្តរជាតិ​ប៉ោយប៉ែត​កាលពី​ឆ្នាំ​មុន​។ ម៉ៃ វីរៈ

ថៃ​បញ្ជូន​ខ្មែរ​ខុស​ច្បាប់​ ១៣ ​នាក់​មក​វិញ

ឧត្តរមានជ័យៈ ពលរដ្ឋ​កម្ពុជា​ ១៣ ​នាក់​ត្រូវ​បាន​ដោះលែង​ឲ្យ​នៅ​ក្រៅ​ឃុំ​ពី​ពន្ធនាគារ​ថៃ​ និង​អនុញ្ញាត​ឲ្យ​​វិល​ត្រឡប់​មក​ស្រុក​កំណើត​វិញ​កាល​ថ្ងៃ​អង្គារ​​បន្ទាប់ពី​បាន​ជាប់​ពន្ធនាគារ​អស់​រយៈពេល​ជិត​ពីរ​ខែ​នៅ​ក្នុង​ប្រទេស​ថៃ​​ពី​បទ​ចោទ​ចូល​ទៅក្នុង​ប្រទេស​ថៃ​ដោយ​ខុស​ច្បាប់​។ នេះ​បើ​តាម​សមាជិក​របស់​គ្រួសារ​ជនរងគ្រោះ​ដែល​បាន​ថ្លែង​។

កាល​ថ្ងៃ​ចន្ទ​គ្រួសារ​របស់​ពលករ​ ៦ ​នាក់​ក្នុង​ចំណោម​ពលករ​ ១៣ ​នាក់​​បាន​ប្តឹង​អាជ្ញាធរ​កម្ពុជា​ឲ្យ​ជួយ​​បន្ទាប់ពី​មាន​គេ​ប្រាប់​ថា​ការ​ដោះលែង​សាច់ញាតិ​របស់​ពួកគេ​នឹង​ត្រូវការ​ប្រាក់​ចំនួន​ ៨០០០ ​បាត​ (​ប្រហែល​ ២២៧ ​ដុល្លារ) ក្នុង​ម្នាក់ៗ​ហើយ​​កាលពី​​ម្សិលមិញ​ពួកគេ​បាន​ថ្លែង​ថា​ពួកគេ​បាន​ជ្រើសរើស​ជម្រើស​ខ្ចី​ប្រាក់គេ​ដើម្បី​​ឲ្យ​មាន​ការ​ដោះលែង​ពលករ​ទាំងនោះ​។

អ្នកស្រី​ នី ញ៉ែម ម្តាយ​របស់​ពលករ​ចំណាក​ស្រុក​ឈ្មោះ គីម តែម ដែល​ត្រូវ​បាន​ឃុំ​ខ្លួន​បាន​ថ្លែង​ថា​កូន​ប្រុស​របស់​អ្នកស្រី​ និង​ជនជាតិ​កម្ពុជា​ ១២ ​នាក់​​​ទៀត​​ត្រូវ​បាន​បញ្ជូន​ត្រឡប់​មក​វិញ​​តាម​​ច្រក​ព្រំដែន​ប៉ោយប៉ែត​កាល​ថ្ងៃ​អង្គារ​។

អ្នកស្រី​បាន​ថ្លែង​ថា​៖ «​ខ្ញុំ​បាន​ខ្ចី​លុយ​គេ​ដើម្បី​ឲ្យ​ពួកគេ​ដោះលែង​កូនប្រុស​របស់​ខ្ញុំ​វិញ​​បន្ទាប់ពី​ខាង​ថៃ​​ទាមទារ​លុយ​ពីព្រោះ​ខ្ញុំ​មិន​ចង់​ឲ្យ​កូន​របស់​ខ្ញុំ​ជាប់​ពន្ធនាគារ​តទៅ​ទៀត​ទេ​»។

លោក អាន វណ្ណៈ ប្រធាន​នគរបាល​អន្តោប្រវេសន៍​​នៅ​ច្រក​ព្រំដែន​ប៉ោយប៉ែត​បាន​បញ្ជាក់​កាល​ម្សិលមិញ​ថា​អ្នក​ទាំង​ ១៣ ​នាក់​នោះ​បាន​ត្រឡប់​មក​វិញ​ដោយ​សុវត្ថិភាព​បន្ទាប់ពី​ឆ្លង​ចូល​​ទៅ​​ប្រទេស​ថៃ​ដោយ​ខុស​ច្បាប់​តាមរយៈ​មេខ្យល់​។

នៅក្នុង​ការ​ដោះលែង​មួយ​ផ្សេង​​ទៀត​​កាល​ថ្ងៃ​អង្គារ​​ពន្ធនាគារ​ថៃ​​បាន​ដោះលែង​​អ្នក​កាប់​ឈើ​​ជនជាតិ​កម្ពុជា​ ៤ នាក់​ហើយ​ ២ ​នាក់​ក្នុង​ចំណោម​ពួកគេ​បាន​ជាប់​​ពន្ធនាគារ​អស់​រយៈពេល​ជាង​មួយ​ឆ្នាំ​។ នេះ​បើ​តាម​មន្រ្តី​ដែល​បាន​ថ្លែង​។

លោក ទូច រ៉ា មន្រ្តី​ម្នាក់​​នៅ​ការិយាល័យ​ទំនាក់ទំនង​ព្រំដែន​កម្ពុជា‑ថៃ​​ក្នុង​ខេត្ត​ឧត្តរមានជ័យ​បាន​ថ្លែង​ថា​ការិយាល័យ​​របស់​លោក​បាន​ទទួល​បុរស​ ៤ ​នាក់​ពី​អាជ្ញាធរ​ថៃ​កាលពី​​រសៀល​ថ្ងៃ​អង្គារ​។

លោក​បាន​ថ្លែង​បន្ត​ថា​ ក្នុង​ចំណោម​អ្នក​ទាំង ៤ ​នាក់​នោះ ២ នាក់​ត្រូវ​បាន​ថៃ​ដាក់​ពន្ធនាគារ​​ជាង​ ១ ​ឆ្នាំ​រីឯ​ ២ ​នាក់​ទៀត​ដែល​មាន​អាយុ​ ១៥ និង​ ១៦ ឆ្នាំ​ត្រូវ​បាន​ដាក់​ពន្ធនាគារ​តែ​មួយ​ខែ​ និង​កន្លះ​ខែ​​ប៉ុណ្ណោះ​។ អ្នក​ទាំង​បួន​នាក់​នេះ​មកពី​ខេត្ត​ឧត្តរមានជ័យ កំពង់ស្ពឺ​ និង​ខេត្ត​កំពត​។

លោក រ៉ា បាន​ថ្លែង​បន្ត​ថា​៖ «​ឥឡូវ​នេះ​យើង​បាន​បញ្ជូន​ពួកគេ​ទៅ​ស្រុក​កំណើត​វិញ​​អស់​ហើយ​»​។ ​

លោក​បាន​បន្ថែម​ថា ​មន្រ្តី​របស់​លោក​នៅតែ​បន្ត​ទទួល​​អ្នក​កាប់​ឈើ​​​​ដែល​ឆ្លង​ចូល​ប្រទេស​​ថៃ​ខុស​ច្បាប់​​ពី​ខាង​ថៃ​ប៉ុន្តែ​នៅក្នុង​ឆ្នាំ ២០១៥ ​នេះ​ពលរដ្ឋ​ខ្មែរ​ដែល​លួច​ឆ្លងដែន​ចូល​កាប់​ឈើ​មាន​ចំនួន​តិច​ជាង​ឆ្នាំ​មុន​៕ PS

អត្ថបទគួរចាប់អារម្មណ៍