The Phnom Penh Post Search

Search form




Logo of Phnom Penh Post newspaper Phnom Penh Post - ថោង សារ៉ាត់ ទួញ​យំ​អង្វរករ លោក​នាយក​រដ្ឋ​មន្ដ្រី​ឲ្យ​ជួយ​រក​យុត្តិធម៌

ថោង សារ៉ាត់ ទួញ​យំ​អង្វរករ លោក​នាយក​រដ្ឋ​មន្ដ្រី​ឲ្យ​ជួយ​រក​យុត្តិធម៌

ប្រជាពលរដ្ឋ​​កំពុង​តាម​ដាន​ព័ត៌មាន​នៅ​លើ​បណ្តាញ​សង្គម​ហ្វេស​ប៊ុក រឿង​ករណី​សម្លាប់​ឧញ៉ា។ ខ្សែ​អាត់​សម្លេង​របស់​លោក ឧញ៉ា ថោង សារ៉ាត់​ត្រូវ​បាន​គេ​ស្តាប់ និង​ចែក​ចាយ​បន្ត​នៅ​តាម​បណ្តាញ​សង្គម​មួយ​នេះ។
ប្រជាពលរដ្ឋ​​កំពុង​តាម​ដាន​ព័ត៌មាន​នៅ​លើ​បណ្តាញ​សង្គម​ហ្វេស​ប៊ុក រឿង​ករណី​សម្លាប់​ឧញ៉ា។ ខ្សែ​អាត់​សម្លេង​របស់​លោក ឧញ៉ា ថោង សារ៉ាត់​ត្រូវ​បាន​គេ​ស្តាប់ និង​ចែក​ចាយ​បន្ត​នៅ​តាម​បណ្តាញ​សង្គម​មួយ​នេះ។ ម៉ៃ វីរៈ

ថោង សារ៉ាត់ ទួញ​យំ​អង្វរករ លោក​នាយក​រដ្ឋ​មន្ដ្រី​ឲ្យ​ជួយ​រក​យុត្តិធម៌

ភ្នំពេញៈ លោក​ឧកញ៉ា ថោង សារ៉ាត់ ដែល​ត្រូវ​បាន​តុលាការ​ចោទ​ថា ជា​មេ​ខ្លោង​នៃ​ករណី​ឃាតកម្ម​លើ​លោក ឧកញ៉ា អ៊ឹង ម៉េងជឺ ហើយ​កំពុង​តែ​រត់​គេច​ខ្លួន​បាន​ស្រែក​យំ និង​អង្វរ​តាម​ខ្សែ​អាត់​សំឡេង ស្នើ​សុំ​ការ​ជួយ​អន្តរាគមន៍​ពី​លោក​នាយក​រដ្ឋ​មន្ត្រី ហ៊ុន សែន ដោយ​ចាត់​ទុក​ការ​ចោទ​ប្រកាន់​មក​លើ​រូប​លោក និង​អង្គរក្ស​ថា ជា​ការ​មួល​បង្កាច់។

តាម​ការ​បញ្ជាក់​ពី​បុគ្គលិក​ម្នាក់ របស់​ក្រុម​ហ៊ុន បុរី ៩៩៩ ជុំវិញ​ភាព​ប្រាកដ នៃ​ខ្សែ​អាត់​សំឡេង​រយៈ​ពេល​ជិត ៧ នាទី និយាយ​បណ្តើរ​យំ​បណ្តើរ​នេះ គឺ​ពិត​ជា​សំឡេង​របស់​លោក ថោង សារ៉ាត់ មែន។

ខ្សែ​អាត់​សំឡេង​នេះ ត្រូវ​បាន​ចែក​ចាយ​កាល​ពី​រសៀល​ម្សិល​មិញ បន្ត​ចេញ​ពី​ប្រភព​ដើម គេហទំព័រ Cambodia Real News ដែល​បាន​បង្ហោះ​នូវ​ព័ត៌មាន​ភាគ​ច្រើន​ទាក់​ទង​នឹង​ឃាតកម្ម​លើ​ឧកញ៉ា អ៊ឹង ម៉េងជឺ និង​សកម្ម​ភាព​មិន​គប្បី​របស់​លោក ជួន សុវណ្ណ ស្នងការ​នគរបាល​រាជធានី។

ក្នុង​ខ្សែ​អាត់​សំឡេង​នោះ លោក សារ៉ាត់ បាន​រៀបរាប់​ថា ការ​ចោទ​ប្រកាន់​របស់​តុលាការ​ចំពោះ​រូប​លោក ឪពុក ម្តាយ និង​អង្គរក្ស​របស់​លោក គឺជា​រឿង​អយុត្តិធម៌​ខ្លាំង​ណាស់ ដែល​ត្រូវ​បាន «គេ​ប្រែ​ក្រឡាស់​ពី​ស​ទៅ​ជា​ខ្មៅ» ព្រោះ​អង្គរក្ស​របស់​លោក មិន​បាន​ប្រព្រឹត្ត​ដូច​ការ​ចោទ​ប្រកាន់​នោះ​ទេ។

លោក​និយាយ​ថា៖ «បើ​សិន​ជា​អង្គរក្ស​របស់​ខ្ញុំ ជា​ឃាតករ ដូច​ការ​ចោទ​ប្រកាន់ ហេតុ​អី​បាន​ជា​ពួក​គេ​មិន​រត់ បែរ​ជា​បន្ត​បើក​ម៉ូតូ​ការពារ​ខ្ញុំ ហើយ​ព្រម​ចូល​ខ្លួន​បំភ្លឺ តាម​ការ​កោះ​ហៅ​របស់​ប៉ូលិស»។

តាម​ខ្សែ​អាត់​សំឡេង​ដដែល លោក សារ៉ាត់ បាន​យំ​អង្វរ​យ៉ាង​ទទូច​សូម​ឲ្យ​លោក​នាយក​រដ្ឋ​មន្រ្តី ហ៊ុន សែន គិត​ពិចារណា​សា​ជា​ថ្មី​លើ​រឿង​នេះ ព្រោះ​លោក​មិន​ចង់​និរទ្ទេស​ខ្លួន​បែប​នេះ​ឡើយ ហើយ​ភាព​អយុត្តិធម៌​នេះ នឹង​រីក​រាល​ដាល​ក្លាយ​ជា​បញ្ហា​ធំ គឺ​ការ​ដួល​រលំ​របស់​បុរី ៩៩៩ ការ​បាត់បង់​ការងារ​របស់​បុគ្គលិក​រាប់​ពាន់​នាក់ ក៏​ដូច​ជា​បុរី​ផ្សេងៗ​ទៀត គួប​ផ្សំ​នឹង​វិស័យ​ផ្សេង​ទៀត​ផង​ដែរ។

«ឥឡូវ​នេះ ក្រុម​គ្រួសារ​របស់​ខ្ញុំ កំពុង​ប្រឈម​នឹង​បញ្ហា​ជីវភាព​ដោយ​សារ​លុយ​នៅ​ធនាគារ ដក​មិន​បាន​ទេ រត់​ខ្ចី​គេ លក់​គ្រឿង​អលង្ការ​នៅ​សេស​សល់ ដើម្បី​ឲ្យ​តុលាការ រាប់​សែន ម៉ឺន​ដុល្លារ តុលាការ​បាន​ហួង​ហែង​ស៊ី​លុយ​របស់​យើង មិន​ដែល​ឃើញ​រឿង​អយុត្តិធម៌​បែប​នេះ​ទេ...មាន​តែ​សម្តេច​ទេ ទើប​អាច​ជួយ​យើង​បាន»។

ស្នងការ​រាជធានី​លោក ជួន សុវណ្ណ បដិសេធ​ឆ្លើយ​តប​រឿង​នេះ កាល​ពី​ល្ងាច​ម្សិល​មិញ ដោយ​ថ្លែង​ថា ផុត​ម៉ោង​បំពេញ​ការងារ។ ចំណែក​ចៅ​ក្រម​ស៊ើប​សួរ លោក លី សុខឡេង បាន​អះអាង​ជាប់​រវល់។

កាល​ពី​ថ្ងៃ​អាទិត្យ​ចៅក្រម​ស៊ើប​សួរ​សាលា​ដំបូង​រាជធានី​បាន​សម្រេច​បញ្ជូន​ខ្លួន​ឪពុក​ម្តាយ លោក ថោង សារ៉ាត់ ទៅ​ឃុំ​បណ្តោះ​អាសន្ន​នៅ​ពន្ធនាគារ​ព្រៃ​ស ក្រោម​ការ​ចោទ​ពី​បទ​កាន់​កាប់ ឬ​ដឹក​ជញ្ជូន​អាវុធ​ដោយ​គ្មាន​ការ​អនុញ្ញាត ចំណែក​ប្រពន្ធ និង​ប្អូន​ប្រុស​របស់​លោក ត្រូវ​បាន​ដោះលែង​ខណៈ​អង្គរក្ស ៤​នាក់ ត្រូវ​បាន​ឃុំ​ខ្លួន​កាល​ពី​ថ្ងៃ​សុក្រ​ពី​បទ​ឃាតកម្ម​គិត​ទុក​ជា​មុន៕

អត្ថបទគួរចាប់អារម្មណ៍