ព្រះសីហនុៈ បុគ្គលិកកាស៊ីណូ ប៉ាវម៉ាយ ប្រមាណ ៣០០ នាក់ ស្ថិតក្នុងសង្កាត់លេខ ៤ ក្រុងព្រះសីហនុកាលពីម្សិលមិញ ថៅកែកាស៊ីណូបានសម្រេចបើកប្រាក់ខែជូនទាំងអស់ក្រោយពីតវ៉ាទាមទារកាលពីថ្ងៃទី ១៦ កញ្ញាសប្ដាហ៍មុន។
កញ្ញា សេង ចន្នី តំណាងបុគ្គលិកកាស៊ីណូប៉ាវម៉ាយបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ក្រោយមានការសម្របសម្រួលពីមន្ទីរការងារខេត្ដព្រះសីហនុដោយឲ្យម្ចាស់កាស៊ីណូ ប៉ាវម៉ាយ ចុះកិច្ចសន្យាព្រមព្រៀងបើកប្រាក់ខែឲ្យបុគ្គលិកនៅថ្ងៃទី ២៣ ខែកញ្ញារួចមក។
ចន្នី បានប្រាប់ថា៖ «ពួកខ្ញុំបានមកបើកប្រាក់ខែបានរួចរាល់ខ្លះហើយ និងកំពុងបន្ដបើកប្រាក់ខែឲ្យបុគ្គលិកផ្សេងទៀតដែរនឹងបើកអស់គ្រប់គ្នាហើយ»។
លោក យ៉ូវ ខេមរា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ថៅកែកាស៊ីណូបានគោរពតាមកិច្ចសន្យាបើកប្រាក់ខែតាមការកំណត់ដល់បុគ្គលិកទាំងអស់។
កាលពីថ្ងៃទី ១៦ ខែកញ្ញានេះបុគ្គលិក កាស៊ីណូ ប៉ាវម៉ាយ ស្ថិតនៅសង្កាត់លេខ ៤ ក្រុងព្រះសីហនុប្រមាណ ៣០០ នាក់បាននាំគ្នាតវ៉ាទាមទារបើកប្រាក់ជាលើកទី ២ ក្រោយកាស៊ីណូបានផ្អាកដំណើរការ ហើយមានការយឺតយ៉ាវក្នុងការបើកប្រាក់ខែឲ្យបុគ្គលិកសម្រាប់ ១ ខែកន្លះសម្រាប់ខែសីហា និងពាក់កណ្ដាលខែកញ្ញាដែលសរុបជាថវិកាប្រមាណជាង ១៧ ម៉ឺនដុល្លារអាមេរិក។
អ្នកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្សអាដហុក ប្រចាំខេត្តព្រះសីហនុបានស្នើឲ្យអាជ្ញាធរពាក់ព័ន្ធបង្កើនការរឹតបន្ដឹងច្បាប់ដល់ថៅកែកាស៊ីណូជាជនជាតិចិនកុំឲ្យមានការរំលោភសិទ្ធិ និងរំលោភពលកម្មការងារដល់បុគ្គលិក៕