ភ្នំពេញ៖ ថ្ងៃនេះ ក្រសួងសុខាភិបាលបានប្រកាសរកឃើញអ្នកឆ្លងវីរុសកូវីដ ១៩ មានចំនួនរហូតដល់ ៥៧៦ នាក់បន្ថែមទៀត ដែលសុទ្ធតែជាអ្នកឆ្លងក្នុងសហគមន៍ទាំងអស់ក្នុងរយៈពេលតែ ១ ថ្ងៃ ដែលនេះជាតួលេខឆ្លងខ្ពស់បំផុតក្នុងប្រទេសកម្ពុជា ខណៈមានអ្នកព្យាបាលជាសះស្បើយចំនួន ៧០ នាក់។
យោងតាមសេចក្តីប្រកាសរបស់ក្រសួងសុខាភិបាលនៅថ្ងៃសុក្រ ទី ០៩ ខែមេសានេះ បានឱ្យដឹងថា អ្នកជំងឺដែលបានរកឃើញមានវិជ្ជមានកូវីដ ១៩ នេះមាននៅរាជធានីភ្នំពេញច្រើនជាងគេគឺ ៥៤៤ នាក់ ឯខេត្តស្វាយរៀងចំនួន ១៦ នាក់ ខេត្តព្រះសីហនុចំនួន ១២ នាក់ ខេត្តសៀមរាប ២ នាក់ ខណៈខេត្តកំពង់ចាម និងកណ្ដាលមានតែ ១ ករណីដូចគ្នា។
គិតត្រឹមព្រឹកថ្ងៃទី ៨ ខែ មេសា ឆ្នាំ ២០២១ នេះ កម្ពុជាមានអ្នកមានវីរុសកូវីដ ១៩ សរុបចំនួន ៣ ៦០៤ នាក់ ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៣ ០៧២ នាក់ អ្នកជាសះស្បើយសរុបចំនួន ១ ៩៨៤ នាក់ អ្នកកំពុងព្យាបាលចំនួន ១ ៥៩១ នាក់ និងអ្នកស្លាប់ចំនួន ២៤ នាក់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានលើកឡើងថា អ្នកឆ្លងរកឃើញកើនឡើងច្រើន បង្កើតនូវការព្រួយបារម្ភដល់ផលប៉ះពាល់សុខភាពសាធារណ:ក្នុងរយ:ពេលយូរ ដែលយើងកំពុងប្រឈមទៅនឹងហានិភ័យខ្ពស់ណាស់សម្រាប់ឈានចូលដល់ការរាតត្បាតទ្រង់ទ្រាយធំ នៅក្នុងសហគមន៍ និងផលរំខានដល់កំណើនសេដ្ឋកិច្ចគ្រួសារ និងសង្គម។
លោកស្រីបានថ្លែងថា៖ «ខ្ញុំសម្រាន្តមិនលក់ ព្រោះនៅតែមិនអស់ចិត្ត ចោទសួររិះគិតថា ហេតុអ្វីបានជាបុគ្គលខ្លះគាត់មិនអនុវត្តន៍បាននូវវិធានការការពារ ដែលអាចកាត់ផ្តាច់ខ្សែចម្លងវីរុសកូវីដ ១៩ បាន? បើខ្ញុំអាចអនុវត្តន៍ជំនួសពួកគាត់បានខ្ញុំប្រាកដជាធ្វើជូនពួកគាត់»។
លោកស្រីបន្ថែមថា បើគ្រប់គ្នាសុខចិត្តលំបាកក្នុងរយ:ពេលខ្លី នាំគ្នាអនុវត្តន៍វិធានការការពារទាំងអស់គ្នា នោះនឹងចៀសផុតនូវការលំបាកក្នុងរយ:ពេលវែង។
លោកស្រី ឱ វណ្ណឌីន បានបន្ថែមថា៖ «ខ្ញុំសូមបង្កើតពាក្យថា ចូលឆ្នាំនៅផ្ទះ ឬ New Year at Home ជាមួយនឹងការអនុវត្តវិធានការ ៣ ការពារ ៣ កុំ និងចូលរួមចាក់វ៉ាក់សាំងកូវីដ ១៩ ដែលអាចឱ្យបុគ្គលអាចវ៉ៃបកបានទៅនឹងការវាយលុកធ្ងន់ធ្ងរលើសរីរាង្គកាយរបស់ខ្លួន ចៀសផុតនូវការចម្លងជំងឺកូវីដ ១៩»៕