.jpg)
គ្រូបង្រៀននៅវិទ្យាល័យបាក់ទូក រង់ចាំចាក់វ៉ាក់សាំងប្រឆាំងកូវីដ ១៩ កាលពីថ្ងៃទី ១ ខែ មេសា ឆ្នាំ ២០២១។ ហេង ជីវ័ន
ភ្នំពេញ៖ ក្រសួងសុខាភិបាល បានប្រកាសរកឃើញអ្នកឆ្លងវីរុសកូវីដ ១៩ ចំនួន ៩១ នាក់បន្ថែមទៀត ក្នុងនោះ ៩០ នាក់ គឺជាករណីឆ្លងក្នុងព្រឹត្តិការណ៍សហគមន៍ ២០ កុម្ភៈ ខណៈអ្នកជាសះស្បើយមានចំនួន ៣០ នាក់។
យោងតាមសេចក្តីប្រកាសរបស់ក្រសួងចុះថ្ងៃទី ៧ ខែមេសានេះ បានបន្តថា អ្នកឆ្លងក្នុងព្រឹត្តិការណ៍សហគមន៍នេះមានជនជាតិខ្មែរចំនួន ៨៩ នាក់ និងម្នាក់ជាជនជាតិវៀតណាម។
អ្នកដែលឆ្លងទាំងនេះ មាននៅរាជធានីភ្នំពេញច្រើនជាងគេ គឺចំនួន ៧៨ នាក់ ខេត្តតាកែវ ៤ នាក់ ខេត្តស្វាយរៀង ៣ នាក់ និង ៥ ខេត្តផ្សេងទៀត មានអ្នកកើត ១ ករណីដូចៗគ្នា ក្នុងនោះមានខេត្តត្បូងឃ្មុំ ខេត្តពោធិ៍សាត់ ខេត្តកំពង់ចាម ខេត្តប៉ៃលិន និងខេត្តព្រៃវែង។
ចំណែកករណីឆ្លងម្នាក់ ដែលជាអ្នកដំណើរ គឺជាជនជាតិឥណ្ឌូនេស៊ី អាយុ ៣៣ ឆ្នាំ មកពីប្រទេសឥណ្ឌូនេស៊ី បន្តជើងហោះហើរនៅប្រទេសសិង្ហបុរី មកដល់កម្ពុជា នៅថ្ងៃទី ០៥ ខែ មេសា ឆ្នាំ ២០២១។
បុរសរូបនេះមានលទ្ធផលតេស្តវិជ្ជមាន កូវីដ ១៩ ចេញដោយវិទ្យាស្ថានប៉ាស្ទ័រកម្ពុជា និងបានដាក់ឱ្យសម្រាកព្យាបាលនៅសណ្ឋាគារក្រេតឌុក រាជធានីភ្នំពេញ។
គិតត្រឹមព្រឹកថ្ងៃទី ០៧ ខែ មេសា ឆ្នាំ ២០២១ នេះ កម្ពុជាមានអ្នកឆ្លងកូវីដ ១៩ សរុបចំនួន ២ ៩១៥ នាក់ អ្នកជាសះស្បើយចំនួន ១ ៨២៤ នាក់ អ្នកកំពុងព្យាបាលចំនួន ១ ០៦៤ នាក់ និងមានអ្នកស្លាប់ចំនួន ២២ នាក់៕
