.jpg)
ក្រុមគ្រូពេទ្យមកទទួលអ្នកវិជ្ជមានកូវីដ ១៩ ដើម្បីយកទៅព្យាបាល នៅសង្កាត់ផ្សារដើមថ្កូវ ខណ្ឌចំការមន កាលពីថ្ងៃទី ២១ មេសា។ ហ៊ាន រង្សី
ភ្នំពេញ៖ មនុស្សចំនួន ៦១៦ នាក់បន្ថែមទៀត ត្រូវបានរកឃើញឆ្លងវីរុសកូវីដ ១៩ ដែលមកដល់ពេលនេះ កម្ពុជាមានអ្នកឆ្លងវីរុសនេះជិត ១០ ០០០ នាក់ហើយ ដោយក្នុងព្រឹត្តិការណ៍សហគមន៍ ២០ កុម្ភៈនេះតែមួយ មានអ្នកឆ្លងរហូតដល់ ៩ ៤២៦ នាក់ឯណោះ។
យោងតាមសេចក្តីប្រកាសរបស់ក្រសួងសុខាភិបាល នៅរសៀលថ្ងៃអាទិត្យ ទី ២៥ ខែមេសានេះ ក៏បានឱ្យដឹងពីអ្នកដែលត្រូវបានព្យាបាលជាសះស្បើយមានចំនួន ១៩០ នាក់ផងដែរ ប៉ុន្តែមានអ្នកស្លាប់ចំនួន ៣ នាក់បន្ថែមទៀត ដែលធ្វើឱ្យប្រទេសកម្ពុជា មានអ្នកស្លាប់ដោយសារជំងឺកូវីដ ១៩ កើនឡើងដល់ ៧៤ នាក់ ក្នុងរយៈពេលជាង ២ ខែនេះ។
អ្នកដែលត្រូវបានរកឃើញឆ្លងថ្មីនេះ មាននៅរាជធានីភ្នំពេញ ៥៤៦ នាក់ ខេត្តកណ្ដាល ២៤ នាក់ ខេត្តព្រះសីហនុ ២០ នាក់ ខេត្តព្រៃវែង ៨ នាក់ ខេត្តតាកែវ ៧ នាក់ និងខេត្តមណ្ឌលគិរី ស្វាយរៀង កំពង់ឆ្នាំង កំពង់ធំ និងខេត្តកោះកុង មាន ០២ ករណីដូចៗគ្នា ខណៈខេត្តកំពង់ស្ពឺមានចំនួន ០១ ករណី។
គិតត្រឹមព្រឹកថ្ងៃទី ២៥ ខែ មេសា ឆ្នាំ ២០២១ នេះ ប្រទេសកម្ពុជា មានចំនួនអ្នកឆ្លងវីរុសកូវីដ ១៩ សរុបចំនួន ៩ ៩៧៥ នាក់ អ្នកជាសះស្បើយចំនួន ៣ ៤០០ នាក់ អ្នកកំពុងសម្រាកព្យាបាល ៦ ៤៩៥ នាក់ និងអ្នកស្លាប់ចំនួន ៧៤ នាក់។
ក្រសួងសុខាភិបាលក៏បានប្រកាសនៅរសៀលថ្ងៃនេះដែរថា កាលពីថ្ងៃទី ២៤ ខែមេសា មានករណីស្លាប់ជនជាតិខ្មែរចំនួន ០៣ នាក់ ក្នុងនោះមានស្រ្តីឣាយុ ៧៩ ឆ្នាំ បុរសឣាយុ ៥៧ ឆ្នាំ និងស្រ្តីឣាយុ ៦៥ ឆ្នាំ ដោយសារជំងឺកូវីដ ១៩៕
