.jpg)
គ្រូពេទ្យយកសំណាកពីកុមារាម្នាក់នៅម្ដុំផ្សារចាស់ ដែលជាប់ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ កាលពីថ្ងៃទី ១៣ មេសា។ ហ៊ាន រង្សី
ភ្នំពេញ៖ ក្រសួងសុខាភិបាលនៅថ្ងៃទី ១៥ ខែ មេសា ឆ្នាំ ២០២១ នេះ បានប្រកាសបន្តរកឃើញអ្នកឆ្លងកូវីដ ១៩ ថ្មីរហូតដល់ ៣៤៤ នាក់ ដែលភាគច្រើនបំផុតជាអ្នករស់នៅរាជធានីភ្នំពេញ ខណៈអ្នកជំងឺចំនួន ២៩ នាក់បានជាសះស្បើយ និងអនុញ្ញាតឲ្យចេញពីមន្ទីរពេទ្យ។
យោងតាមសេចក្ដីប្រកាសព័ត៌មានដែល ភ្នំពេញ ប៉ុស្តិ៍ ទទួលបាននៅមុននេះបន្តិច បានបង្ហាញថា ក្នុងចំណោមអ្នកឆ្លងទាំង ៣៤៤ នាក់ មាន ៥ នាក់ ជាករណីនាំចូលមកពីក្រៅប្រទេស និង ៣៣៩ នាក់ផ្សេងទៀត ជាករណីឆ្លងក្នុងសហគមន៍ ២០ កុម្ភៈ ដែលរួមមានរាជធានីភ្នំពេញ ២៤៣ នាក់, ព្រះសីហនុ ៦ នាក់, ស្វាយរៀង ៧១ នាក់, កណ្ដាល ៨ នាក់, ក្រចេះ ២ នាក់, សៀមរាប ១ នាក់, កោះកុង ៥ នាក់ និងខេត្តតាកែវ ៣ នាក់។
សម្រាប់អ្នកជាសះស្បើយទាំង ២៩ នាក់វិញ ក្នុងនោះម្នាក់ជាជនជាតិឥណ្ឌូនេស៊ី ដែលធ្វើដំណើរមកពីក្រៅប្រទេសម្នាក់ និង ២៨ នាក់ ជាអ្នកឆ្លងក្នុងសហគមន៍នៃព្រឹត្តិការណ៍ ២០ កុម្ភៈ ដោយទទួលលទ្ធផលធ្វើតេស្តអវិជ្ជមាន ២ លើក ត្រូវបានអនុញ្ញាតឲ្យចេញពីមន្ទីរពេទ្យ ប៉ុន្តែត្រូវបន្តធ្វើចត្តាឡីស័ក ១៤ ថ្ងៃ ដើម្បីតាមដានសុខភាព។
យោងតាមតួលេខរបស់ក្រសួងសុខាភិបាលគិតត្រឹមម៉ោង ៧ ព្រឹក ថ្ងៃទី ១៥ ខែ មេសា ឆ្នាំ ២០២១ នេះ កម្ពុជាបានរកឃើញអ្នកឆ្លងសរុបចំនួន ៥ ២១៨ នាក់ ក្នុងនោះករណីសហគមន៍ ២០ កុម្ភៈ ចំនួន ៤ ៦៧៦ នាក់, អ្នកជាសះស្បើយចំនួន ២ ៣១៩ នាក់, អ្នកកំពុងសម្រាកព្យាបាលចំនួន ២ ៨៥៨ នាក់, អ្នកស្លាប់ចំនួន ៣៦ នាក់ និងស្លាប់ដោយជំងឺផ្សេង ពេលកំពុងព្យាបាលកូវីដ ១៩ ចំនួន ៥ នាក់៕
