ភ្នំពេញៈ មជ្ឈមណ្ឌលសហប្រតិបត្តិការកម្ពុជាជប៉ុន (CJCC) នឹងរៀបចំពិព័រណ៍តាមអនឡាញរយៈពេល ២ ថ្ងៃចាប់ពីថ្ងៃទី ២៤ ដល់ថ្ងៃ ២៥ តុលា ស្តីពីការសិក្សានៅជប៉ុនតាមអនឡាញដើម្បីផ្តល់ព័ត៌មានជុំវិញការសិក្សាថ្នាក់បរិញ្ញាបត្រ ថ្នាក់ឧត្តមសិក្សា និងក្រោយឧត្តមសិក្សានៅជប៉ុន។
តាមសេចក្តីប្រកាសព័ត៌មាន CJCC បានឱ្យដឹងថា សិស្ស និស្សិត សាធារណជន និងអាណាព្យាបាលដែលមានចំណាប់អារម្មណ៍ចង់បន្តការសិក្សា ឬបញ្ជូនកូនទៅសិក្សានៅប្រទេសជប៉ុនអាចចូលរួមពិព័រណ៍នេះដោយសេរី និងមិនគិតថ្លៃតាមរយៈ Zoom ឬទស្សនាការផ្សាយផ្ទាល់តាមហ្វេសប៊ុកផ្លូវការរបស់ខ្លួន។ ពិព័រណ៍នេះនឹងផ្តល់ឱកាសឱ្យអ្នកចូលរួមបានជួបប្រឹក្សាយោបល់ផ្ទាល់ជាមួយតំណាងមកពីសាកលវិទ្យាល័យល្បីៗនៅជប៉ុន និងតំណាងមកពីស្ថាប័នផ្សេងៗផងដែរ។
CJCC បញ្ជាក់ថា «ពិព័រណ៍នេះមានការចូលរួមពីសាកលវិទ្យាល័យល្បីៗនៅជប៉ុន និងស្ថាប័នផ្សេងៗដូចជា ការិយាល័យផ្តល់ព័ត៌មានពីការសិក្សានៅជប៉ុនប្រចាំតំបន់អាស៊ាន។ សាកលវិទ្យាល័យអន្តរជាតិតូក្យូ និងសាកលវិទ្យាល័យក្យូតូព្រមទាំងសាកលវិទ្យាល័យអាស៊ីប៉ាស៊ីហ្វិករីហ្ស៊ឹមេកាំង។ ក្នុងនោះក៏មានសាកលវិទ្យាល័យគុម៉ាម៉ុតុ និងស្ថានទូតជប៉ុនប្រចាំកម្ពុជា»។
ពិព័រណ៍ស្តីការសិក្សានៅជប៉ុននេះចាប់ផ្តើមបង្កើតឡើង តាំងពីឆ្នាំ ២០០៨ ដោយ CJCC ក្រោមការគាំទ្រពីក្រសួងអប់រំ និងស្ថាប័នអប់រំមួយចំនួនទៀត។
កញ្ញា ឃុន វត្តីស្រីល័ក្ខណ៍ អនុប្រធានផ្នែកផ្លាស់ប្តូរវប្បធម៌ និងអប់រំបានប្រាប់ភ្នំពេញប៉ុស្តិ៍ពីថ្ងៃទី ២១ តុលា ថា សាលារៀនដែលមកធ្វើបទបង្ហាញគឺមានទាំងសាលាដែលត្រូវបង់ថ្លៃសិក្សា ឬក៏ទទួលបានអាហារូបករណ៍ អាស្រ័យលើលក្ខខណ្ឌសាលាទៅតាមសមត្ថភាពសិស្សនិស្សិត។
កញ្ញាបន្តថា៖ «ពិព័រណ៍នេះគឺជាកម្មវិធីសិក្សាមួយនៅជប៉ុន ដែលជំរុញដល់និស្សិតកម្ពុជាដែលមានបំណងចង់បន្តការសិក្សានៅប្រទេសជប៉ុន។ វាក៏បង្ហាញពីព័ត៌មាន ឬក៏អាហារូបករណ៍ដែលផ្តល់ដល់ពលរដ្ឋកម្ពុជាបានបន្តការសិក្សានៅប្រទេសជប៉ុនផងដែរនូវព័ត៌មាន និងអាហារូបករណ៍ផ្តល់ដល់ប្រជាជនកម្ពុជា»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានប្រាប់ភ្នំពេញប៉ុស្តិ៍ពីថ្ងៃទី ២១ តុលាថា នេះគឺជាកិច្ចសហការដ៏ល្អមួយដែលកម្ពុជាបានបញ្ជូនសិស្ស និស្សិត ទៅបន្តការសិក្សានៅប្រទេសជប៉ុនជារៀងរាលឆ្នាំ។ លោកបន្តថា នេះក៏បង្ហាញ្ឱ្យឃើញពីការចូលរួមលើកកម្ពស់គុណភាពនៃការអប់រំនៅកម្ពុជាផងដែរ។
លោកបញ្ជាក់ថា៖ «ក្រសួងស្វាគមន៍រាល់កិច្ចសហការគ្រប់ភាគី ព្រមទាំងកិច្ចសហប្រតិបត្តិការជាមួយប្រទេសជប៉ុននេះជាច្រើនឆ្នាំហើយ ដែលទិដ្ឋភាពនៃការតាំងពិព័រណ៍នេះគឺជាព្រឹត្តិការណ៍មួយដែលផ្តោតទៅលើវិស័យអប់រំកម្រិតឧត្តមសិក្សា ដើម្បីចូលរួមលើកកម្ពស់គុណភាពមូលធនមនុស្សនៅកម្ពុជា។ វាជាចលករមួយក្នុងការលើកកម្ពស់សេដ្ឋកិច្ចបែបឌីជីថលតាមរយៈការអប់រំដោយឌីជីថល»។
បើតាមលោក រស់ សុវាចា តាំងពីឆ្នាំ ១៩៨០ មកទល់ឆ្នាំ ២០១៩ តាមរយៈកម្មវិធីក្រសួងអប់រំបានបញ្ជូននិស្សិតខ្មែរទៅជប៉ុន បន្តការសិក្សាប្រមាណ ១ ២៥៨ នាក់ ខណៈក្នុងឆ្នាំ ២០១៩ មាននិស្សិតជិត ៦០ នាក់ បានទៅបន្តការសិក្សានៅទីនោះ៕