The Phnom Penh Post Search

Search form

Logo of Phnom Penh Post newspaper Phnom Penh Post - ថ្ងៃ​ចូល​ឆ្នាំ​អ្នក​ភ្នំពេញ​ត្រូវ​ទុក​ដាក់​សំរាម​ខ្លួន​ឯង

ថ្ងៃ​ចូល​ឆ្នាំ​អ្នក​ភ្នំពេញ​ត្រូវ​ទុក​ដាក់​សំរាម​ខ្លួន​ឯង

ថ្ងៃ​ចូល​ឆ្នាំ​អ្នក​ភ្នំពេញ​ត្រូវ​ទុក​ដាក់​សំរាម​ខ្លួន​ឯង

130408_08
គំនរសំរាមនៅដងវិថីមួយក្នុងរាជធានីភ្នំពេញកាលពីម្សិលមិញដែលមិនទាន់ត្រូវបានប្រមូល Scott Howes

ភ្នំពេញៈ អ្នក​រស់​នៅ​រាជធានី​ភ្នំពេញ​ក្នុង​ឱកាស​ចូល​ឆ្នាំ​ខ្មែរ​ខាង​មុខ​នេះ នឹង​ត្រូវ​រៀបចំ​ទុក​ដាក់​សំរាម​ដោយ​ខ្លួន​ឯង ដោយ​សារ​ថា ក្រុម​កម្មករ​របស់​ក្រុមហ៊ុន​ប្រមូល​សំរាម​ស៊ីនទ្រី ត្រូវ​​ឈប់​សម្រាក​បុណ្យ​ចូល​ឆ្នាំ​ខ្មែរ។

សាលា​រាជធានី​ភ្នំពេញ​បាន ចេញ​សេចក្តី​ជូន​ដំណឹង​កាល​ពី​ថ្ងៃ​សុក្រ​ថា សេវា​ប្រមូល​សំរាម នឹង​ចាប់​ផ្អាក​ពី​ថ្ងៃ​ទី​១២ ដល់​ថ្ងៃ ទី​១៨ ខែ​មេសា ដើម្បី​ឈប់​សម្រាក​ថ្ងៃ​បុណ្យ​ចូល​ឆ្នាំ​ខែ្មរ។

យោង​តាម​សេចក្តី​ជូន​ ដំណឹង​នេះ​ឲ្យ​ដឹង​ដែរ​ថា អាជ្ញាធរ​សូម​ធ្វើ​ការ​ណែនាំ​ប្រជា​ពលរដ្ឋ​ដែល​រស់​នៅ​រាជធានី​ភ្នំពេញ សូម​មេត្តា​ទុក​ដាក់​សំរាម​ក្នុង​ស្បោង​ទុក​ក្នុង​ផ្ទះ​រៀងៗ​ខ្លួន ​ដើម្បី​​«​កុំ​ឲ្យ​ប៉ះពាល់​ដល់​ភាព​ស្អាត​ស្អំ និង​សោភ័ណភាព​របស់​ទីក្រុង។

លោក សេង ចំរើន អនុ​ប្រធាន​ក្រុមហ៊ុន​ស៊ីនទ្រី បាន​ថ្លែង​ប្រាប់​ភ្នំពេញ​ ប៉ុស្តិ៍​កាល​ពី​ថ្ងៃ​ម្សិលមិញ​ថា កម្លាំង​បម្រើ​ការ​ងារ​ប្រមូល​សំរាម​របស់​ក្រុម​ហ៊ុន​នឹង​ត្រូវ​កាត់​ បន្ថយ​ពី​៦០​ទៅ​៧០​ភាគរយ​ខណៈ​ដែល​កម្មករ​ឈប់​សម្រាក​ដើម្បី​ធ្វើ​ដំណើរ​ទៅ​កាន់​ស្រុក​កំណើត​របស់​ពួក​គេ​ក្នុង​ឱកាស​បុណ្យ​ចូល​ឆ្នាំ​ប្រពៃណី​ខ្មែរ​។

លោក សេង ចំរើន បាន​មាន​ប្រសាសន៍​បន្ត​ថា​៖ «​ក្នុង​អំឡុង​ពេល​នោះ យើង​នឹង​នៅ​តែ​ប្រមូល​សំរាម​នៅ​កន្លែង​សំខាន់ៗ​ដូច​ជា​ នៅ​តាម​មហា​វិថី រុក្ខវិថី ផ្សារ​ធំៗ និង​តំបន់​ទី​ប្រជុំជន​»។

អ្នក​នាំ​ពាក្យ សាលា​រាជ​ធានី​ភ្នំពេញ ​លោក ឡុង ឌីម៉ង់ បាន​អំពាវ​នាវ​ឲ្យ​ប្រជា​ពលរដ្ឋ​មាន​ការ​អត់ធ្មត់ និង​គោរព​តាម​ការ​ណែនាំ​របស់​អាជ្ញាធរ​រាជធានី។

តាម​លោក ឡុង ឌីម៉ង់ ពលរដ្ឋ​ម្នាក់ៗ ក្នុង​ចំណោម​ពលរដ្ឋ​២​លាន​កន្លះ​នៅ​រាជ​ធានី​ភ្នំពេញ​ បង្កើត​បរិមាណ​សំរាម​ប្រមាណ​១​គ.ក្រ ក្នុង​មួយ​ថ្ងៃ​ សរុប​ទៅ​២.៥០០​តោន​។

សំរាម ទាំងអស់​នេះ​ ត្រូវ​ប្រមូល​ដោយ​រថយន្ត​របស់​ក្រុម​ហ៊ុន​ស៊ីន​ទ្រី ដើម្បី​យក​ទៅ​ចាក់​ចោល​នៅ​កន្លែង​មួយ​ចម្ងាយ​១៦​គីឡូ​ម៉ែត្រ នៅ​ខាង​ក្រៅ​ក្រុង។

អ្នក​ភ្នំពេញ​ម្នាក់​ឈ្មោះ ហ៊ាង វុទ្ធា អាយុ ២៧​ឆ្នាំ រស់​នៅ​ខណ្ឌ​ឫស្សីកែវ ថា​គាត់ ស៊ាំ​នឹង​បញ្ហា​នេះ​រាល់​ឆ្នាំ​ទៅ​ហើយ​។ លោក វុទ្ធា​បន្ត​ថា​៖«​វា​មាន​បញ្ហា​ក្នុង​រយៈ​ពេល​ខ្លី​តែ​ប៉ុណ្ណោះ​សម្រាប់​ថ្ងៃ​​បុណ្យ​ចូល​ឆ្នាំ​ខ្មែរ​។ យើង​ទុក​សំរាម​របស់​យើង ហើយ​អ្នក​ប្រមូល​សំរាម​នឹង​មក​ប្រមូល​វា នៅ​ពេល​​ពួក​គេ ​ចូល​ធ្វើ​ការ​វិញ​។ សំណាង​ដែរ​ដែល​អ្នក​ភ្នំពេញ​ភាគ​ច្រើន នាំ​គ្នា​ទៅ​ជួប​ជុំ​គ្រួសារ​នៅ​តាម​ខេត្ត​ដូច្នេះ​បញ្ហា​នេះ​កើត​មា​ន​​ ​ក្នុង​រយៈពេល​ខ្លី​ប៉ុណ្ណោះ​»​៕ NR

រាយការណ៍​បន្ថែម​ដោយ​ DANSON CHEONG

អត្ថបទគួរចាប់អារម្មណ៍