ភ្នំពេញៈ ថ្ងៃនេះ មនុស្សចំនួន ១០៥ នាក់ ត្រូវបានរកឃើញថា វិជ្ជមានវីរុសកូវីដ ១៩ ដែលក្នុងនោះមាន ១០៤ នាក់ ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ ខណៈមានអ្នកជាសះស្បើយតែចំនួន ៤ នាក់ប៉ុណ្ណោះ។ នេះបើយោងតាមរបាយការណ៍របស់ក្រសួងសុខាភិបាល នៅព្រឹកថ្ងៃអង្គារ ទី ៣០ ខែ មីនា ឆ្នាំ ២០២១ នេះ។
របាយការណ៍បន្តថា អ្នកវិជ្ជមានវីរុសកូវីដ ១៩ ក្នុងព្រឹត្តិការណ៍សហគមន៍នេះ មាននៅរាជធានីភ្នំពេញចំនួន ៤៥ នាក់ ខេត្តព្រះសីហនុចំនួន ៣៤ នាក់ ខេត្តស្វាយរៀងចំនួន ២០ នាក់ ខេត្តកំពង់ចាម ២ នាក់ ខេត្តព្រៃវែង ១ នាក់ ខេត្តត្បូងឃ្មុំ ១ នាក់ និងខេត្តតាកែវចំនួន ១ នាក់។
ចំនួនអ្នកឆ្លងកូវីដសរុបក្នុងព្រឹត្តិការណ៍សហគមន៍ ២០ កុម្ភៈ មកដល់ថ្ងៃទី ២៩ ខែ មីនា ឆ្នាំ ២០២១ បានកើនឡើងដល់ចំនួន ១ ៨៥១ នាក់ ដែលក្នុងនោះ អ្នកដែលបានព្យាបាលជាសះស្បើយចំនួន ៦៦២ នាក់ ក្នុងរយៈពេលជាង ១ ខែមកនេះ។
គិតត្រឹមព្រឹក ថ្ងៃទី ៣០ ខែ មីនា ឆ្នាំ ២០២១ នេះ កម្ពុជាមានអ្នកឆ្លងវីរុសកូវីដ ១៩ សរុបចំនួន ២ ៣៧៧ នាក់ អ្នកត្រូវបានព្យាបាលជាសះស្បើយចំនួន ១ ១៧៦ នាក់ អ្នកកំពុងសម្រាកព្យាបាលចំនួន ១ ១៨៦ នាក់ និងអ្នកស្លាប់ចំនួន ១១ នាក់៕