.jpg)
ពិធីអបអរសាទរខួប ៤១ ឆ្នាំនៃការបង្កើត «រណសិរ្សសាមគ្គីសង្គ្រោះជាតិកម្ពុជា» ដែលប្រារព្ធធ្វើឡើងនៅសាលសន្និសីទចតុមុខម្សិលមិញ។ រូប SDP.NA page
ភ្នំពេញៈ ថ្នាក់ដឹកនាំជាន់ខ្ពស់នៃប្រទេសកម្ពុជាក្នុងពិធីប្រារព្ធខួប ៤១ ឆ្នាំ នៃថ្ងៃកំណើតរណសិរ្សសាមគ្គីសង្គ្រោះជាតិកម្ពុជាពីម្សិលមិញបានចាត់ទុក រណសិរ្ស ២ ធ្នូ គឺជាថ្ងៃប្រវត្តិសាស្ត្រដ៏សំខាន់នៃការរៀបចំកម្លាំង ផ្ដួលរំលំរបបប្រល័យពូជសាសន៍ប៉ុលពត និងបានជួយឲ្យប្រជាជនកម្ពុជារស់រានមានជីវិតឡើងវិញ និងបានបង្កើតនូវសមិទ្ធផលធំៗសម្រាប់សង្គមជាតិ។
ពិធីអបអរសាទរខួប ៤១ ឆ្នាំ ថ្ងៃកំណើត «រណសិរ្សសាមគ្គីសង្គ្រោះជាតិកម្ពុជា» ដែលបច្ចុប្បន្នត្រូវបានដូរឈ្មោះជា «រណសិរ្សសាមគ្គីអភិវឌ្ឍន៍មាតុភូមិកម្ពុជា»ត្រូវបានធ្វើឡើងនាព្រឹកថ្ងៃទី ២ ខែ ធ្នូ ឆ្នាំ ២០១៩ នៅសាលសន្និសីទចតុមុខក្រោមអធិបតីភាពលោក ហេង សំរិន ប្រធានរដ្ឋសភាដែលជាប្រធានចលនា «រណសិរ្សសាមគ្គីសង្គ្រោះជាតិកម្ពុជា» និងមានការចូលរួមពីមន្ត្រីជាន់ខ្ពស់ពីក្រសួង និងស្ថាប័នរាប់រយនាក់។
ថ្ងៃទី ២ ធ្នូ ១៩៧៨ ជាថ្ងៃដែលឥស្សរជនខ្មែរ និងអ្នកស្នេហាជាតិជាច្រើនរូប ដែលដឹកនាំដោយលោក ហេង សំរិន លោក ជា ស៊ីម និងលោក ហ៊ុន សែន ក្រោមការជួយជ្រោមជ្រែងដោយកងទ័ពវៀតណាមបានប្រមូលផ្តុំគ្នានៅក្នុងស្រុកស្នួល ខេត្តក្រចេះ ដើម្បីធ្វើចលនាតស៊ូវាយផ្តួលរំលំរបបវាលពិឃាតកម្ពុជាប្រជាធិបតេយ្យរបស់បនប្រល័យពូជសាសន៍ប៉ុលពត។
ថ្លែងក្នុងពិធីអបអរសាទរខួប ៤១ ឆ្នាំ នាឱកាសនោះ លោក ហេង សំរិន ថ្លែងថាក្នុងរយៈពេល ៤១ ឆ្នាំកន្លងមកនេះ គណបក្សប្រជាជនកម្ពុជា និងប្រជាជនគ្រប់រូបបានរួមរស់ជាមួយគ្នាក្នុងជួររណសិរ្សពុះពារឆ្លងកាត់ឧបសគ្គតូចធំទាំងឡាយយ៉ាងអង់អាចក្លាហានបំផុត។ ស្មារតី ២ ធ្នូ ស្មារតី ៧ មករាបានចារឹកជាប់ក្នុងមនសិការរបស់ប្រជាពលរដ្ឋគ្រប់រូប និងបានប្រែក្លាយទៅជាកម្លាំងយ៉ាងធំធេងក្នុងការបង្កើតឡើងនូវសមិទ្ធផលធំៗរបស់សង្គមជាតិ។
លោកបញ្ជាក់ថា៖ «បច្ចុប្បន្នប្រជាជនកម្ពុជាបានរស់នៅយ៉ាងសុខដុមរមនាក្នុងសន្ដិភាព សេរីភាព និងសន្ដិសុខដ៏ប្រសើរ ហើយកំពុងតែរួមសាមគ្គីគ្នាឈានទៅមុខលើមាគ៌ានៃការអភិវឌ្ឍដោយផ្អែកលើមូលដ្ឋាននៃសមិទ្ធផលទាំងឡាយដែលសម្រេចបានកន្លងមក។ ជាពិសេសជោគជ័យលើគ្រប់វិស័យក្នុងឆ្នាំ ២០១៩ នេះបានពង្រឹងថែមទៀតនូវមូលដ្ឋានគ្រឹះសម្រាប់បន្ដការអភិវឌ្ឍសេដ្ឋកិច្ច និងការកាត់បន្ថយភាពក្រីក្ររបស់ប្រជាជន»។
លោកបន្តថា៖ «ជោគជ័យ និងក្ដីសប្បាយរីករាយដែលយើងទទួលបាននៅថ្ងៃនេះ គឺមានប្រភពចេញពីថ្ងៃ ២ ធ្នូ និងជ័យជម្នះ ៧ មករាដ៏រុងរឿងដែលបានបំភ្លឺបង្ហាញផ្លូវយើងជានិច្ចជាង ៤ ទសវត្សរ៍កន្លងមក។ បច្ចុប្បន្នយើងអាចមើលឃើញផ្ទាល់ភ្នែកនូវសមិទ្ធផលលើគ្រប់វិស័យដ៏ច្រើនសេ្អកស្កះនៅគ្រប់ទិសទីដែលកើតចេញពីការប្រឹងប្រែងរបស់យើងទាំងអស់គ្នានេះឯង»។
លោកឲ្យដឹងដែរថា រណសិរ្សសាមគ្គីសង្គ្រោះជាតិកម្ពុជាបានលុបបំបាត់នូវស្នាមបែកបាក់ប្រេះឆាក្នុងសង្គមជាតិ និងបានធ្វើឱ្យធ្លុងមហាសាមគ្គីជាតិកាន់តែរឹងមាំឡើង ហើយបានស្ថាបនាប្រទេសកម្ពុជាប្រកបដោយវឌ្ឍនភាព ដែលប្រជាជនកម្ពុជាបានរស់នៅយ៉ាងសម្បូរណ៍សប្បាយក្នុងសន្ដិភាព សេរីភាព យុត្ដិធម៌ និងភាពថ្លៃថ្នូរជារៀងរហូតតទៅនៅលើមាតុភូមិរបស់ខ្លួន។
លោក ហេង សំរិន អះអាងថារណសិរ្សសាមគ្គីអភិវឌ្ឍន៍មាតុភូមិកម្ពុជាក៏ដូចជាគណបក្សប្រជាជនកម្ពុជាបន្តពង្រឹងសមត្ថភាព និងអភិបាលកិច្ចនៃសា្ថប័នរដ្ឋទាំងថ្នាក់ជាតិ និងថ្នាក់ក្រោមជាតិដើម្បីធានាឱ្យបាននូវប្រសិទ្ធភាពនៃសេវាសាធារណៈសំដៅបម្រើប្រជាជនឱ្យបានកាន់តែប្រសើរឡើងក៏ដូចជាការលើកកម្ពស់បរិយាកាសធុរកិច្ច និង បរិស្ថានអំណោយផលសម្រាប់វិនិយោគ។
ជាមួយនេះដែរលោកនាយករដ្ឋមន្ត្រី ហ៊ុន សែន នាព្រឹកថ្ងៃទី ២ ខែធ្នូ ឆ្នាំ ២០១៩ ក៏បានផ្ញើសារអបអរសាទរខួប ៤១ ឆ្នាំនៃការបង្កើតរណសិរ្សសាមគ្គីសង្គ្រោះជាតិកម្ពុជាផងដែរ។
លោកបានសរសេរលើហ្វេសប៊ុករបស់លោកថា៖ «រណសិរ្សសាមគ្គីសង្គ្រោះជាតិកម្ពុជាត្រូវបានកើតឡើងដោយកម្លាំងមហាសាមគ្គីប្រជាជនទាំងមូល ទាំងក្នុង និងក្រៅប្រទេសដែលមានសម្តេចអគ្គមហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម សម្តេចអគ្គមហាសេនាបតីតេជោ ហ៊ុន សែន និងវីរជនស្នេហាជាតិជាច្រើនរូបទៀតក្នុងការរៀបចំកម្លាំងផ្ដួលរំលំរបបប្រល័យពូជសាសន៍ ប៉ុលពត និង ទទួលបានជ័យជម្នះលើរបបនេះនៅថ្ងៃទី ៧ មករា ឆ្នាំ ១៩៧៩»។
រដ្ឋមន្ត្រីក្រសួងការពារជាតិលោក ទៀ បាញ់ ប្រាប់អ្នកសារព័ត៌មានបន្ទាប់ពីការប្រារព្ធពិធីនោះថាការប្រារព្ធពិធីអបអរសាទរខួបអនុស្សាវរីយ៍នៃទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជានេះគឺជាការរំឭកដ៏សំខាន់ដល់ថ្ងៃចាប់ផ្ដើមបង្កើតចលនាវាយផ្តួលរំលំកងទ័ពខ្មែរក្រហមនៃរបបកម្ពុជាប្រជាធិបតេយ្យ។
លោកបានថ្លែងថា៖ «យើងដឹងស្រាប់ហើយថា ចលនា ២ ធ្នូ ហ្នឹងគឺជាការចាប់ផ្តើមរៀបចំអង្គការនយោបាយមួយ និងចលនាតស៊ូដ៏សំខាន់ និងធំធេងបំផុតដែលឈានទៅដល់ទទួលបានជោគជ័យ និងកើតឡើងថ្ងៃ ៧ មករា ដែលជាថ្ងៃកម្ពុជាបានរស់ឡើងវិញ។ យើងបានសុខសន្តិភាពពេញលេញដោយសារនយោបាយឈ្នះៗជារៀងរាល់ឆ្នាំយើងត្រូវតែរំឭក ២ ធ្នូ ដោយសារតែវាគឺជាចំណុចចាប់ផ្តើមនៃការផ្តួលរំលំរបបប្រល័យពូជសាសន៍»។
លោក សំបូរ ម៉ាណារ៉ា សាស្ត្រាចារ្យប្រវត្តិសាស្ត្រចាត់ទុក «រណសិរ្សសាមគ្គីសង្គ្រោះជាតិកម្ពុជា» ជាថ្ងៃប្រវត្តិសាស្ត្រមួយដ៏សំខាន់ដែលមានកម្លាំងប្រជាជនកម្ពុជា និងកម្លាំងពីប្រទេសវៀតណាម ប្រយុទ្ធប្រឆាំងតទល់ និងផ្ដួលរំលំរបបកម្ពុជាប្រជាធិបតេយ្យ។
លោកថ្លែងថា៖ «យើងទាំងអស់គ្នាបានទទួលនូវភាពជូរចត់ដូចរូបខ្ញុំបានព្រាត់មនុស្ស ២០ នាក់ ក្នុងគ្រួសាររបស់ខ្ញុំ ហើយប្រសិនបើរបបនោះបន្តទៅទៀត វាអាចនឹងបាត់បង់រូបខ្ញុំដែរ។ សំណាងណាស់ដែលខ្ញុំនៅមានជីវិត និងបន្តជីវភាពមកទល់ថ្ងៃនេះបាន។ យើងបានជួបប្រទះការបោសសម្អាតការសម្លាប់ដ៏ព្រៃផ្សៃ។ ក្នុងសម័យកម្ពុជាប្រជាធិបតេយ្យ យើងបានជួបវិបត្តិធ្ងន់ធ្ងរណាស់ ដោយសារតែមានការសម្លាប់មនុស្ស និងការចោទប្រកាន់ថាមានទំនាក់ទំនងជាមួយបរទេសគឺវៀតណាមដែលបានបណ្តាលឲ្យកើតជាវិបត្តិ។ នៅពេលដែលយើង គ្មានជម្រើស និងប្រទេសជួបការលំបាកដ៏ធ្ងន់ធ្ងរ យើងត្រូវការអ្នកជួយយើង»៕
